Udite 13 - Vakavakadewa Vou kei na iVola tale eso（FNVDC12）

1Ni sa yakavi, era sa suka vakatotolo na nona italai; nira sa curu kece i tuba na tamata, sa sogota o Bakoasi na valelaca mai tuba; ra mani lai moce e na levu ni wawale e na dede ni soqo.

2Sa mani tiko taudua o Udite e lomanivale, o Oloferenesi a dodo tu e na loga, ni sa mateni sivia e na levu ni waini.

3Asa tukuna o Udite vua na nona vada me duri tu e mata ni rumu ni moce me waraki koya me curu i tuba, me vaka e nona itovo e veisiga, ni a tukuna ni na lai masu. Asa tukuna tale ga vei Bakoasi.

4Era sa mani curu kece i tuba, sega tale ni dua e vo e rumu ni moce. Sa qai duri e yasa ni loga o Udite, vosavosaiyalona, “Kemuni na Turaga na Kalou sau, ni raica mai e na gauna qo na cakacaka ni ligaqu me vakacerecerei kina o Jerusalemi.

5Qo na gauna me vueti kina na nomuni matatamata, meu vakayacora noqu itavi me vakawabokotaki kina na meca era sa mai vorati keimami.”

6Sa mani torova na duru ni loga donuya na ulu i Oloferenesi, taura sobu mai nona iselewau a lili tu kina.

7Sa toro tale yani, qumia na drauniuluna, kaya, “Ni vakaukauataki yau nikua, kemuni na Turaga na Kalou ni Isireli!”

8Sa qai taya vakarua na domona e na nona igu taucoko, erau veitalatala kina na uluna kei na domona.

9Sa qai vaqiqica na yagona mai na loga, uruca na kena taunamu; vakalailai sa gole i tuba, solia na ulu i Oloferenesi vua nona vada

10me tawana e na nona taga ni ivaqa.

Rau lesu i Beculia o Udite kei na nona vada

Erau sa qai lako yani me vaka nodrau ivakarau merau lai masu; erau muri yani e loma ni keba, wavoki e bati ni qakilo, lai cabeta na delana i Beculia, yacova sara yani na kena matamata.

11Sa kaci vakayawa yani o Udite vei iratou na yadra, “Dola, dola na matamata! Na Kalou, na noda Kalou se tiko vata kei keda me vakaraitaka na nona kaukaua e Isireli, nona sau vei ira na keda meca, me vaka sa cakava nikua!”

12Nira sa rogoca na domona na tagane ni nona koro, era vakusakusa sobu i matamata, qai soqoni ira na qase ni koro.

13Era veicicivi yani, qase kei na gone, nira sega ni vakabauta ni sa lesu tale mai; era dolava vei rau na matamata, vakawaqa buka me rarama, ra qai soqovi rau.

14Sa qai kaya o Udite e na domo levu, “Me vakacaucautaki na Kalou, ni vakacaucautaki koya! Me vakacaucautaki na Kalou, ni sega ni vakasuka nona lomana na kawa i Isireli, sa vakadrukai ira ga na keda meca e ligaqu e na bogi nikua!”

15Sa qai ucuna na ulu mai na taga, vakaraitaka vei ira, kaya, “Raica, qo na ulu i Oloferenesi na vunivalu ni Asiria; qo na taunamu ni loga a davo tu kina e na dela ni mateni. Sa samuti koya na Turaga e na liga ni yalewa.

16Au bubului vua na Kalou bula, koya a maroroi yau e na ilakolako qo, ni mataqu ga a vakacalai koya, vakavuna nona leqa; a sega ni valavalaca vei yau meu dukadukali se madua kina.”

17Era sa kurabui vakalevu kece, ra cuva mera qarava na Kalou, ra qai kaya vata, “Moni dokai na neimami Kalou e na nomuni sa vakadrukai ira nikua na kedra meca na nomuni tamata.”

18 Dvei 5.24; Luke 1.28,42 Sa qai kaya vua o Usia, “Na luvequ, sa vakalougatataki iko na Kalou cecere sara vei ira kece na yalewa e vuravura, me vakalagilagi tale ga na Turaga na Kalou a buli lomalagi kei vuravura, ni a tuberi iko mo cebeta na ulu ni nodra iliuliu na keda meca.

19Na nomu veivakabauti e na sega ni taqusi e yalodra na tamata nira na nanuma na sau ni Kalou.

20Me vakadonuya na Kalou mo rokovi tawamudu kina; me sobuti iko na nona veivakalougatataki, nio a bole mate ni a vakamalumalumutaki na noda vanua, o a sauma ga na noda vakacacani e na nomu muria na sala dodonu e mata ni noda Kalou.” Era kaya kece, “Mana, mana!”