Yalomatua 11 - Vakavakadewa Vou kei na iVola tale eso（FNVDC12）

E liutaki ira na Isireli e na vanua dravuisiga o yalomatua

1 Lako 15.22–17.16 O yalomatua a vakavuna me mana na nodra cakacaka e na liga ni parofita tabu.

2Era lakova na vanua lala, era biri valelaca e na vanua se bera ni butuki.

3Era vorati ira na meca, era vakasavi ira.

4Nira karamaca, era kaci yani vei kemuni, qai drodro mai na vatu qiwa na medra wai, vakacegui nodra karamaca e na vatu qaqa.

5Na ka sara ga era kuitataki kina na kedra meca, era vakacegui kina o ira e na nodra leqa.

Nodra kuitataki na kai Ijipita

6Vei ira nomuni tamata, oni a sega ni vukica na wai drodro tu ga me dra

7me vaka oni a cakava vei ira na kai Ijipita me isau ni ivakaro mera moku na gone lalai; oni a vakaramacataki ira ga

8mera bau kila kina na itovo ni nomuni kuitataki ira na kedra meca, oni qai sovaraka mai vakasauri na medra wai.

9E na nodra tovolei tiko, dina nira vakavulici e na loloma, era sa kila kina na itovo ni nodra vakararawataki na tabulotu nira cudruvi.

10Oni vakatovolei ira me vaka na veivakavulici vakatama, ia oni vaqaqai ira na tabulotu me vaka na veivakacalai ni tui vosavakadua.

11Era kune rarawa na tabulotu sera tiko na nomuni tamata se sega;

12e vakaruataki na nodra rarawa kei na vutugu e na nodra nanuma na ka sa yaco.

13Nodra sa rogoca na kai Ijipita ni nodra kuitaki era sa mai kalougata kina na yalododonu, era sa kila ni cakacaka ni Turaga.

14O koya e a besetaki mada ni sa gone, ra qai vakalialia, ra a tini qoroya; e duatani sara nodra viagunu kei na nodra na yalododonu.

15 Lako 8.1-24; 10.12-15 Na nodra vakasama lialia butobuto, era sa vakasesei kina mera qaravi gata kei na manumanu wale; oni a tala e dua na ibinibini manumanu tawayaga me kena isau vei ira,

16mera kila kina ni kuitataki e dua e na ka sara ga e valavalaca kina.

17Na ligamuni sau a buli vuravura mai na ka a sega na votukana, e sega ni guce na tala mai vei ira na qele ni bea se laione kila

18se manumanu buli vou tawakilai, koya e cudruwaqawaqa, se ceguvaki yameyame, se buraki kubou loaloa, se vakadomobula na lidilidi ni matana;

19e sega wale ga ni veivakamatei na ka kece qo, na kedra irairai wale ga e rawa ni dua e mate kina e na rere.

20Ke sega mada ga qo, era rawa ni bale na tamata e na dua ga na icegu ni tau vei ira na lewa dodonu se mera tolosevi e na dua na icegu ni nomuni sau. Ia oni sa tuva na veika kece e na kedra ivakarau, kedra iwiliwili, kei na kedra bi.

E kaukaua, dauloloma na Kalou

21Nomuni sau oni rawa ni vakaraitaka tu ga; o cei e vorata rawa na ligamuni qaqa?

22E matamuni na vuravura taucoko e vaka na mataninuku yavalata dredre na ivakarau, e vaka na ituru ni tegu ni mataka e lutu i qele.

23Ia oni lomani ira kece na tamata, nioni rawata na ka kece, oni dau vakalecalecava nodra ivalavalaca na tamata mera veivutuni kina.

24Oni lomana na ka kece, oni sega ni cata e dua na ka oni sa bulia; keoni a cata, keoni a sega ni bulia na ka.

25E tudei vakacava na ka ke a sega ni lomamuni? Se a maroroi vakacava na ka ke a sega nioni kaciva me bula?

26Oni taqomaka na veika kece saka, nira nomuni, oni lomana saka na veikabula.