Jope 27 - Vakavakadewa Vou kei na iVola tale eso（FNVDC12）

Maroroya o Jope na Nona Tamata Dina

1A sa tomana o Jope na nona vosa, ka kaya,

2Me vaka ni sa bula na Kalou,

O koya sa kauta laivi na noqu dodonu,

O Koya sa Kaukauwa,

Ka sa vakararawataka na yaloqu,

3Io, ena gauna taucoko au bula kina,

Ka tiko e ucuqu na i cegu ni Kalou,

4Ena sega na ka ca me basika mai tebenigusuqu,

Ka sega na vosa lasu ena cavuta na yamequ.

5Au na sega ni tukuna ni dou sa dodonu;

Ka'u na tusanaka tikoga ni'u sega ni cala

Me yacova na noqu mate.

6Ena sega ni mudu na noqu tukuna voli ni'u sa yalododonu;

Ka sa galala kina na yaloqu.

7Me ra totogitaki me vakataki ira na tamata ca ka dukadukali

O ira kece era sa vorati au, ka'u sa veivala vata.

8Era sa vakanuinui beka ki na cava

O ira na tamata sa lecava na Kalou

Ena gauna sa kauta laivi kina na Kalou

Na nodra bula?

9Ena rogoca li na Kalou na nodra tagi

Ni sa yacovi ira mai na leqa?

10Era na kunea li na marau vei Koya sa Kaukauwa?

Era na masuta li na Kalou ena veigauna kece?

11Me'u vakavulici kemudou mada ena kena vakaitamera na kaukauwa ni Kalou,

Ka vakamacalataka na veika sa nakita tu na Kalou Cecere.

12Ia na veika oqo dou sa sarava oti.

A cava tale na vuna

Me qai ia kina na i vakamacala vakaoqo

Ni sa sega ni yaga?

13Sa vakaoqo na nona sala na Kalou Cecere

Ni sa totogitaki ira na tamata i tovo vakasisila ka i vakarau kaukauwa.

14Era na lewe vuqa beka na luvedra,

Ia era na mate kecega ena i valu;

Ka na sega ni veirauti na kedra kakana o ira na luvedra.

15O ira era bula mai na i valu ena qai vakamatei ira na mate lelevu,

Ka na sega ni vakalolokutaka na nodra mate o ira na nodra yada.

16E dina ga ni na levu cake na siliva era kumuna na tamata ca

Ka vaka na i binibini qele na levu ni nodra i sulu,

17Ia na veika era sa binia ena vakaisulu kina na yalododonu,

Ka vota na siliva o ira sa sega ni cala.

18Era sa tara na tamata ca

Na nodra i tikotiko me vaka

Na vale ni viritalawalawa,

Se vaka na nona bure na bobula

Sa lesi me yadrava na i teitei.

19Era sa davo sobu

Ena dela ni nodra vutuniyau,

Ia ni ra yadra cake,

Sa yali na nodra i yau kece sara.

20Sa tarai ira na rere levu me vaka na waluvu;

Ka liwavi ira tani na cagi ni bogi;

21Na cagi tokalau ena laveti ira cake,

Ka ra na lako tani sara;

Sa taviraki ira mai na nodra i tikotiko;

22Ena liwavi ira yani vakaukauwa ka sega ni loloma

Ni ra tovolea ena nodra i gu me ra dro.

23Sa vakacevaruru na cagi ni ra sa dro,

Ka vakarerei ira na kena kaukauwa ni veivakarusai.