Same 104 - Vakavakadewa Vou kei na iVola tale eso（FNVDC12）

Na Kalou Dauveibuli ka Dauveivakarautaki

1Mo vakacaucautaki Jiova na yaloqu!

Kemuni Jiova na noqu Kalou, o ni sa cecere sara!

O ni sa vakaisulu ena lagilagi kei na veika vakaturaga.

2O ni sa vakaisulutaki kemuni ena rarama me vaka na i sulu.

O ni sa tevuka yani na lomalagi me vaka e dua na valelaca.

3O ni sa tara na nomuni i tikotiko ena dela ni wai ena maliwa lala.

O ni sa vakayagataka na o me nomuni kareti

Ka lako voli ena taba ni cagi.

4O ni sa cakava na cagi me nomuni dau kau i tukutuku

Kei na tibi ni livaliva me nomuni talai.

5O ni sa vakataudeitaka na vuravura ena kena yavu,

Ka sa na sega ni yavalati rawa.

6O ni sa ubia ena wasawasa me vaka ena i sulu,

Ka sa ubia na veiulunivanua na wai.

7Ia, o ni sa vunauca na wai, era sa dro tani yani;

Ni ra sa rogoca na domo ni nomuni vakaro

era sa lako vakatotolo tani yani.

8Era sa drodro sobu mai na veidelana ki na veibuca

Na vanua o ni a cakava me nodra;

9O ni sa cakava e dua na i yalayala era na sega ni rawa ni sivita,

Me tarova na nodra ubia tale na vuravura.

10O ni sa cakava na mata ni wai me tovure ena veibuca

Kei na uciwai me ra drodro ena maliwa ni veidelana,

11Era sa gunu kina na veimanumanu kila;

Ka sa oti kina na nodra karamaca na asa kila.

12Era sa tara na nodra sova na manumanu vuka

Ka ra laga sere ena veikau volekata.

13O ni sa vakatauca mai na uca mai lomalagi ki na veiulunivanua,

Ka sa sinai na vuravura ena nomuni veivakalougatataki.

14O ni sa vakatubura na co me kedra na bulumakau,

Kei na kau eso me yaga vua na tamata,

Me tea kina na kena kakana,

15Ka cakava na waini me vakamarautaki kina,

Kei na waini me lumisa kina na matana,

Kei na madrai me solia vua na kaukauwa.

16Sa tau e levu sara na uca ki na veisitari mai Lepanoni,

Na kau nei Jiova, sa tea o koya.

17Era sa tara mai kea na nodra sova na manumanu vuka,

Ka ra cakava na nodra i tikotiko na belo ena veidamanu.

18Era sa tiko voli na me kila ena veiulunivanua cecere

Ka ra vuni voli na koli ena veiqara vatu.

19O ni sa bulia na vula me vakatakilakilataka na gauna,

Ka sa kila na matanisiga na gauna me dromu kina.

20O ni sa cakava na bogi ena kena buto era sa veilakoyaki

Kece mai kina na manumanu kila.

21Era sa tagi na luve ni laione ni ra vakasasa voli;

Ni ra vaqara na kakana e solia vei ira na Kalou.

22Ia, ni sa cabe cake na siga era sa lesu tale

Ka la'ki davo tale ena dui nodra qara.

23Era sa qai lako yani na tamata me ra cakava na nodra cakacaka,

Ka cakacaka tiko me yacova sara na yakavi.

24I Jiova, sa levu sara na ka o ni sa bulia!

Era sa caka vakavuku kecega;

Sa sinai na vuravura ena veika o ni sa bulia.

25Sa tu kina na wasawasa levu ka raraba!

Ka ra tu kina na veika buli e sega ni wili rawa,

Na veika lelevu kei na veika lalai.

26Sa veisokoyaki kina na waqa,

ka qito voli talega kina o Livaiacani

Na manumanu vakaitamera ni wasawasa o ni a bulia.

27Era sa vakararavi na veika kece vei kemuni,

Mo ni solia vei ira na kakana, ni ra sa viakana.

28O ni sa solia vei ira era sa qai kania,

O ni sa solia na kakana ka ra sa mamau kina.

29Ni o ni sa gole tani era sa rere;

Ni o ni sa tarova na nodra i cegu era sa mate

Ka suka tale ki na qele era a buli mai kina.

30Ia ni o sa solia vei ira na i cegu era sa bula;

O ni sa solia na bula vou ki na vuravura.

31Me tudei tu ga na lagilagi i Jiova ka sega ni mudu!

Me marautaka o Jiova na veika sa bulia!

32A sa raica na vuravura, ka sa sautaninini;

Sa tara na veiulunivanua o koya ka sa kubou mai.

33Au na laga sere vei Jiova ena noqu gauna ni bula taucoko.

Au na laga sere ni vakacaucautaka na noqu Kalou

ena gauna kecega au na bula kina.

34Me na taleitaka o koya na noqu sere,

Ena vuku ni noqu sa dau rekitaki Jiova.

35Me ra vakarusai na i valavala ca e vuravura,

Me ra qeyavu sara vakadua na tamata ca!

Mo vakacaucautaki Jiova, na yaloqu!

Me vakacaucautaki ga o Jiova!