Vakarua 26 - Vakavakadewa Vou kei na iVola tale eso（FNVDC12）

Na i Sevu kei na i Katini

1Ni o ni sa yaco yani ki na vanua sa solia o Jiova na nomuni Kalou mo ni taukena ka o ni sa vakaitikotiko kina,

2mo ni qai kauta e dua na basikete i sevu ni veimataqali vua ni qele kece o ni tamusuka mai na vanua sa solia vei kemuni o Jiova na nomuni Kalou, ka kauta ki na vanua sa digitaka na Kalou me dau qaravi kina.Lako 23.19

3Mo ni lako vua na bete ka vakailesilesi tiko ena gauna o ya, ka kaya vua, ‘Au sa mai tusanaka edaidai vei Jiova na noda Kalou ni'u sa yaco mai ki na vanua sa yalataka vei ira na noda qase me solia vei keda.’

4Ena qai taura na i basikete mai na ligamuni na bete ka biuta ena mata ni cabocabonisoro i Jiova na noda Kalou.

5Mo ni qai cavuta na vosa oqo ena mata i Jiova: Na tamaqu e dua na kai Arami dauveilakoyaki. E ratou a lewe lalai sara ni ratou lako ki kea, ia e ratou a qai mani yaco me dua na matanitu levu ka qaqa.

6Era a vakacacani keimami na kai Ijipita ka vakasaurarataki keimami me keimami bobula.

7Ia keimami a qai tagica na veivuke i Jiova na nodra Kalou na neimami qase. Sa rogoca na neimami tagi o Jiova ka raica na neimami rarawa, na cakacaka kaukauwa, kei na vakalolomataki.

8A qai sereki keimami mai Ijipita o Jiova ena nona qaqa kei na nona kaukauwa levu. A cakava eso na cakacaka mana kei na ka e veivakurabuitaki, ka vakavuna talega me yaco eso na veika rerevaki;

9a kauti keimami mai ki ke ka solia vei keimami na vanua sa dave kina na sucu kei na oni.

10Ia oqo au sa kauta mai vei Jiova na i sevu ni vua ni qele sa solia vei au o koya.

Mo ni qai tauca na basikete ena mata i Jiova ka qaravi koya e kea.

11Mo ni marau ena vuku ni veika vinaka sa solia vei kemuni kei na nomuni vuvale o Jiova na nomuni Kalou; me ra marau vata kei kemuni na Livai kei ira na vulagi era tiko kei kemuni.

12Ena i katolu kece ni veiyabaki, mo ni dau solia na i katini ni nomuni vua ni qele vei ira na Livai, na vulagi, na luveniyali kei ira na yada, ka me ra kana ena nomuni veikoro ka mamau; ni o ni sa cakava na ka oqo,Vrua 14.28-29

13mo ni qai kaya vei Jiova vakaoqo, ‘Sa sega tale ni dua na i wasewase ni dua na i katini e vo ena noqu vale, au sa solia vei ira na Livai, na vulagi, na luveniyali kei ira na yada me vaka na ka o ni sa vakarota vei au me'u vakayacora. Au sa sega ni talaidredre se me'u guilecava e dua vei ira na nomuni vunau me baleta na soli i katini.

14Au sa sega ni kania e dua na kena i wase ena gauna ka'u a vakaloloku tiko kina; ka'u sa sega ni kauta tani e dua na kena i wase mai na noqu vale ena gauna ka'u a tawasavasava voli kina; ka'u sa sega talega ni solia e dua na kena wase ena vukudra na mate. Au sa talairawarawa ga vei kemuni Jiova na noqu Kalou, ka vakayacora na veika kece sara o ni sa vakarota me baleta na dua na i katini.

15Ni rai sobu mai ena nomuni i tikotiko tabu mai lomalagi ka vakalougatataki ira na nomuni tamata na Isireli; ni vakalougatataka talega na vanua sa dave kina na sucu kei na oni, na vanua bulabula vinaka o ni sa solia vei keimami, me vaka o ni sa yalataka vei ira na neimami qase.’

Nona Tamata Digitaki o Jiova

16E daidai sa vakaroti kemuni o Jiova na nomuni Kalou mo ni muria taucoko na nona lawa kece kei na i vakaro. Mo ni qarauna mo ni muria ena lomamuni kei na yalomuni taucoko.

17Edaidai o ni sa vakadeitaka kina ni sa nomuni Kalou o Jiova; ka o ni na lako ena nona sala, ka muria na nona lawa, ka vakayacora na veika kece sara sa vakarota.

18Edaidai sa ciqoma kina o Jiova na nomuni veivakadonui mo ni sa nona tamata digitaki, me vaka sa yalataka vei kemuni, ka mo ni talairawarawa ki na nona i vunau.Lako 19.5; Vrua 4.20; 7.6; 14.2; Taito 2.14; 1Pita 2.9

19Ena vakayacori kemuni mo ni cecere mai vei ira na veimatanitu kecega sa vakatubura o koya, ka o ni na vakacerecerei koya, ka vakalagilagia na yacana. O ni na nona tamata vakatabui, me vaka na veika sa yalataka.”