Tobita 10 - Vakavakadewa Vou kei na iVola tale eso（FNVDC12）

Erau nuiqawaqawa o Tobita kei Ana

1Ia o Tobita na tamana sa wili siga tiko mai. Ni sa yacova na kena iloku rau se bera ga yani,

2a kaya, “De sa tao? Se sa mate beka o Qavaele, qai sega ni dua me solia vua na ilavo?”

3Sa lomaleqa vakalevu.

4Sa tukuna vua o watina, “Au kila ni sa mate dina na luvequ, sa rui yali dede.” Sa qai lolositaki koya, a kaya,

5“Isa luvequ, na levu ni noqu rarawa niu a laivi iko mo lako, noqu isakisaki.”

6Ia a kaya o Tobita, “Galu mada, kua ni taqaya; e bula vinaka tiko. Dua beka na ka sa vakaberai rau. Nona itokani e tamata nuitaki, e wekadatou sara mada ga. Kua ni yalolailai watiqu, sa voleka mai.”

7A sauma yani, “Galu mada, kua ni lasutaki yau tiko; sa mate na luvequ.” Sa qai dau lako e veisiga i na gaunisala rau a biubiu kina. E sega ni vakabauta tale e dua, me raica ga e matana. Dromu ga na siga sa suka tale i vale, mai yadra tagitagi yani me yacova na mataka; a lolo e na siga, e na bogi a sega ni cegu na lolositaki luvena o Tobia.

Biubiu mai Ekevatana

Ni sa oti na siga tinikava ni soqo ni vakamau a bubuluitaka o Rakueli me na tiko mai kina e kea, sa kaya o Tobia vei Rakueli, “Vakasukai yau, ni sa oti nodrau vakanuinui o tamaqu kei tinaqu nirau na raici yau tale. Au sa tukuna oti na malumalumu nei tamaqu e na noqu biuti koya.”

8Ia a kaya nona momo, “Daru tiko mada, au na tala mata vei tamamu me tukuna vua seo vakacava tiko.”

9A sauma o Tobia, “Sega, vakasukai yau vei tamaqu.”

10Sa qai tu o Rakueli, solia vua na watina o Sera kei na veimama ni nona iyau: na bobula, na bulumakau, na sipi, na asa, na kameli, na isulu, na ilavo kei na iyaya ni vale.

11Ni sa vakalougatataki rau, sa qai talaci rau a kaya, “Mo bula balavu luvequ, cagidonu na ilakolako! Me lomani iko na Turaga mai lomalagi, kei Sera na watimu. Meu raici iratou mada na luvemudrau niu se bula tiko.”

12A kaya tale ga vei luvena, “Lako sara i na vale ni vakawati. O rau na vugomu rau sa nomu itubutubu. Meu dau rogoca tu ga na kemu itukutuku vinaka.” Sa qai reguci koya. Qai kaya o Etenā vei Tobia, “Na Turaga ni lomalagi me vakalesui iko bula na wekaqu lomani, qai solia meu raici ira na luvemudrau kei Sera na luvequ. E mata ni Turaga au sa tataunaki luvequ vei iko; mo kua ni vakararawataki koya. Me cagidonu na ilakolako. Me tekivu nikua, sa watimu o Sera, o yau na tinamu. Meda bula marau mada ga me yacova na mate.” Sa qai reguci rau o Etenā, ratou sa veitalatala e na marau.