1A vinakata o Setani me vakatubu leqa vei ira na Isireli, ka vakauqeti Tevita kina me tauca na lewa me vakayacori na wili lewenivanua.
2A vakaroti Joape kei ira na turaganivalu o Tevita, ka kaya, “Dou lako yani ki na vanua taucoko o Isireli, me tekivu mai na dua na muana me yaco ki yasana kadua, ka wiliki ira na lewe ni vanua. Au vinakata me'u kila na kedra i wiliwili taucoko.”
3A sa kaya o Joape, “Me qai vakayadrautaka tale o Jiova na kedra i wiliwili na Isireli sa tiko rawa edaidai! Kemuni na noqu turaga na tui, era sa nomuni tamata vakaidina o ira oqo. A cava li o ni vinakata kina me vakayacori na ka oqo ka vakavuna me ra sa cala kina na matanitu taucoko o Isireli?”
4Ia a sa vakaroti Joape na tui me muria ga na nona lewa. Sa qai lako yani o Joape vei ira kece na Isireli, ka lesu tale yani ki Jerusalemi.
5A la'ki tukuna o koya vei Tevita na tui na i wiliwili taucoko ni tamata ka ra yaga me ra curu ki na mataivalu. Era sa lewe 1,100,000 e Isireli ka ra lewe 470,000 e Juta.
6Ena vuku ni nona a cata na lewa vakatui o Joape, a sega kina ni wiliki ira na Livai kei ira na Penijamini.
7A sa rarawa sara na Kalou ena vuku ni ka oqo, ka cudruvi Isireli kina.
8A sa tukuna vua na Kalou o Tevita, “Au sa cakava na cala levu sara ena noqu vakayacora na ka oqo! Mo ni yalo vinaka ka vosoti au na nomuni tamata. Au sa cakava e dua na i vakarau lialia.”
9A sa vosa o Jiova vei Kata, o koya na parofita i Tevita, ka kaya,
10“Mo lako ka tukuna vei Tevita ni'u sa solia vua e tolu na digidigi. Au na vakayacora ga na ka e sa digitaka o koya.”
11A sa lako yani vei Tevita o Kata, ka la'ki tukuna vua na ka sa kaya vua o Jiova, ka taroga, “E vei o sa digitaka?
12Me ia na dausiga me yabaki tolu? Se, me vula tolu taucoko na nomu dro tiko mai na nodra mataivalu na kemu meca? Se, me siga tolu na kena kani iko tiko na i seleiwau i Jiova ka tala yani na mate ca ki na nomu vanua, ni sa taurivaka na nona agilosi me vakatubu mate ena veiyasana e Isireli? Na i sau ni taro cava li me'u na la'ki tukuna tale vei Jiova?”
13A sauma lesu vei Kata o Tevita, “Au sa tu oqo ena dua na vanua dredre sara! Ia au sa sega ga ni vinakata me'u cudruvi mai vei ira na tamata. Me qai cudruvi au ga vakataki koya o Jiova, ni sa levu na nona loloma.”
14A sa tala yani e dua na mate ca o Jiova vei ira na Isireli, ka ra mate kina e lewe 70,000 na tamata.
15A sa qai tala na Kalou e dua na agilosi ki Jerusalemi me la'ki vakarusa, ia a qai veisautaka na lomana ka tukuna vua na agilosi, “Kua! Sa rauta oqori!” A sa tucake volekata tu na rara ni samu witi nei Arauna na Jepusaiti o koya na agilosi.
16A tacake o Tevita ka raica na agilosi ni sa tu ena maliwa ni vuravura kei lomalagi, ka taura tu e ligana na nona i seleiwau, ni sa vakarau vakarusai Jerusalemi. A qai cuva sobu e ra o Tevita kei ira na nona qase, ni ra sa vakaisulu taga taucoko tu, ka sa tara qele na matadra.
17A sa masu o Tevita, ka kaya, “Oi kemuni na Kalou, sai au ga o koya sa caka cala. Sa i au ga o koya sa vakarota me ia na wili lewenivanua. Na cala cava beka era sa cakava na tamata vakaloloma oqo? I Jiova, na noqu Kalou, mo ni cudruvi au ga kei na noqu vuvale, ka me ra vakabulai ga na nomuni tamata.”
18Sa qai vosa vei Kata na agilosi i Jiova me vakaroti Tevita me lako ka tara e dua na i cabocabonisoro vei Jiova ena vanua ni samu witi nei Arauna.
19A sa muria o Tevita na i vakaro i Jiova ka mani lako yani, me vaka sa tukuna vua o Kata.
20E ratou a samu witi tiko o Arauna kei iratou na luvena tagane e lewe va. Ia ena gauna e ratou a raica kina na agilosi, e ratou a cici yani ka la'ki vuni.
21Ena gauna ga e raica kina o Arauna ni sa lako voleka yani vua o Tevita na tui, a qai biuta na rara ni samu witi ka cuva sobu ki ra, ka sa tara qele na matana.
22A qai kaya o Tevita vei Arauna, “Solia mai vei au na nomu vanua ni samu witi me'u volia, ka me'u cakava kina na i cabocabonisoro vei Jiova, me tarova na mate ca oqo. Au na solia vei iko na kena i sau taucoko sara.”
23A sa tukuna o Arauna, “Kemuni na Tui, mo ni taura saka ga me nomuni. Ni vakayacora ga na ka e sa lomamuni. Oqo eso na bulumakau ka'u sa solia me i soro kama, kei na vava rabaraba ni samu witi me kena buka, kei na witi me i madrali laukana. Au sa solia kece oqo vei kemuni.”
24Ia sa sauma vakaoqo na tui, “E sega, au na volia ga ena kena i sau taucoko sara. Au na sega ni la'ki cabora me i soro kama vei Jiova e dua na ka sa nomu, e dua na ka sa sega ni'u volia vakailavo.”
25A sa sauma o Tevita vei Arauna e 600 na i lavo koula me i voli ni vanua o ya.
26A sa tara e kea o Tevita e dua na i cabocabonisoro vei Jiova, ka vakacabori kina na i soro kama eso kei na i soro ni veivinakati. A sa masu, ka sa sauma mai o Jiova ni sa tala sobu mai na bukawaqa mai lomalagi me vakama na i soro kama ena dela ni cabocabonisoro kama.
27A sa vakarota vua na agilosi o Jiova me daramaka lesu tale na nona i seleiwau ki na kena taga, a sa muria na agilosi.
28A vakadinata mai na ka oqo o Tevita ni sa donu vei Jiova na nona masu, ka sa ia kina na vakacaboisoro kama ena i cabocabonisoro ka tiko ena vanua ni samu witi nei Arauna.
29Ena gauna o ya, e sa tiko ga kina ena vanua ni sokalou mai Kipioni na Valelaca tabu i Jiova ka cakava o Mosese ena vanua dravuisiga, ka vakakina na i cabocabonisoro e dau vakamai kina na i soro kama;
30ia sa sega ni rawa vei Tevita me la'ki sokalou e kea, baleta ni sa rerevaka tiko na i seleiwau ni agilosi i Jiova.
Who We AreWhat We EelieveWhat We Do
2025 by iamachristian.org,Inc All rights reserved.
