2 Tui 20 - Vakavakadewa Vou kei na iVola tale eso（FNVDC12）

Na Tauvi Mate i Esekaia(Aisea 38.1-8,21-22; 2Vei 32.24-26)

1Ena gauna o ya, a sa tauvi Esekaia e dua na mate ka sa voleka sara ni ciba kina. A lako yani vua o Aisea na parofita, na luve i Emosi, ka kaya vua, “Sa kaya vakaoqo o Jiova vei iko mo na raica ni sa tu vakavinaka na veika kece sara, baleta ni o na sega ni bula tale mai na nomu tauvi mate. Mo tu vakarau mo mate.”

2A sa vagoleva na matana ki na lalaga o Esekaia ka masu:

3“I Jiova, mo ni nanumi au mada, ni'u sa dau qaravi kemuni ena yalodina kei na lomadina, ka'u sa dau saga vakaukauwa me'u vakayacora na veika o ni vinakata.” A sa qai vakatekivu me tagi vakirukiru.

4A sa biuti koya na tui o Aisea, ia ni bera ni sivita yani na lomadonu ni valenitui, a sa kaya vua o Jiova

5me lesu tale vei Esekaia, na nodra i liuliu na tamata i Jiova, ka kaya vua, “Sai au o Jiova, na Kalou i Tevita na nomu qase. Au sa rogoca na nomu masu ka raica na wai ni matamu. Au na vakabulai iko, ia mo na lako cake ki na Valenisoro ena i katolu ni siga.

6Au na vakabalavutaka na nomu bula me tinikalima tale na yabaki. Au na vakabulai iko kei na koro levu o Jerusalemi mai vei tui Asiria. Au na taqomaka na koro levu oqo ena vukuqu, ena vuku i Tevita talega na noqu tamata.”

7Sa qai kaya o Aisea vua na dauveiqaravi ni tui me biuta ena nona mata ni bo na i bulu ni bo sa caka mai na vuanilolo, ka na bula kina o koya.

8A sa taroga o Esekaia na tui, “A cava na i vakatakilakila me vakadinati kina ni na vakabulai au o Jiova, ka'u na rawa ni lako tale ki na Valenisoro ni oti e tolu na siga?”

9A sa sauma o Aisea vakaoqo, “O Jiova ena solia vei iko na i vakatakilakila me vakadinati kina ni sa maroroya o koya na nona vosa ni yalayala. Ia oqo, o na vinakata beka li me na tosoi ki liu ena tini na i kalawa na i yaloyalo ni kabakaba, se me tosoi lesu ki muri ena tini na i kalawa?”

10A sa kaya o Esekaia, “E rawarawa na kena tosoi ki liu na i yaloyalo ena tini na i kalawa! Ia mo cakava me tosoi lesu ki muri ena tini na i kalawa.”

11A sa masuti Jiova o Aisea, ka sa cakava o Jiova me vakasukai tale ki muri na i yaloyalo me tini na i kalawa ena i kabakaba nei Easi na tui.

Na Veitukutuku mai Papiloni(Aisea 39.1-8)

12Ena gauna vata o ya, a rogoca kina na tui Papiloni o Pirotaki Paletani, na luve i Paletani, ni sa tauvi mate tiko o Esekaia na tui, ka mani vakauta kina vua e dua na i loloma kei na i vola.

13A kidavaki ira na i talaki o Esekaia ka vakaraitaka vei ira na nona i yau talei, ka okati kina na siliva, na koula, na ka boi vinaka, na i lumu talei, kei na nona i yaya ni valu. A sa sega tale ni dua na ka e tu ena nona vale se ena nona matanitu me a sega ni vakaraitaka vei ira.

14A qai lako vei Esekaia na tui o Aisea na parofita, ka kaya vua, “A cava era sa kaya o ira na tamata oqo, ka ra lako li mai vei?” A sa kaya o Esekaia, “Era sa lako mai na vanua yawa o Papiloni.”

15A sa kaya o Aisea, “A cava era sa kunea ena nomu vale?”

A sa kaya o Esekaia, “Era sa raica na ka kecega ena noqu vale. E sega tale ni qai vo e dua na noqu i yau me'u sega ni vakaraitaka vei ira.”

16A sa kaya vei Esekaia o Aisea, “Mo rogoca na vosa i Jiova, ni sa kaya:

17Sa roro tiko mai na gauna ena kau tani kina ki Papilonia na veika kece sa tu ena nomu valenitui, kei na veika era a binia tu na nomu qase me yacova na siga oqo. Ena sega tale ni qai vo e dua na ka. ka veiqaravi ena valenitui nei tui Papilonia.”

19A sa nanuma o tui Esekaia ni i balebale ni ka oqo sai koya na yaco mai ni tiko sautu kei na bula taqomaki ena dela ni nona gauna, ka mani kaya kina vei Aisea, “Sa vinaka na vosa i Jiova o sa mai tukuna oqo.”

Na Mate i Esekaia(2Vei 32.32-33)

20Ia na vo ni cakacaka i Esekaia na tui, ka okati kina na veisasaga yaga e cakava me vaka na nona cakava na mataniwai kei na i salasala ni wai ki na koro, a veika kece oqo sa volai ena i Vola ni Veika sa Caka ena nodra Veigauna na tui Juta.

21A sa mate o Esekaia, ka sa veisosomitaki ki na i tutu vakatui o Manasa na luvena.