1Ni ra se tiko ga mai Sitimi na Isireli, sa tekivu me ra veilasavi o ira na turaga ni Isireli kei ira na yalewa ni Moapi era tiko e kea.
2Era veisureti na yalewa oqo ki na nodra soqoni vakalotu ka qaravi kina na kalou ni Moapi. Era sa kania na kena kakana o ira na Isireli ka cuva ki na nodra kalou.
3Ena ka oqo era sa semati ira kina na Isireli vua na kalou o Peali ni Piori, ka sa waqa kina na cudru i Jiova vei ira.
4Sa kaya vei Mosese o Jiova, “Mo kauti ira na nodra i liuliu na tamata, ka vakamatei ira ena sigalevu tutu ena mata i Jiova, me mudu kina na cudru waqawaqa i Jiova vei ira na Isireli.”
5A sa qai kaya o Mosese vei ira na turaga veiliutaki, “Mo ni dui vakamatei ira yadua na nomuni tamata era sa sokalou tiko vei Peali ni Piori.”
6Ni oti o ya, sa gole mai e dua na Isireli ka vakacuruma ki na nona valelaca e dua na yalewa ni Mitiani, ka cakava oqo e matana levu ni rai tu o Mosese kei na lewenivanua ena gauna era tagi tiko kina ena mata ni katuba ni Vale ni Veitavaki.
7Ni raica oqo o Finiasi na luve i Iliesa, na luve i Eroni na bete, a tucake, ka lako tani mai vei ira na lewenivanua: A sa taura e dua na moto;
8ka muri koya yani na Isireli kei na yalewa ki na loma ni valelaca, ka cokai rau mate ruarua ena ketedrau. Ena ka oqo sa mudu kina na mate levu mai vei ira na Isireli,
9ia na i wiliwili era sa vakamatei oti sa yacova na 24,000 na tamata.
10Sa qai vosa vei Mosese o Jiova, ka kaya,
11“Ena vuku na ka sa vakayacora o Finiasi, au sa sega tale kina ni cudruvi ira na Isireli. Sa mositi koya na bibi ni kena vakatabui na qaravi kalou tani, ka me qaravi duadua ga oi au. Oqo na vuna au a sega ni vakarusai ira kina ena noqu cudru.
12O koya oqo mo kaya kina vua ni'u na cakava e dua na veiyalayalati ni tiko sautu kei koya.
13Ena yaco o koya kei ira na nona kawa me ra qarava vakadua na i tavi vakabete ena vuku ni nona gumatua me totaka na nona Kalou, ka ni sa sorovaki ira talega na Isireli.”
14Na yaca i koya na Isireli ka vakamatei vata kei na yalewa ni Mitiani o Simiri, na luve i Salu, ka turaga veiliutaki ena vuvale ni mataqali i Simione.
15Na yaca ni yalewa ni Mitiani ka vakamatei o Kosipi. Na tamana o Suri, e i liuliu ni dua na matayavusa e Mitiani.
16Sa qai vosa vei Mosese o Jiova, ka kaya,
17“Mo ravuti ira na Mitiani ka vakamatei ira,
18ena vuku ni nodra veretaki kemuni mo ni qarava na nodra kalou mai Piori; ka baleti Kosipi talega, na luvena yalewa e dua na turaga veiliutaki ni Mitiani, o koya ka a vakamatei ena gauna ni mate levu ena vuku i Piori.”
Who We AreWhat We EelieveWhat We Do
2025 by iamachristian.org,Inc All rights reserved.
