1Kemuni na Isireli, ni rogoca mada na i tukutuku i Jiova vei kemuni.
2A sa kaya vakaoqo o koya,
“Ni kakua ni muria na nodra sala
O ira na veimatanitu tani,
Se mo rerevaka na veivakatakilakila
Oni raica e lomalagi;
Ni ra sa rerevaka oqo na veimatanitu.
3Sa tawa yaga na nodra lotu na tamata oqo.
Sa musuki mai e dua na kau mai veikau;
Ka sa sivisiviraki ena i yaya vakamatai,
4A sa qai ceuti kina na siliva kei na koula.
Sa vakadeitaki sara ena i vako
Ka sa tuki kina me kakua ni yavala.
5Na veimatakau vaka o ya
Sa vaka na i vakatakarakara ni tamata
Ena dua na loga ni meleni;
Era sa sega ni vosa rawa,
Sa dodonu ga me ra colati,
Baleta ni ra sega ni lako rawa.
Ni kakua ni rerevaki ira:
Ni sega ni rawa me ra caka ca vei kemuni.”
6Kemuni Jiova,
Sa sega e dua me vakataki kemuni:
Sa levu ga oi kemuni,
Ka sa cecere na yacamuni ka kaukauwa.
7O cei me sega ni rerevaki kemuni
Na tui ni veimatanitu?
Sa dodonu mo ni rerevaki ka rokovi.
Sa sega e dua sa tautauvata kei kemuni
Vei ira na tamata vuku ni veimatanitu.
8A nodra tamata vuku kece
Era sa lialia ka sesewa.
E rawa li ki na veimatakau
Me vakavulici ira ena dua na ka?
9Sa vakaiukuuku na nodra veimatakau
Ena siliva mai Tasisi,
Kei na koula mai Ufasi,
Era sa cakacaka ni ligadra kecega na matai
Kei na dautuki kaukamea.
Era sa vakaisulu ena i sulu karakarawa
Kei na i sulu lokaloka,
Era talia na dautalitali.
10Ia o Jiova
Sa i koya na Kalou dina,
Sa i koya na Kalou bula,
Kei na tui tawa mudu.
Ni sa cudru
Sa sautaninini na vuravura;
Ka na sega ni vosota rawa na veimatanitu
Na nona cudru.
11Mo ni tukuna vei ira na ka oqo: ni ra sa vakarusai na veikalou eso sa sega ni bulia na vuravura kei na lomalagi. Era sa na sega tale ni bula tiko ena dua na vanua e vuravura.
A Sere ni Vakavinavinaka vei Jiova12Sa bulia o Jiova na vuravura
Ena nona kaukauwa;
Sa bulia o koya na vuravura
Ena nona vuku,
Ka sa tevuka yani na lomalagi
Ena nona maqosa.
13Ena vuku ni nona vosa,
Sa vadugu kina na wai mai lomalagi;
Sa kauta mai na kabukabu
Mai na i yalayala kei vuravura.
Sa vakavuna na tibi ni livaliva
Ena gauna ni uca,
Ka sa tala mai na cagi
Mai na nona lololo.
14Sa lecaika na tamata yadua
Ka rui lialia;
Sa vakamadualaki na dautuki kaukamea
Mai na nodra matakau.
Sa lasu ga na nodra kalou matakau;
Ka sa sega vei ira na bula.
15Era sa tawa yaga
Ka dodonu me ra beci;
Ena gauna era na vakaitotogitaki kina
Era na rusa laivi.
16Sa sega ni vaka o ya na Kalou i Jekope;
Sa i koya sa bulia na ka kecega,
Ka sa digitaki Isireli me ra nona tamata.
Na Kalou Kaukauwa sai koya na yacana.
Na Kau Vakavesu sa Voleka17Kemuni na lewe i Jerusalemi, o ni sa valuti tiko, ni sa buku na druadrua vei kemuni! Ni kumuna vata na veika o ni taukena.
18Ena vakarau kolotaki kemuni tani mai na vanua oqo o Jiova; ena vakarau vakadasilataki kemuni me yacova ni sa sega ni vo e dua vei kemuni. A sa kaya ga vakaoqo o Jiova.”
19Era sa tabalaka na tagi
Na lewe i Jerusalemi.
Oilei, keimami sa mavoa vakaca sara!
Ena sega ni mavo rawa na neimami mavoa.
Ka keimami sa nanuma ga
Ni sa rawa me vosoti na ka oqo!
20Sa vakarusai na neimami valelaca;
Sa cavuka na dali kecega sa vesu kina.
Era sa lako oti na luve i keimami;
Ka ra sa lako tani vakayawa.
Sa sega ni dua me birika tale
Na neimami valelaca,
Ka sa sega e dua me vakarubeca
Na kena i latilati.
21Era sa lialia
Na nodra i liuliu na tamata,
Era sa sega ni taroga
Na i vakasala ni Turaga.
O ya na vuna era sa sega kina ni toro cake;
Ka ra sa veiseyaki kina na tamata.
22Ni rogoca!
E dua na rorogo sa lako tiko mai
Sa dua na matanitu mai cake,
Vaka ki na vualiku.
Na kena mataivalu ena vakavuna
Na veikoro e Juta me vanua lala,
Ka me nodra i tikotiko na koli.
23Kemuni Jiova,
Au sa kila na nona sala na tamata,
E sega ni lewa rawa
Sa sega na tamata e lewa rawa na nona bula.
24Ni vakadodonutaki keimami Jiova,
Ia ena lewa dodonu
Ka me kakua ena cudru,
De keimami rusa vakadua sara.
25Ni sovaraka na nomuni cudru
Ki na veimatanitu
Sa sega ni cuva vei kemuni,
Kei ira sa sega ni ciqomi kemuni.
Era sa vakamatei ira na nomuni tamata;
Era sa vakarusai keimami vakadua sara
Ka vakaleqa vakadua na neimami vanua.”
Who We AreWhat We EelieveWhat We Do
2025 by iamachristian.org,Inc All rights reserved.
