1Erau cavutu, muri rau tiko yani na koli nei Tobia. Ni sa yakavi, erau yacova na bati ni wai o Taikirisi, rau sa mani keba kina.
2A siro sobu o Tobia me lai sasavui. A qai lade mai e dua na ika me tiloma na yavana;
3kaila o Tobia, a kaya yani na yagilosi, “Vesuka na ika qori.” A qai vesu, yara i vanua.
4A kaya na yagilosi, “Tunaka, maroroya vinaka na utona, na yatena kei na mina.”
5Sa mani muria na vosa ni yagilosi; rau qai tavuna na ika, rau kania. Erau mani tosoya tale na ilakolako me yacova ni sa voleka o Mitia.
6Sa qai kaya na cauravou vua na yagilosi, “Asaria na wekaqu, na cava na yaga ni yate ni ika, na utona kei na mina?”
7A sauma, “Na uto kei na yate e dau vakamai me kuvui kina e dua e vakasagai koya na tevoro se yalovelavela; e na sega tale ni sagai koya.
8Ia na mina, me sui kina na mataseila, e na rai tale.”
Na sala i Ekevatana9Erau sa yacovi Mitia, rau volekati Ekevatana yani,
10sa kaya na yagilosi vua na cauravou, “Na wekaqu, nikua daru na vakaicili vei Rakueli. Drau veiwekani, e dua ga na luvena, o Sera. Au na kaya me soli me watimu,
11baleta e dodonu ga me nomu o koya kei na nona iyau, ni o iko duadua sara ga na mataniwatina.
12E goneyalewa totoka qai yalomatua. Rogoci yau mada. Au na vosa vei tamana; daru lesu ga mai Rajesi, tou sana caka vakamau, niu kila ni o Rakueli, e na lawa vakaMosese, e tabu ni soli koya tale vua e dua – kena itotogi na mate – ni dodonu ga me nomu na iyau, sega tale ni dua.”
13Sa qai kaya na cauravou vua na yagilosi, “Asaria na wekaqu, au sa rogoca ni lewe vitu na tagane sa soli oti vei iratou na goneyalewa qo, eratou qai mate kece e loqi.
14O yau duadua na gonetagane i tamaqu, au rere deu curu yani au qai mate, vakataki iratou ya, ni domoni koya tiko na tevoro, e sagai ira ga era torovi koya yani. Au rerevaka gona deu na mate, rau qai lolositaki yau o tamaqu kei tinaqu me yacova na mate. E sega tale na tagane me veibulu.”
15Mani tukuna vua na yagilosi, “O sa guilecava na vosa nei tamamu vei iko, ni a vakaroti iko mo taura me watimu e dua drau veiwekani? Rogoci yau mada na wekaqu, drau sana veiwatini. Kua ni leqataka na tevoro; na bogi sara ga nikua sana soli kina me watimu.
16Nio sa curu yani i loqi, mo kauta yani na qilaiso waqa ni mira, qai tavuna kina na uto ni ika kei na yatena me ikuvui.
17E na boica na tevoro qai dro vakadua, sega tale ni via lesu mai. Nio sa toro yani vua, drau mata ruarua, drau kaci vua na Kalou dauloloma, e na qai vakabulai kemudrau, e na lomani kemudrau. Kua ni rere, ni sa kena madigi tu mai na ivakatekivu me watimu. O na vakabulai koya, drau na lako vata i vale, au kila niodrau na vakaluveni.” Ni sa rogoca o Tobia na veika qo, sa domoni yalewa vakalevu, sa mateci koya dina.
Who We AreWhat We EelieveWhat We Do
2025 by iamachristian.org,Inc All rights reserved.
