Siraki 13 - Vakavakadewa Vou kei na iVola tale eso（FNVDC12）

1O koya e tara na kuluta, e na duka; koya e tomana voli na tamata dokadoka, e na ucui koya.

2Kua ni via laveta na ka o sega ni rawata, se mo tomana e dua e kaukaua se vutuniyau vei iko.

Merau veitomani vakacava na kuro qele kei na kuroniti kaukamea? Rau na veidiriki, e na qai kavoro na kuro qele.

3Ni cala o vutuniyau, e dau veibili tale; ia o dravudravua ni vakalolomataki, e na kere veivosoti tale.

4O vutuniyau e na vakayagataki iko mo ivakarawa ni ka; nio leqa tu, e na biuti iko.

5Ni tu vei iko na ka, e na tiko vata kei iko; e na vakaluvawaletaki iko, sega ni milamila vua.

6Ni vinakata nomu veivuke, e na veidabuitaki iko; e na matadredredre yani mo vakabauti koya.

E na vosa vinaka vaqo vei iko, “E dua nomu leqa?”

7E na vakamaduataki iko e na kakana vivinaka e tabea yani; ni sa vakaluvaiwaletaki iko vakavica, e na qai vakalialiai iko.

Keodrau mani sota tale, e na vakalecalecavi iko, e na vagaligali ga.

8Qarauna mo kua ni vakasesei, se mo malaude qai velavela.

9Ni sureti iko na tamata dokai, mo kua ni yalorawarawa sara, e na qai sureti iko wasoma.

10Kua ni usu deo biliraki tani; kua ni vakayawayawa deo guilecavi.

11Kua ni douvaki koya me vaka odrau tautauvata, se mo vakabauta nona talimagimagi;

na levu ni talanoa kei na matadredredre, e vakatovolei iko wale tiko ga kina.

12E tawaloloma o koya e vosa vakaveitalia; ke rawa ni vakamavoataki iko se vesuki iko, e na sega ni bera.

13Kua ni vakau vosa, mo qaqarauni matua, ni rerevaki na sala o lakova tiko.

Nio rogoca na veika qo nio moce tiko, yadra!

14 Lomana na Kalou e na nomu bula taucoko, masuti koya me vakabulai iko.

15Na veikabula kece era veilomani mataqali vata; na tamata era veilomani vakainodra;

16era sosoqoni vakamataqali vata na manumanu, eda vaka kina na tamata.

17Erau lala vakacava na olifa kei na lami? Erau bau lala vata na tamata valavalaca kei na yalododonu.

18Rau bau veiyaloni na pusi kei na koli? Rau bau veiyaloni na vutuniyau kei na dravudravua?

19Na asa kila e veidravuisiga era kedra na laione; e vakina na dravudravua, era kedra ikanakana na vutuniyau.

20Na yalomalua e sevaki vua na tamata dokadoka; e vakina na dravudravua vua na vutuniyau.

21Ni vakarau colovu na vutuniyau, era tauri koya na nona itokani,

ia ni colovu na tamata yalomalua, o ira sara ga na nona itau era biliraki koya.

22Ni sisi na vutuniyau, era lewe levu era vukei koya; ni vosa vakasakasaka, era vakadonuya tale.

Ni sisi na dravudravua, era vosataki koya kina; ni vosa vakayalomatua, era sega ni via rogoca.

23Ni vosa na vutuniyau, era galu kece, era vakacerecerea i na o na ka e tukuna.

Ni vosa na dravudravua, era kaya, “O cei na tamata qo?” Ke mani tacaqe, era biligi koya sobu sara.

24E vinaka na iyau ke sega ni vu mai e na ivalavalaca; e ca na dravudravua e matadra na tawadodonu.

25Na loma ni tamata e vukica na irairai ni tamata me vinaka se ca. Na yalomamarau e laurai e mata ni tamata.

26E kilai na yalo e mamarau e na mamarau ni mata, e vakavutu yalo ga na bulia na vosa vakaibalebale.