1A sa kaya vakaoqo o Jiova,
O koya sa buli iko, i Jekope,
O koya sa vakayacori iko, i Isireli:
Kakua ni rere, ni'u sa voli kemuni vakadua;
Au sa kacivi kemuni ena yacamuni,
O ni sa noqu.
2Ni o ni lako ena loma ni wai,
Au na tiko kei kemuni,
Kei na loma ni veiuciwai
Era na sega ni luvuci kemuni.
Ke o ni lako ena loma ni buka
O ni na sega ni kama,
Ka na sega ni kati kemuni
Na yameyame ni buka.
3Ni sai au o Jiova na nomuni Kalou
Na Kalou Yalo Savasava ni Isireli
O koya sa vakabulai kemuni.
Au na soli Ijipita yani me kemuni i voli
Ka soli Eciopea kei Sepa yani mo ni sereki kina.
4Au na solia yani na veimatanitu taucoko
Mo ni vakabulai kina
Baleta na kemuni talei vei au,
Ka'u sa dokai kemuni ka lomani kemuni.
5Ni kakua ni rere ni'u sa tiko kei kemuni.
Au na kauti ira mai na nomu kawa
Mai na tokalau kei na ra,
Ka kauti ira mai ki na nomuni vanua.
6Au na kaya ki na vualiku me sereki ira mai
Ka tukuna ki na ceva me kakua ni tarovi ira.
Laivi ira na noqu tamata me ra lesu mai na veivanua yawa.
7Era sa noqu tamata
Ka'u a buli ira me ra vakavuna me'u dokai!
Sa i Vakadinadina Bula i Jiova o Isireli8A sa kaya na Kalou,
“Kauti ira mai na tamata oqo.
Sa tu na matadra, ia era sa mataboko.
Sa tu na daligadra ia era sa didivara!
9Tukuna ki na veimatanitu me ra lako mai,
Kei ira na tamata me ra soqo vata mai.
O cei vei ira sa rawa me tukuna na ka oqo
Ka tukuna vei keda na veika e a yaco e liu?
Laiva me ra kauta mai na nodra i vakadinadina
Me ra mai vakadinadinataka vei keda ni dina na nodra vosa.
10Kemuni na Isireli, sai kemuni na noqu i vakadinadina,
Ka'u a digitaki kemuni mo ni noqu i vakadinadina,
Ka'u a digitaki kemuni mo ni noqu matanitu dauveiqaravi,
Ka mo ni kilai au ka vakabauti au.
11Mo ni kila talega ni sai au taudua ga na Kalou
Ka sega tale ni dua e a liu vei au
Ka na sega tale ni dua me na taravi au.
Sa i au taudua ga o Jiova,
Oi au taudua talega au rawa ni veivakabulai.
12Au a tukuna oti na ka ena yaco,
Ia au sa qai lako mai me'u vukei kemuni.
E sa sega ni bau dua na kalou tani e cakava na ka oqo;
Sa i kemuni na noqu i vakadinadina.
13Oi au na Kalou, ka'u Kalou taudua ga ena veigauna kecega mai muri.
Ena sega sara ni dua me na dro tani rawa mai vei au,
Ka na sega ni rawa ni dua e veisautaka na ka au cakava.”
Na Dro mai Papiloni14A sa kaya na Kalou Yalo Savasava ni Isireli,
O Jiova na nomuni i Vakabula.
“Au na tala yani e dua na mataivalu ki Papiloni
Me'u vakabulai kemuni kina.
Au na basuraka sobu na matamata ni koro
Ka na vuki na nodra kaila na lewena me domo ni tagi.
15Oi au o Jiova na nomuni Kalou Yalo Savasava,
Au a buli kemuni na Isireli ka'u sa nomuni tui.”
16O koya e a cakava e dua na sala ena loma ni wasawasa
Ka bulia e dua na gaunisala ena wai kui kaukauwa.
17E a kauta yani e dua na mataivalu me rusa;
E mataivalu tamata qaqa, na qiqinivalu kei na ose.
Era sa bale sobu ka sega ni tucake tale
Ka boko yani vakadua
Me vaka na yameyame ni cina.
18Ia a kaya o Jiova.
“Ni kakua ni kabita matua tiko na veika makawa
Se taura tikoga na veika sa sivi oti yani.
19Ni raica, au sa na cakava e dua na ka vou.
Sa yaco oti, o sa rawa ni raica oqo!
Au na cakava e dua na gaunisala
Ena loma ni vanua dravuisiga,
Ka vakadrodroya tu eso na uciwai vei kemuni e kea.
20O ira sara mada ga na manumanu kila era na dokai au;
Na oliva kei na lulu era na vakacaucautaki au
Ni'u na cakava na veiuciwai me ra drodro
Ena vanua dravuisiga;
Me ra gunu kina na noqu tamata.
21Sa i ira na tamata au a buli ira me ra noqu,
Ka ra na laga sere ni vakacaucautaki au!”
Na i Valavala Ca i Isireli22A sa kaya o Jiova,
“E sega ni oi au o ni a qarava,
O ni a sa oca ni qaravi au Isireli.
23O ni a sega ni kauta mai vei au
Na nomuni i soro kama sipi;
Se dokai au ena nomuni veisoro.
Au a sega ni lavaka vei kemuni na i solisoli,
Se vakaicolacolataki kemuni ena ka boi vinaka.
24O ni sega ni volia na ka boi vinaka me noqu
Se vakacegui au ena uro ni nomuni manumanu.
Ia o ni sa vakacolati au ga ena nomuni i valavala ca;
Ka vakaocai au ena nomuni caka cala.
25Au sa cakava na ka oqo ena vukuqu ga;
Ka'u na sega ni nanuma tiko na nomuni i valavala ca.
26Vakananuma mada na veika e baleti au
Ka me da veilewai mada.
Tukuna mai na veika e baleti kemuni
Me vakadinadinataki kina ni o ni sa dodonu!
27O ira sara na nomuni qase e liu era i valavala ca,
Era a i valavala ca talega vei au na nomuni i liuliu.
28Ka vakadukadukalitaka na noqu vale tabu
O ira na nomuni turaga.
Au sa mani kauta mai kina ki Isireli na veivakarusai
Ka laivi ira na noqu tamata me ra vakarogocataki.”
Who We AreWhat We EelieveWhat We Do
2025 by iamachristian.org,Inc All rights reserved.
