Vosavakaibalebale 23 - Vakavakadewa Vou kei na iVola tale eso（FNVDC12）

Na i Kaono ni Vosa ni Vuku

1Ni o dabe mo kana vata kei na dua na turaga, mo nanuma matua se o cei o koya.

2Kevaka o tamata kana levu, tovolea mo tarovi iko.

3Kakua ni kocova na kakana vinaka e vakarautaka; de rairai vinakata me coriti iko.

Na Kena i Kavitu

4Mo yalomatua ka kakua ni vakaocai iko wale ga ena nomu saga na vutuniyau.

5Sa na rawa me takali yani vakasauri na nomu i lavo, me vaka era sa vakatabana ka vuka tani yani me vaka na ikeli.

Na Kena i Kawalu

6Kakua ni la'ki kana ena nona teveli na tamata buroburogo, se kocova na kakana vinaka sa vakarautaka o koya.

7Ena kaya beka vei iko, Mai, mo kana sara vakalevu, ia e sega ga ni vosa ena yalona dina. Na nona i vakarau ena vakavuna mo tauvi mate kina,

8o na luaraka tale na ka o sa kania ka na maumau wale na nomu vosa vinaka.

Na Kena i Kaciwa

9Kakua ni vosa vakayalomatua vua e dua na yalowai; ena sega ni taleitaka o koya.

Na i Katini ni Vosa ni Vuku

10Kakua sara ni tosoya e dua na i yalayala ni vanua makawa se taura na vanua era sa taukena na luveniyali.

11Sa nodra dauveitaqomaki qaqa o Jiova, ka na valataka na ka e baleti ira me saqati iko.

Na Kena i Katinikadua

12Vakarorogo vinaka vua na nomu qasenivuli ka vulica na veika kece o rawa ni vulica.

Na Kena i Katinikarua

13Kakua ni lokuyara ni vakanakuitataka na gone. Era na sega ni mate ena i kuita.

14Na kena dina oqo, ni o na vakabula kina na yalodra mai eli.

Na Kena i Katinikatolu

15Na luvequ, kevaka o na yaco mo tamata yalomatua, ena reki kina na yaloqu.

16Au na cibi ni'u rogoca ni o vosataka na veivosa yalomatua.

Na Kena i Katinikava

17Kakua ni vuvutaki ira na tamata i valavala ca; ia mo rerevaki Jiova tikoga ena veisiga kece.

18Kevaka e vakakina, sa na dua na gauna uasivi na nomu gauna mai muri.

Na Kena i Katinikalima

19Vakarorogo mada na luvequ, ka mo vuku, ka vakasamataka sara vaka yalomatua na nomu i vakarau.

20Kakua ni vakailala vata kei ira era dau gunuva na waini kei ira era dau taleitaka na kana lewe ni manumanu,

21E rau sa dau veivakadravudravuataki na daumateni kei na daukana. Kevaka e sega na ka o cakava mo kana ga ka moce, o na vakaisulu ena i sulu kakadresudresu.

Na Kena i Katinikaono

22Vakarorogo vua na tamamu, kevaka a sega o koya o a sega ni bula. Ni sa qase mai o tinamu mo vakaraitaka vua na nomu vakavinavinaka.

23Volia na dina ka kakua ni volitaka. Volia na vuku, na i vakavuvuli kei na yalomatua.

24Sa rauta me marau na tamana na tamata yalododonu. O koya e dua na luvena tagane vuku ena marautaki koya.

25Laiva me rau marautaki iko o tamamu kei tinamu; solia vei tinamu na marau o ya.

Na Kena i Katinikavitu

26Vakarorogo vinaka sara na luvequ, ka muria na noqu i vakarau.

27Sa rerevaki na yalewa dautagane kei na yalewa i vakarau vakasisila.

28Era sa waraki iko me vaka na daubutako ka vakavuna me ra sega ni yalodina vei watidra e vuqa na tagane.

Na Kena i Katinikawalu

29O cei e nona na vakaloloma? O cei e nona na rarawa? O cei sa veivala? O cei sa vosa kudrukudru? O cei sa mavoa tu vakasakasaka? O cei sa damudamu tu na matana?

30O ira ga era sa gunu waini tiko vakabalavu, kei ira era sa gunuva na waini sa veiwaki.

31Me kakua ni temaki iko na damudamu ni waini e rawa ni o raica kina na kemu i yaloyalo, ka malumu ni tilomi sobu.

32E muri sa kata me vaka na gata, ka gaga me vaka na gaga ni gata bati gaga.

33Na matamu ena raica na veika veivakurabuitaki; o na sega ni rawa ni vakasama, ka sega ni matata na veika o vosataka.

34O na vaka e dua sa davo koto ena dela ni wasawasa, ka loloa tu, ka tauwalili me vaka na dali ni waqa sa suaigelegele.

35O na kaya, Era a vacuki au, ia ka'u a sega ni mavoa; era a mokuti au, ia ka'u a sega ni vakila. Me'u na qai yadra li ni naica? Au sa vinakata tale e dua na gunu.