Same 44 - Vakavakadewa Vou kei na iVola tale eso（FNVDC12）

1Kemuni na Kalou, keimami sa rogoca e daliga i keimami,

Ka ra sa tukuna vei keimami na neimami qase

Na veika lelevu o ni a cakava ena nodra gauna e liu:

2Na nomuni a vakasavi ira tani na tawa vakabauta

Ka qai vakatikori ira na nomuni tamata ena nodra vanua;

Na nomuni a totogitaki ira na veimatanitu

Ka vakavuna me ra tiko vinaka na nomuni tamata.

3Era a sega ni rawata na vanua na nomuni tamata

ena nodra i seleiwau;

Ka ra sega ni qaqa ena nodra kaukauwa ga;

Ia, ena nomuni kaukauwa ga kei na nomuni qaqa,

Ena vakadeitaka ni o ni sa tu voleka,

Ka sa vakaraitaka oqo na nomuni lomani ira.

4Sa i kemuni na noqu Tui kei na noqu Kalou;

O ni sa solia na qaqa vei ira na nomuni tamata.

5Sa vakadrukai ga na keimami meca

mai na nomuni kaukauwa;

Ka ra vakamalumalumutaki ena yacamuni.

6Au sa sega ni vakararavi ki na noqu dakaititi,

Se nuitaka na noqu i seleiwau me vakabulai au;

7Ia, o ni sa vakabulai keimami mai vei ira na meca,

Ka vakadrukai ira era sa cati keimami.

8Keimami na dauvakacaucautaki kemuni tikoga,

Ka vakavinavinaka vei kemuni ka sega ni mudu.

9Ia oqo, kemuni na Kalou, o ni sa biuti keimami,

Ka laiva me keimami vakadrukai;

O ni sa sega ni lako vata kei ira na neimami mataivalu.

10O ni sa vakavuna me keimami dro tani

mai vei ira na keimami meca,

Ka ra taura na veika keimami taukena.

11O ni sa laivi keimami me keimami vakamatei me vaka na sipi,

Ka vakasevi keimami ki na veimatanitu.

12O ni sa volitaki ira na nomuni tamata ena dua na i sau lailai,

Ka sa sega na tubu e rawa mai kina.

13Era sa raica na neimami i tokani na ka o ni sa cakava vei keimami,

Ka ra sa vakalialiai keimami ka veiwalitaki keimami talega.

14O ni sa cakava me dua na ka ni veivakamaduataki

ena kedra maliwa na veimatanitu;

Ka ra sa kurea na uludra ena nodra beci keimami.

15Au sa vakamaduataki ena gauna kecega,

Ka'u sa luvuci sara ena madua,

16Ena noqu rogoca na nodra veivakalewai

kei na veivakacacani na kequ meca.

17Na veika kece oqo sa yacovi keimami,

Ka dina ga ni keimami sega ni guilecavi kemuni

Se voroka na nomuni veiyalayalati kei keimami.

18Keimami sa sega ni bau gole tani mai vei kemuni

Ka sega ni bau talaidredre ki na nomuni veivakaro.

19Ia, o ni sa laivi keimami tu ga e matadra na manumanu kila

Ka biuti keimami duadua tu ena vanua butobuto sara.

20Kevaka keimami a muduka na qaravi koya na neimami Kalou

Ka masuta tale e dua na kalou tani,

21O ni na qai kila deivaki ga

Baleta ni o ni sa kila na i naki vuni ni loma i keimami.

22 Roma 8.36 Io, ena vukumuni keimami sa vakamatei kina ena gauna kecega,

Ka okati me vaka na sipi me la'ki vakamatei.

23Ni yadra mai, na Turaga! Na cava o ni moce tiko kina?

Ni tucake! Ni kakua ni biuti keimami vakadua!

24Na cava o ni vunitaki kemuni tiko kina vei keimami?

Ni kakua ni guilecava na neimami vakararawataki kei na neimami leqa!

25Keimami sa lutu ka dasila ena qele;

Keimami sa davo druka tu ena soso.

26Ni tucake ka vukei keimami!

Ni vakabulai keimami ena vuku ni nomuni loloma tudei.

A Sere ni Vakamau Vakatui

Vua na i liuliu ni sere. A nodra Masikili na luve i Kora. A sere ni veidomoni.