Jope 37 - Vakavakadewa Vou kei na iVola tale eso（FNVDC12）

1Sa vakavuna na cagilaba me tatatukituki vakaukauwa na utoqu.

2Dou vakarorogo mada, oi kemudou kece, ki na domo ni Kalou;

Ki na kurukuru ka lako tiko mai gusuna.

3Sa vakatatibitaka vakababa na livaliva e loma ni macawa o koya;

Mai na i yalayala kei vuravura e dua ki na kena ka dua.

4Sa qai rogo mai na vadugu ni domona,

Na rorogo vakaturaga ni kurukuru,

Ia, ena gauna taucoko oqori,

A veitibiyaki tikoga kina na livaliva.

5Ena i vakaro ni Kalou,

A qai yaco na veika vakurabui,

Na veika taleitaki sa dredre me da kila rawa.

6Sa vakarota na uca cevata o koya

Me mimiri sobu mai ki vuravura,

Ka vakatauca talega mai na uca tau bi.

7E muduka o koya na nodra cakacaka na tamata;

E cakava vakakina;

Sa vakaraitaka vei ira

Ni sai koya sara ga ka cakacaka tiko.

8Era sa qai curu na manumanu kila

Ki na nodra qara me ra la'ki tiko kina vakadua.

9Sa qai liwa mai na cagilaba mai na mata ni ceva,

Kei na cagi liliwa levu mai na vualiku.

10Sa vakabatabatataka na wai na i cegu ni Kalou,

Ka vukica me wai cevata.

11Sa tatibi na livaliva mai na veio,

12na veio era veiciriyaki wavoki tu

Ka talai rawarawa ki na lewa ni Kalou.

Era cakava na veika kecega e vakarota na Kalou,

Ena veivanua kecega e vuravura taucoko.

13Sa tala mai na Kalou na uca

Me mai vakasuasuataka na vuravura;

E rairai ni a tala mai na uca o koya

Me totogitaki ira kina na tamata,

Se me vakaraitaka kina vei ira na nona veitotaki.

14Bau cegu vakalekaleka wale mada, Jope, ka vakarorogo;

Vakasamataka mada na veika e veivakurabuitaki ka dau cakava na Kalou.

15O bau kila beka ni solia ga e dua na i vakaro na Kalou

Ka tatibi sara na livaliva mai na veio?

16O kila li se ra dauciri tu vakaevei na veio e macawa,

Na cakacaka maqosa ni liga ni Kalou?

17E sega sara ga,

Ka ni o sa kila wale ga na nomu vosota na katakata,

Ni sa lauqa na vanua ena cagi mai na ceva.

18E rawa beka ni o vukea na Kalou

Ena nona birika cake na macawa

Ka vakaukauwataka

Me vaka na kaukauwa ni kaukamea dina?

19Vakavulica mada vei keitou na ka me keitou tukuna vua na Kalou;

Sa lala na neitou vakasama;

Sa sega na ka me keitou tukuna.

20Au sa na sega ni kerea na Kalou me laivi au me'u vosa;

Me i cavai me'u vakalaivi koya kina me vakarusai au?

21Ia oqo, e sa rui ramase sara ga na rarama mai macawa,

Ia sa remoremo vakaca kina na matadatou;

Ka sa taviraka na cagi na macawa me savasava vinaka sara.

22Sa laurai toka mai na vualiku e dua na mata ni rarama koula,

Ka sa vakasinaiti kedatou ena rere na lagilagi ni Kalou.

23Sa rui levu na kaukauwa ni Kalou

Ka sa sega ni rawa me tou toro voleka vua;

Ia sa dodonu ga ka savasava

Na nona vakataulewa vei keda.

24Sa rauta kina me ra qoroi koya ena vakarokoroko

Na tamata kecega;

Io, sa sega talega ni dau golevi ira na tamata

Era sa dau viavia vuku.