Jeremaia 8 - Vakavakadewa Vou kei na iVola tale eso（FNVDC12）

1Ena gauna o ya, sa kaya o Jiova, ena kau mai na suidra na tui kei na suidra na turaga e Juta, ka vakakina na suidra na bete, na suidra na parofita, vata kei na suidra na lewe i Jerusalemi mai na nodra i bulubulu.

2Era na mai tuvalaki tu me cilava na matanisiga, na vula, kei na veikalokalo era a dau lomana ka qarava. Era na sega ni kumuni vata se bulu tale, ia era na vaka na benu ena dela ni qele.

3Sa dodonu me ra taleitaka cake vakalevu na mate mai na bula o ira kece sara na vo-ni-bula era lewe ni vuvale ca oqo ena veivanua kece ka'u a dui biuti ira kina,” a sa kaya o Jiova ni lewevuqa.

Na i Valavala Ca kei na Kena i Totogi

4Jeremaia, tukuna vei ira na noqu tamata, Oqo na veika e tukuna o Jiova. Kevaka era sa bale na tamata, era na sega li ni tucake tale? Kevaka e dua sa gole tani, ena sega beka ni rawa ni lesu tale mai?

5Kemuni na noqu tamata, a cava o ni sa gole tani kina; a cava o ni sa gole tani kina vakawasoma mai vei au? O ni sa taura matua na nomuni matakau, ka bese ni lesu mai vei au.

6Au a vakarorogo vinaka sara, ia o ni sega ni tukuna na ka dina. E sega ni bau dua vei kemuni e veivutunitaka na nona ca; e sega ni bau dua e taroga, A cava beka na cala au cakava? Era dui lako na tamata yadua ena nona sala me vaka e dua na ose sa cici ki na i valu.

7Na belo sara mada ga ni maliwa lala e kila na gauna me lesu kina; na ruve, na belo loa kei na kakabace era kila na gauna ni nodra lako. Ia o ira na noqu tamata, era sega ni kila na i vakaro i Jiova na Turaga.

8O ni kaya rawa vakacava, ‘Keimami sa vuku ka sa tu vei keimami na i vakaro i Jiova’? Ni raica, sa veisautaki na i vakaro ena nodra mata ni peni na vunivola dauveivakaisini.

9Era sa vakamaduataki na nomuni tamata vuku; era sa veilecayaki ka tacori. Era sa biuta na noqu vosa, ia oqo, na vuku cava sa qai tu vei ira?

10O koya oqo au na solia kina na watidra vei ira na tani kei na nodra vanua vei ira eso me ra taukena. Na tamata kece sara, o ira na cecere kei ira na lolovira era sa via rawa i lavo ena sala veivakaisini. O ira sara mada ga na parofita kei na bete, era sa veivakaisini kecega.

11Era sa sega ni kauwaitaka na mavoa ni lomadra na noqu tamata, era kaya, ‘Sa yaco na vakacegu, sa yaco na vakacegu,’ ia e sega ga ni kune na vakacegu.

12Kemuni na noqu tamata, o ni a sega ni o ni a vakayacora na i valavala vakasisila? Sega, o ni a sega sara ni bau madua vakalailai, o ni sega ni bau vakarisevacu, O koya oqo o ni na bale vata kina kei ira era sa bale; ena gauna au na totogitaki kemuni kina, o ni sa na qeavu vakadua,” sa kaya o Jiova na Turaga.

13Au na vakarusai ira vakadua na noqu tamata. Era na vaka na vunivaini sa sega kina na qerepi, e vaka e dua na lolo sega ni vua; na drauna mada ga sa malai tu. O koya oqo au na solia kina vei ira na veika eso sa kitaka.”

14A cava e da sa dabe vakadua kina? Ni lako mai me da mai cici ki na veikoro vakabai ka mate mai kea. Sa vakararawataki keda o Jiova me da mate, sa solia vei keda na wai gaga me da gunuva baleta ni da sai valavala ca vua.

15Eda nuitaka na sautu, ia sa sega ni yaco mai e dua na ka vinaka; me dua na gauna ni veivakabulai, ia sa kena i sosomi na rere.

16Sa rogoci mai Tani na suru ni nodra mataivalu ose. Ena vadugu ni suru ni mataivalu ose oqo, sa uneune kina na vanua taucoko. Era sa lako mai me ra vakarusa na noda vanua kei na ka kece sa tu kina, na noda koro kei ira kece era tiko kina.

17Ni qarauna! Au sa talai ira yani na gata vei kemuni, na gata bati gaga ena sega ni rawa ni vakayalovinakataki, ka ra na kati kemuni,” sa kaya o Jiova.

Na Rarawa i Jeremaia e Vukudra na Wekana

18Sa sega ni vakacegui rawa

Na noqu rarawa;

Sa tauvi mate na yaloqu.

19Rogoca na nodra tagi

Na noqu tamata

Sa rogo ena loma ni vanua taucoko

“Sa sega dina ni tiko mai Saioni o Jiova?

Sa sega ni tiko dina mai Saioni na kena tui?

A cava era sa vakacudrui au kina

Ena nodra matakau,

Kei na nodra matakau tawa yaga

Na kai tani?

20Sa sivi na gauna ni tatamusuki,

Sa oti na vula i katakata,

Ia e da sa bera ga ni vakabulai.”

21Sa mavoa na yaloqu

Ena vuku ni mavoa ni yalodra

Na noqu tamata;

Au tagi,

Ka sa vesuki au na rere,

A cava sa sega kina ni ia.

Na veivakabulai o Jiova?

A cava na vuna

E sega ni vakayacora kina

E dua na ka?

22Sa sega li

Na wai ni mate mai Kiliati?

Sa sega beka

Na vuniwai mai kea?

A cava era sega ni vakabulai kina

Na kai noqu?