1Ena i ka 12 ni yabaki ni veiliutaki vakatui i Easi na tui Juta, a sa yaco me tui Isireli o Osea na luve i Ela, ka veiliutaki mai Samaria me yabaki ciwa.
2A daucaka ca o koya ena mata i Jiova, ia sa sega ga ni vakataki ira na tui Isireli era sa liu vua.
3A sa qai valuti koya o Salamanesa na tui Asiria; sa qai soro vua o Osea ka dausoli ka ni loloma vua ena veiyabaki.
4Ia ena dua na yabaki, a sa vakau i tukutuku o Osea vei So na tui Ijipita, me kere veivuke vua, ka sa muduka talega na nona soli ka ni loloma vei tui Asiria. Ni sa rogoca na ka oqo o Salamanesa, a sa qai vakarota me vesu o Osea ka biu ki valeniveivesu.
Na Vakadrukai nei Samaria5Sa qai curuma vakaukauwa na vanua o Isireli o Salamanesa ka buku na druadrua ni koro o Samaria. Ena i katolu ni yabaki ni buku druadrua,
6ka donuya oqo na i kaciwa ni yabaki ni veiliutaki vakatui i Osea, sa qai vesuka na koro o Samaria na tui Siria, ka kauti ira yani vakavesu na Isireli ki Asiria, ka vakatikora ira ena koro levu o Ela, ena tikina o Kosani ka volekata na uciwai o Apori, kei na veikoro lelevu eso mai Mitia.
7A sa vakadrukai o Samaria baleta ni ra sai valavala ca na Isireli vei Jiova na nodra Kalou, o koya a kauti ira cake mai na vanua o Ijipita, mai na ligana na tui Ijipita. Era sa qarava na kalou tani eso,
8ka muria na nodra i valavala na veimatanitu ka a vakasevi ira tani o Jiova e matadra na Isireli, ka ra ciqoma na i tovo kei na i valavala era vakatavulica vou mai na tui eso ni Isireli.
9Era sa cakava vuni na Isireli na veika e sega ni vinakata o Jiova na nodra Kalou. Era sa tara na vanua ni sokalou ki na kalou tani eso ena veikoro kece sara, mai na koro lailai duadua ki na koro levu duadua.
10Era a vakaduria ena veidelana kei na ruku ni veivunikau na vatu lelevu ni sokalou kei na i vakatakarakara ni kalou yalewa o Asera,1Tui 14.23
11ka ra vakama e kea na ka boi vinaka ena veivanua ni sokalou kece, ni ra sa vakamuria na nodra i valavala na kawa tamata sa kauti ira tani mai kea o Jiova. Era sa vakayavalata na cudru i Jiova mai na nodra i tovo vakasisila
12ka sega ni via muria na i vakaro ni Kalou me ra kakua ni cuva ki na veikalou matakau.
13A sa talai ira yani na nona tamata kei na parofita o Jiova me ra vakaroti ira na Isireli kei ira na Juta matua, ni a kaya, “Mo ni gole tani mai na nomuni valavala ca, ka vakabauta na noqu i vunau kei na noqu i lesilesi, me vaka na vunau kece ka'u a vakarota vei ira na nomuni qase, ka'u a tukuna tale vei kemuni ena gusudra na parofita na noqu tamata.”
14Ia era a qai sega ni vakarorogo ka ra sa vakadomoqataki ira me vaka era a kitaka na nodra qase, ni ra sa sega ni vakabauti Jiova na nodra Kalou.
15Era sa beca na nona i lesilesi kei na nona veiyalayalati ka a cakava o koya kei ira na nodra qase, kei na i vakaro ka a solia vei ira. Era a muria na veimatakau ceuceu tawayaga ka ra sa tawayaga vakakina; era a muria na i tovo ni veimatanitu e voliti ira, ka ra talaidredre kina ki na i vakaro i Jiova me ra kakua ni vakamurimuri ira.
16Era a voroka kece na lawa i Jiova na nodra Kalou ka ra bulia e rua na i vakatakarakara ni luve ni bulumakau me ra cuva kina; era sa cakava talega na i vakatakarakara ni kalou yalewa ni veikau o Asera, ka ra cuva ki na kalokalo kecega ni lomalagi, ka ra qarava na kalou o Peali.1Tui 12.28
17Era a dui vakacabori ira na luvedra tagane kei na luvedra yalewa me i soro kama ki na kalou tani eso; era a vakataroga na daurairai kei na daucakaisausau; era sa musuki vakadua ki na caka ca ena mata i Jiova, ka sa vakayavalata na nona cudru.Vrua 18.10
18A sa cudruvi ira vakalevu sara na Isireli o Jiova, ka biuti ira tani mai matana; a sega tale ni qai vo e dua, na mataqali i Juta duadua ga.
19O ira na Juta era sa sega talega ni muria na lawa i Jiova na nodra Kalou; era sa vakamurimuria ga na nodra i valavala ni bula na Isireli.
20A sa sega ni taleitaki ira kecega na Isireli o Jiova, ni sa totogitaki ira ka soli ira yani ki na ligadra na meca rerevaki, ka yacova na gauna sa biuti ira tani kina mai matana.
