1A qai vosa o Ilivasi na kai Temani, ka kaya,
2Na nomu vosa, Jope, sa rui tawa yaga!
Sa sega sara ga na betena!
3E sega na tamata vuku e vaka tu oqori na nona i vosavosa,
Se me sasabai ena vosa e sega na kena i balebale.
4O iko o sa vakayalolailaitaki ira tiko na tamata me ra kakua
Ni rerevaka na Kalou;
Ka tarovi ira me ra kakua ni masu vua.
5Na i valavala ca ni lomamu
Sa i koya sara ga sa vosa tiko mai oqori;
O iko o tovolea wale tikoga me nomu i vunivuni na vosa qaseqase.
6E sega na betena vei au me'u beitaki iko mo ca;
Ni sa beitaki iko ga mo ca
Na vosa yadua sara ga o sa tauca tiko mai.
7O nanuma beka ni o iko na i matai ni tamata ka sucu mai?
O a tiko beka ena gauna ka bulia kina na Kalou na veiulunivanua?
8O a rogoca butako beka na i naki vuni sa cakava na Kalou?
E nomu duadua beka ga na vuku vakatamata?
9E sega ni dua na ka o kila me keitou lecava.
10Na neitou vuku keitou a vulica mai vei ira sa sikoa na uludra,
O ira na qase era a sucu e liu vei tamamu.
11Sa surevaka tiko vei iko na Kalou na vakacegu;
A cava na vuna o besetaka tiko kina?
Keitou vosa tiko oqo ena vukuna
Ena vosa malumu ka tau vakamalua.
12Ia o iko o sa qai tavaiyaya ka wadravi keitou
Ena mata cudrucudru.
13O sa cudruva na Kalou ka vosacataki koya.
14 Jope 25.4-6 E rawa beka ni dua na tamata sa savasava sara ga vakaoti?
E rawa beka ni dua sa dodonu sara vua na Kalou?
15Mo kila sara, ni Kalou sa sega mada ga ni vakabauti ira na nona agilosi;
Ka ni o ira sara mada ga era sega ni savasava sara e matana.
16Sa nodra mesamesa na tamata na cakava na i valavala ca;
Ka sa vaka wale tu ga na gunu wai vei ira.
Io, sa tauvi dukadukali na tamata;
Ka sa tawa yaga sara ga o koya.
17I Jope, mo vakarorogo mada ki na ka au kila.
18Era a vakavulici au na tamata vuku ena veika dina,
Era a vulica mai vei ira na tamadra,
Ka sega sara ga ni dua na ka vuni era a bau vunia.
19Ia me vaka ni sega sara na kai tani e a bau tu ena nodra vanua,
Sa mani sega kina ni dua e vagolei ira tani mai vua na Kalou.
20Na tamata ca ka dau vakasaurarataki ira na tani
Ena nona ga na leqa ena gauna taucoko ni nona bula.
21Ena qoqolou tikoga e daligana na domo ni veivakarerei,
Ia ena gauna sara ga sa nanuma kina o koya ni sa vakarurugi
Era sa qai buturaki koya na daubutako.
22Sa sega sara ni dro tani rawa o koya mai na butobuto,
Ka ni dua dina ga na vanua sa waraki koya tiko kina
E dua na i seleiwau me vakamatei kina,
23Ka ra sa wawa voli na ikeli me ra kania na yagona.
Sa kila tu o koya ni nona gauna mai muri ena butobuto sara ga;
24Na veivakarusai levu, me vaka e rawa ni cakava e dua na tui,
Sa wawa tiko me ravuti koya.
25Oqori na ka ena nona i tinitini
Na tamata ka buli i vacu vua na Kalou,
Ka bolea na veivala kei koya na Kaukauwa.
26Na tamata oqori sa rui viavialevu ka dauveivorati;
27Sa dulaka cake vakadomoqa na nona i sasabai
Ka cici yani me rau vala kei na Kalou.
28Na tamata oqori sa vakadruka na veikoro lelevu
Ka kovea na veivale era sa dro oti na kena i taukei.
E tamata urouro ka vutuniyau;
Ia na i valu ga ena qai vakarusa na veikoro lelevu kei na veivale oqori.
29Ena sega ni dede na nona vutuniyau na tamata oqori;
Ka sega na ka e taukena ena tudei.
Na kena rugurugua sara talega ena yali yani,
30Ka na sega ni dro tani rawa o koya mai na butobuto.
Ena qai tautauvata ga o koya kei na dua na vunikau
Sa kama na veitabana ena bukawaqa,
Ka ra cagina tani na sena ni liwava na cagi.
31Kevaka e rui tamata lialia ka vakararavi ki na ka ca
Ia na ka ca sara ga, sai koya ena tauca o koya.
32Ni bera ni oti na nona gauna, e sa na malai ga mai,
Ena malai me vaka e dua na taba ni kau
Ka na sega ni drokadroka rawa tale.
33Ena tautauvata o koya kei na dua na vunivaini
Sa lulutu na vuana ni ra sa bera ni dreu;
Ka vaka e dua na vuniolive e sega sara ga ni bau vua vakadua.
34Era na sega ni vakawa na tamata lecava na Kalou,
Ka vakarusai ena bukawaqa
Na veivale era tara ena veitemaki ca.
35Oqo o ira na tamata dau nakita na veivakaleqai ka cakava na ka ca;
Ka sa dau sinai tu ga na lomadra ena veivakacalai.
Who We AreWhat We EelieveWhat We Do
2025 by iamachristian.org,Inc All rights reserved.
