1Kemuni Jiova ni kakua ni vunauci au ena nomuni cudru!
Ni kakua ni totogitaki au ena nomuni rarawa!
2Ni sa vakamavoataki au na nomuni gasau ni dakaititi;
O ni sa mokuti au sobu.
3Au sa mosi vakalevu sara ena vuku ni nomuni cudru:
Sa tauvimate kece na yagoqu ena vuku ni noqu caka cala.
4Sa luvuci au na levu ni noqu i valavala ca,
Ka sa bibi sara me vaka e dua na i colacola bibi vei au.
5Sa boi ca ka nana na noqu vidikoso
Ena vuku ni noqu lialia.
6Au sa vakalairoro sara, ka cuva ki ra,
Ka tagi voli ena veisiga taucoko.
7Sa tauvi au na katakata,
Ka'u sa tauvi mate bibi sara.
8Au sa malumalumu sara ka vakadrukai;
Sa leqa na yaloqu ka'u sa vutugu ena rarawa.
9Kemuni Jiova o ni sa kila na ka kece au gadreva;
O ni sa rogoca kece na noqu vutugu.
10Sa vadugu na utoqu, ka sa takali na noqu kaukauwa;
Sa takali talega na rarama ni mataqu.
11Era sa sega ni toro voleka mai vei au na wekaqu
kei ira na noqu i tokani baleta na noqu vidikoso.
Ka ra sa tu vakayawa mai vei au na wekaqu voleka.
12O ira era via vakamatei au sa cakava na nodra dai me'u coko kina,
Ka vakakina o ira era via vakamavoataki au;
Era sa sega ni cegu ena nodra nakicataki au voli.
13Au sa vaka na tamata didivara, sa sega ni rogo rawa;
Ka vaka na tamata galu, sa sega ni vosa rawa.
14Au sa vakataki ira sa sega ni dau sauma na vosa
Baleta ni ra sa sega ni rogoca rawa e dua na ka.
15Ia, au sa vakadinati kemuni ga i Jiova;
Sa i kemuni ga, na Turaga na noqu Kalou, o ni na rogoci au.
16Ni kakua ni laivi ira na noqu meca me ra marau ena vuku ni noqu rarawa.
Ni kakua ni laivi ira me ra dokadoka ena noqu bale.
17Sa voleka ni'u bale,
Ka sa tiko dei ga vei au na noqu vutugu.
18Au sa vakatusa na noqu i valavala ca e vuqa,
Ka ra sa vakalomaocaocataki au.
19Era sa bulabula ka kaukauwa na kequ meca;
Sa lewe vuqa era cati au ka sega na vuna.
20O ira era sauma na noqu vinaka ena ca,
Era sa saqati au baleta ni'u saga me'u cakava na ka dodonu.
21Ni kakua ni biuti au, i Jiova,
Ni kakua ni yawa tani mai vei au, na noqu Kalou.
22Ni mai vukei au oqo na Turaga na noqu i vakabula.
Masu ni Vakatutusa ni Tamata LomabibiVua na i liuliu ni sere; vei Jitucuni. A Same i Tevita.
Who We AreWhat We EelieveWhat We Do
2025 by iamachristian.org,Inc All rights reserved.
