Udite 11 - Vakavakadewa Vou kei na iVola tale eso（FNVDC12）

1Sa qai kaya vua o Oloferenesi, “Mo yaloqaqa lewa, kua ni rere, niu sega mada vakadua ni se vakamavoataka e dua e lomana me qaravi Nepukanesa, na tui kei vuravura taucoko.

2Qo mada ga, ke a sega nira viavialevu vei yau na kai nomu era tiko e colo, ke a sega niu ucu iyaragi, ia na ka kece qo e bale ga vei ira.

3Ia nio sa yaco bula mai, tukuna mada mai qo se cava o dro mai kina vei keimami.

4Mo yalodei, o na bula e na bogi nikua lako yani. E na sega ni dua e na tarai iko, keimami na lomani iko me vaka na neimami lomani ira na italai ni noqu turaga o Nepukanesa.”

5A sauma o Udite, “Ni rogoca na vosa ni nomuni italai, na nomuni vada me vosa e matamuni, au na sega ni lasutaki kemuni na noqu turaga e na bogi nikua.

6Keoni muria na vosa ni nomuni vada, na Kalou e na vakayacora e ligamuni e dua na ka, oni na rawata dina saka na nomuni inaki.

7Jere 27.6; Tani 2.38Me bula o Nepukanesa na tui kei vuravura taucoko, me dei nona sau, o koya a talai kemuni moni mai lewai ira kece na tamata; e sega ni tamata wale ga era qaravi koya e na vukumuni; na manumanu tale ga ni vanua, na bulumakau kei na manumanuvuka era na bula e na nomuni lewa e na veiliutaki nei Nepukanesa kei na nona yavusa.

8Keimami sa rogoca na nomuni vuku kei na maqosa, sa rogovaki e vuravura raraba ni sega ni dua e siviti kemuni e na matanitu taucoko e na kilaka kei na qaseqase vakaivalu.

9“Na vosa nei Akiori e na nomuni bose, keimami sa rogoca, nira vakabulai koya na kai Beculia, a qai tukuna kece vei ira nona vosa vei kemuni.

10Koya saka gona, noqu turaga sau, ni kua ni vakawaletaka nona vosa, ni tugana tiko ga, ni ka dina; na neimami vanua e sega ni rawa ni kuitataki se rawai e na ivalu, vakavo ga ni keimami cala vua na neimami Kalou.

11“Ia qo, oni na sega saka ni vakadrukai se vakasevai na nomuni inaki, nira sana mate, ni sa rawai ira na ivalavalaca, sana cudru kina na neimami Kalou.

12Sa oti na kedra, sa vakarau maca na medra, era sa via moku bulumakau; era sa duavata mera kania na ka kece sa vakatabuya na Kalou e na nona ivakaro.

13Lako 23.19; Vsoro 27.30Era sa duavata mera kania na isevu ni sila kei na dua na ikatini ni waini kei na waiwai era sa vakatabuya qai sauva me baleti ira na bete era veiqaravi vua na neimami Kalou e Jerusalemi, dina ni tabu vua e dua me tara mada ga.

14Era sa veitalai i Jerusalemi me kerei mai na veivakadonui ni seneti, baleta ni o ira sara mada ga na kai Jerusalemi era cakava tiko.

15Ni sana vakasavui vei ira na itukutuku era qai vakayacora, na siga sara ga ya era sana soli yani vei kemuni mera vakawabokotaki.

16“Koya gona, niu sa rogoca na ka kece qo o yau na nomuni italai, au sa dro mai kina; sa talai yau mai na Kalou meda vakayacora vata na ka e na kurabui kina o vuravura taucoko, o ira kece na rogoca.

17O yau na nomuni italai, au dau lotu, au qarava na Kalou ni lomalagi e na siga kei na bogi; koya saka gona, au na tu vata ga kei kemuni, ia e na bogi, au na lai masu i na buca vua na Kalou, e na qai vakaraitaka mai na gauna era sa valavalaca kina.

18Au na qai mai tukuna vei kemuni, moni cavutu vata kei na nomuni mataivalu taucoko, e na sega ni dua vei ira me na vorati kemuni.

19Au na qai tuberi kemuni i loma i Jutia me yaco i Jerusalemi. Au na vakatura na nomuni idabedabe e loma donu, oni na qai liutaki ira me vaka na sipi e sega na kedra ivakatawa, e na sega mada ga ni dua na koli e dalaga me kodrovi kemuni. Au sa kila rawa na ka qo ni sa tukuni vei yau, au sa mani talai mai meu tukuna vei kemuni.”

20Na nona vosa era marautaka o Oloferenesi kei ira kece na nona italai, era qoroya na nona vuku, ra kaya,

21“E vuravura taucoko e sega ni dua na yalewa e bau torovi koya e na totoka ni matana se na vuku ni nona vosa!”

22Sa qai kaya vua o Oloferenesi, “E vinaka ni talai iko mai na Kalou, mo mai vakaukauataka na liga i keimami, mera vakawabokotaki kina o ira na beca na noqu turaga.

23E sega wale ga nio rairai totoka, o vosa vuku tale ga; kevaka o na vakayacora dina na nomu vosa, nomu Kalou e na noqu Kalou, o na tiko e na vale nei Nepukanesa na tui mo rogo e vuravura taucoko.”