Tiko Voli mai na Lekutu 20 - Vakavakadewa Vou kei na iVola tale eso（FNVDC12）

Sa Vure na Wai mai na Vatu(Lako 17.1-7)

1Ena i matai ni vula, era sa yaco mai na Isireli ki na vanua lala o Sini, ka ra birika na nodra valelaca me ra keba e Katesi. A sa mate e kea o Miriama ka bulu talega kina.

2Sa sega na wai ena vanua o ya, ka ra sa qai soqoni vata na lewenivanua ka veileti kei rau o Mosese kei Eroni.

3Era sa vosa kudrukudru ka veileti kei Mosese, ka kaya, “E vinaka cake me keimami a mate vata ga kei ira na weka i keimami ena mata ni vale tabu i Jiova!

4A cava na vuna o kauti keimami mai kina ki na vanua lala oqo? O vinakata me keimami mai mate eke vata kei ira na neimami manumanu?

5A cava na vuna o kauti keimami tani kina mai Ijipita ki na vanua ca oqo sa sega ni bula rawa kina e dua na ka? Sa sega ena vanua qo na sila, se na lolo, se na veivaini, se na pomekaraneti. Sa qai sega talega na wai me keimami gunuva!”

6Sa qai lako tani o Mosese kei Eroni mai vei ira na lewenivanua, ka lako ki na katuba ni Vale ni Veitavaki, ka rau sa cuva vakatoboicu. Ia na i serau i Jiova sa rairai vei rau,

7Sa kaya vei Mosese o Jiova.

8“Mo taura na i titoko, ka vakasoqoni ira vata na lewenivanua, o iko kei Eroni na tuakamu. Ni ra vakasoqoni vata tu, mo drau qai vosa ki na vatu sa tu mai o ya, ena qai vure mai kina na wai. Ena sala oqo, ena vure kina na wai mai na vatu ka o na vagunuvi ira kina na lewenivanua kei na nodra manumanu.

9Sa qai kauta na i titoko o Mosese mai na mata i Jiova, me vaka sa vakaroti vua.

10E rau sa qai vakasoqona vata na lewenivanua o Mosese kei Eroni me donuya na uluvatu, ka kaya vei ira o koya, “Ni rogoca mada oqo na tamata dautalaidredre: me keirau vakavurea beka na memuni wai mai na vatu oqo?”

11Sa qai dodoka na ligana o Mosese, ka samuta vakarua na vatu ena nona i titoko; a sa drodro vakayauyau mai kina na wai, ka ra sa gunu o ira na lewenivanua, kei na nodra manumanu yava i va. na vanua era a veileti kina kei Jiova o ira na Isireli, ka qai vakatakila kina vei ira ni Kalou savasava o koya.

Tarovi Ira na Isireli o Tui Itomi

14A sa tala eso na i talai o Mosese mai Katesi me ra lako vei tui Itomi, ka kaya vua, “Era sa vosa vakaoqo na wekamu na Isireli: o ni sa kila na veileqa kecega sa yacovi keimami:

15Na nodra lako sobu ki Ijipita o ira na neimami qase, kei na neimami sa tiko vakadede mai na vanua o ya; ka ra sa vakararawataki keimami kei ira na neimami qase o ira na kai Ijipita;

16ia ni keimami a tagi vei Jiova, a rogoca na domo i keimami o koya, ka sa tala mai e dua na agilosi, me kauti keimami na sa mai tiko oqo e Katesi, na koro ena i yalayala ni nomu vanua.

17Ia oqo mo ni vakadonuya mada me keimami curuma yani na nomuni vanua. Keimami na sega ni butuka na loma ni veiwere, se na veivaini, keimami na sega talega ni gunuva na wai mai na mata ni wai; keimami na muria ga na salatu ni tui, ka na sega ni malele ki na i matau se ki na i mawi, me yacova ni keimami lako sivia na i yalayala ni nomu vanua.”

18Ia sa kaya vua o tui Itomi, “Mo kakua sara ni muria mai na noqu loma ni vanua, de'u na lako yani kei na i seleiwau ka valuti iko.”

19Era sa kaya vei tui Itomi o ira na Isireli, “Keimami na muria ga na salatu; ia kevaka keimami gunuva na memuni wai, kei ira na neimami manumanu yava i va, keimami na sauma; ia mo laiva mada ga me keimami taubale takoso yani.”

20Ia sa kaya o koya na tui Itomi, “O ni na sega sara ni curuma mai na noqu vanua.” A qai cavu vakaivalu mai o tui Itomi kei ira e lewe vuqa sara na nona tamata, kei na dua na nona mataivalu kaukauwa.

21A sega ni vinakata o tui Itomi, me ra curuma yani na nona vanua na Isireli; ka ra mani gole tani mai Itomi na Isireli.

Na Mate i Eroni

22Era sa lako mai Katesi na Isireli, io o ira na lewenivanua taucoko, ka yaco ki na Ulunivanua o Ori.

23Sa qai vosa o Jiova vei Mosese kei Eroni mai na Ulunivanua o Ori ena i yalayala ni vanua o Itomi, ka kaya,

24“Sa na toki yani o Eroni vei ira na nona qase; ni sa na sega ni curu o koya ki na vanua ka'u a solia vei ira na Isireli, ena vuku ni nomudrau talaidredre ki na noqu vosa mai na wai o Meripa.

25Mo kauti rau o Eroni, kei Iliesa na luvena, ka kauti rau cake ki na Ulunivanua o Ori;

26ia mo luvata na i sulu vakabete i Eroni, ka vakadarama vei Iliesa na luvena; ena qai toki yani vei ira na nona qase o Eroni, io ena mate o koya mai kea.”

27Sa cakava o Mosese me vaka a vakarota o Jiova; ka ratou a cabeta cake na Ulunivanua o Ori, e matadra na lewenivanua taucoko.

28Sa qai luvata na i sulu vakabete i Eroni o Mosese, ka vakasuluma vei Iliesa na luvena; a qai mate mai kea o Eroni ena dela ni ulunivanua. E rau sa qai siro sobu mai na ulunivanua o Mosese kei Iliesa.Lako 29.29; Tiko 33.38; Vrua 10.6

29Ia ni ra sa kila na lewenivanua taucoko ni sa mate o Eroni, era sa tagicaki koya ka bogi 30.