Vakarua 19 - Vakavakadewa Vou kei na iVola tale eso（FNVDC12）

Lawa e Baleta na Veikoro me i Drodro(Tiko 35.9-34; Josua 20.1-9)

1“Ena gauna era sa vakarusai ira oti kina na tamata era i taukei ni vanua ka sa solia oqo vei kemuni o Jiova na nomuni Kalou, ka o ni sa vakamalumalumutaki ira oti ka vakaitikotiko ena nodra veikoro kei na nodra veivale,

2mo ni qai digitaka e tolu na koro lelevu ka vakatakilakilataki iratou ena vanua sa solia vei kemuni o Jiova na nomuni Kalou mo ni taukena.

3Mo ni vakarautaka na kena yawa ka wasea vakatolu na vanua sa solia vei kemuni o Jiova na nomuni Kalou me nomuni, me na rawa kina vua na daulaba me dro ki na dua vei iratou na koro oqo.

4Sai koya oqo na i vakarau me baleta na tamata ka dro ki kea me taqomaka na nona bula. Kevaka e dua sa vakamatea ena vakacalaka e dua na tamata ka sega mada ga ni rau veimecaki, ia me dro yani ki na veikoro lelevu oqo.

5A kena i vakaraitaki oqo: kevaka e rau sa lako ki veikau me rau ta buka e rua na tamata, ka sa qai taucu laivi mai na yame ni matau i koya ka ta buka tiko, ka mani lauta sara na wekana ka mani mate sara kina, ia sa rawa vua na tamata o ya me dro ki na dua vei iratou na koro e tolu me maroroi kina na nona bula.

6Kevaka e dua wale tikoga na koro ni drodro ka rui toka vakayawa, sa na rawarawa kina ni ra toboki koya koso o ira e sa dodonu me ra sauma lesu na i sau ni dra, ka ra mani vakamatea mai na dela ni nodra cudru e dua na tamata tawa cala. Na vuna oqo ni a yaco vakacalaka na nona vakamatei nona i tokani ka rau sega ni veimecaki.

7Sai koya oqo na vuna au sa vakaroti kemuni kina mo ni vagalalataka e tolu na koro lelevu me i drodro.

8Ia ena gauna sa vakalevutaka kina na nomuni vanua o Jiova na nomuni Kalou me vaka sa yalataka vei ira na nomuni qase ka solia vei kemuni na vanua kece a yalataka,

9ia kevaka o ni muria vakavinaka kece na nona i vunau, na nomuni Kalou, ka bula voli me vaka na nona i vakaro, mo ni qai digitaka tale e tolu na koro me kena i kuri,

10me na rawa kina me ra kakua ni vakamatei o ira e sega ni dodonu me ra vakamatei ka, me kakua talega ni beitaki vei kemuni na nodra mate ena vanua sa solia vei kemuni o Jiova na nomuni Kalou.

11Ia kevaka e dua na tamata sa nakita me labata na wekana, sa mani vakamavoataki koya sara vakaca ka mani mate sara kina, sa qai dro ki na dua vei iratou na koro ni drodro oqo,

12me ra na qai kauti koya o ira na i liuliu ni nona koro ka soli koya vua na tamata sa nona i tavi me sauma lesu na i sau ni dra ka me vakamatei sara na tamata o ya.

13Mo ni kakua sara ni lomani koya, ia mo ni vakasavasavataki Isireli ga mai na i sau ni dra ni tamata cala, me na yaco kina vei kemuni na vinaka.

Na i Yalayala ni Vanua Makawa

14Mo ni kakua ni tosoya na i yalayala ni nodra vanua na wekamuni, ka sa vakataudeitaki ena dua na gauna makawa sara ena vanua sa vakarau solia vei kemuni o Jiova na nomuni Kalou.Na Lawa me Baleti Ira na i Vakadinadina

15Ena sega ni rawa ni vakadinadinataki ni cala e dua na tamata ka beitaki ena dua na cala, kevaka e lewe dua ga na i vakadinadina. Ia, e dodonu ga me rua, se tolu na i vakadinadina ni sa bera ni vakadeitaki ni sa cala dina na tamata o ya.