Josua 3 - Vakavakadewa Vou kei na iVola tale eso（FNVDC12）

Takosova na Joritani o Ira na Isireli

1A sa sou ena mataka o Josua, kei ira kecega na lewe i Isireli, ka biuti Sitimi me ra lako ki na Joritani, ka keba mai kea ni ra sa takoso ki tai kadua.

2Ena i katolu ni siga, era sa curuma yani na loma ni keba o ira kece na vakailesilesi ni tamata se dauveiliutaki

3ka vakaroti ira na tamata vakaoqo, “Ni o ni sa raici ira na bete ni ra sa colata yani na Kato ni Veiyalayalati i Jiova na nomuni Kalou, mo ni cokia na nomuni valelaca ka muri ira.

4Era na liutaki kemuni ena sala mo ni muria, ka ni a sega mada ni dua vei kemuni sa lako oti e ke. Mo ni kakua sara ni lako volekata yani na Kato ni Veiyalayalati, ka me rauta e dua na kilomita na kemuni yawa ki muri.”

5Sa qai vosa vei ira na tamata o Josua, ka kaya, “Mo ni vakasavasavataki kemuni ni na vakayacora o Jiova na cakacaka mana levu vei kemuni ni mataka.”

6Sa qai vosa vei ira na bete o Josua, ka tukuna, “Dou laveta cake na Kato ni Veiyalayalati ka colata ki liu me ra muri yani na tamata.” Era sa cakava me vaka sa tukuna o Josua.

7A sa kaya vei Josua o Jiova, “Au na tekivu vakalevulevui iko edaidai ena matadra na Isireli taucoko me ra kila kina ni'u sa tiko vata kei iko, me vaka ga na noqu a dau tiko vata kei Mosese.

8Mo vakaroti ira na bete era colata tiko na Kato ni Veiyalayalati me ra sobu yani ka la'ki tucake tu vakadua e loma ni uciwai ena gauna era sa yaco yani kina ki na bati ni wai na Joritani.”

9Sa qai kaya vei ira na Isireli o Josua, “Ni toro mai, ka mai rogoca na vosa i Jiova na nomuni Kalou.

10Oqo na i vakatakilakila o ni na kila kina ni sa tu vata kei kemuni o Jiova na Kalou bula, ka na vakasavi ira vakaidina na Kenanaiti, na Itaiti, na Ivaiti, na Perisaiti, na Kakesaiti, na Amoraiti kei ira na Jepusaiti mai na matamuni o koya.

11Raica, na Kato ni Veiyalayalati i Jiova na Kalou ni vuravura taucoko ena liu vei kemuni ki na Joritani.

12Mo ni digitaka e lewe tinikarua na tagane, ka me yadua mai na veimataqali kece e Isireli.

13Ia ena gauna era na butuka kina na wai ni uciwai na Joritani o ira na bete ka ra colata tiko na Kato ni Veiyalayalati i Jiova, ena qai mudu vakasauri na drodro ni uciwai, ka bini cake vata na wai ena dua na yasana.”

14Ia ni ra sa uruca na nodra veivalelaca me ra takosova na Joritani, era sa qai lako yani e liu o ira na bete era colata tiko na Kato ni Veiyalayalati.

15A sa dau waluvu wasoma na bati ni Joritani ena gauna o ya ni sa donumaka na vula i tatamusuki. Ia, ena gauna ga era sa yaco yani kina ki na bati ni Joritani o ira na bete ka ra colata tiko na Kato ni Veiyalayalati, ni sa sobu sara yani na yavadra ki wai,

16a sa qai mudu vakasauri na drodro sobu mai ni wai. Era a bini vata na wai ena tolo ni uciwai ki cake, donuya na koro o Atama ena yasayasa vaka-Saricani, ka muduki sara kina na drodro sobu ni wai ki na Waitui Mate. Era sa qai takoso ki na tai kadua o ira na Isireli ena vanua sa veidonui kei Jeriko.

17Ena gauna era sa taubale takoso tiko kina na tamata ena qele mamaca, era sa tucake tu vakadua o ira na bete ka colata tiko na Kato ni Veiyalayalati i Jiova ena lomadonu ni uciwai na Joritani ena qele mamaca, me yacova ni ra sa takoso kece sara na Isireli ki na tai kadua.