21Ni sa tawasei ira oti na Isireli mai vei ira na Juta o Jiova, era a qai buli Jeropoama na luve i Nipati na Isireli me nodra tui. A sa vakavuna o Jeropoama me ra biuti Jiova na Isireli ka liutaki ira ki na i valavala vakasisila e vuqa.
22Era a vakamurimuri Jeropoama ka ra cakava na veitovo ca kece sa vakayacora o koya,
23ka yacova na gauna sa qai biuti ira laivi vakadua kina na Isireli o Jiova mai matana, me vaka sa tukuna oti ena gusudra na nona tamata na parofita. Era a kau tani kina vakavesu na Isireli ki Asiria, ka ra se tiko ga mai kea.
24Na tui Siria a sa qai kauti ira na tamata mai na veikoro lelevu o Papiloni, kei Kuca, kei Ava, kei Emaci, kei Sivafeimi, ka vakatikori ira ena veikorokoro mai Samaria, me kedra i sosomi na Isireli era sa kau vakavesu. Era a taukena na veikoro oqo ka bula kina.
25Ena i matai ni nodra Ia'ki tauyavu e kea, era a sega ni qaravi Jiova, ka mani vakatala kina vei ira o Jiova eso na laione, ka vakamatea eso vei ira.
26A sa tukuni vua na tui Asiria ni o ira na tamata ka la'ki vakatikori ena veikoro mai Samaria era sa sega ni kila na nona lawa na kalou ni vanua o ya, ka vakavuna kina na nona tala mai na laioni me ia na veivakamatei.
27A sa solia kina na i vakaro na tui Asiria ka kaya, “Dou vakauta lesu e dua vei ira na bete sa kau mai vakavesu; dou cakava me lesu tale ka la'ki bula voli mai kea, me rawa kina ni vakatavulici ira na tamata me baleta na lawa ni kalou ni vanua o ya.”
28A sa mani vakalesui kina e dua vei ira na bete ni Isireli ka la'ki tiko ki Peceli, ka sa vakavulici ira na tamata ena i valavala ni qaravi Jiova.
29Ia era a dui bulia tikoga na nodra veikalou na tamata era sa mai vakaitikotiko e Samaria, ka ra la'ki vakatikori ira ena veivanua ni vakacaboisoro era a cakava tu na Isireli. Na veiwasewase duidui eso sa bulia ga na nodra kalou matakau ena veikoro era sa tiko kina.
30O ira na kai Papiloni era sa bulia na matakau ni kalou o Sukoci Pinoci; o ira na kai Kuca era sa buli Nakali; o ira na kai Emaci era sa bulia na matakau eso ni kalou o Esima;
31o ira na Avimi era sa buli Nipasi kei Taritaki; ia o ira na kai Sivafeimi era sa vakamatei ira na luvedra me i soro kama vei rau na nodra kalou o Etirameleki kei Anameleki.
32O ira na tamata oqo era qaravi Jiova talega, ka ra digitaka mai vei ira vakai ira na veimataqali tamata me ra veiqaravi vakabete ena veivanua ni vakacaboisoro eso, ka vakacabora na nodra i soro mai kea.
33Era sa qaravi Jiova tiko, ia era qarava talega na nodra dui kalou ni nodra vanua ka ra a vakauti tani mai kina.
34Na i valavala oqo era se cakava tikoga me yacova mai na gauna oqo. Era sa sega ni qaravi Jiova, ka sega talega ni muria na lawa kei na i vakaro sa soli vei ira na luve i Jekope, o koya sa vakatoka me yacana o Isireli.Vteki 32.28; 35.10
35A sa cakava o Jiova na veiyalayalati kei ira ka vakaroti ira: “Dou kakua ni qarava na veikalou tani; dou kakua ni cuva vei ira se qaravi ira, se ia na vakacaboisoro vei ira.Lako 20.5; Vrua 5.9
36Mo ni talairawarawa vei au, oi au o Jiova, ni'u a kauti kemuni tani mai na vanua o Ijipita, ena kaukauwa levu; mo ni cuva vei au ka ia na vakacaboisoro vei au.Vrua 6.13
37Mo ni muria tikoga na lawa kei na i vakaro kece au sa vola me baleti kemuni. Mo ni kakua ni muri ira na veikalou tani,
38ka mo ni kakua sara ni guilecava na veiyalayalati au sa cakava kei kemuni.
39Mo ni talairawarawa vei au, oi au o Jiova na nomuni Kalou, ka'u na vakabulai kemuni mai vei ira na kemuni meca.”
40Ia era a sega ga ni vakarorogo vua, ka ra muria tikoga na nodra i valavala e liu.
41O ira na tamata ni veivanua oqo era a qaravi Jiova, ia era a qarava talega na nodra veimatakau ceuceu eso; ka sai koya oqo na veika era cakava vakakina na nodra kawa me yacova na siga oqo.
Who We AreWhat We EelieveWhat We Do
2025 by iamachristian.org,Inc All rights reserved.
