Udite 4 - Vakavakadewa Vou kei na iVola tale eso（FNVDC12）

Na ituvatuva ni tataqomaki nei Isireli

1Era sa qai rogoca na kai Isireli e Jutia na veika sa cakava o Oloferenesi, na vunivalu nei Nepukanesa Tui Asiria, vei ira na veimatanitu, na nona sa yanaraka qai vaqeyavutaka kece nodra valenisoro;

2era sa domobula gona ni sa toro yani, era lomaleqataki Jerusalemi vakalevu kei na vale tabu ni Turaga na nodra Kalou,

3nira se qai lesu wale ga mai na tiko vakabobula, ra se qai soqoni vata na kai Jutia, se qai vakatabui tale na iyaya tabu, na yaletare kei na valenisoro a veitaliataki.

4Era mani tala mata i na veiyasai Samaria, i Kona, Becoroni, Belemaini, Jeriko, Jova, Aisora kei na buca o Salemi;

5era kovea sara na veiulunivanua, viribaita na kena veikoro, cokocokonaki me baleta na ivalu - ni se qai musu oti ga na witi.

6Sa qai volavola o Joakimi na bete levu a tiko voli mai Jerusalemi vei ira na kai Beculia kei Betomesecaimi donumaki Esidrailoni mai na tai ni buca volekati Docani,

7mera tawana qai yadrava na icabecabe i colo, ni sala ga ya e rawa nira muria na meca mera kabai Jutia, ia e rawarawa na tarova e dua e via muri kina, ni kena raba e rauta ga e le rua.

8Era mani muria na kai Isireli na nodra lewa na bete levu o Joakimi kei na seneti ni yavusa kece i Isireli era bose tiko mai Jerusalemi.

Masu ni bera na ivalu

9Era mani tagi lagalaga vua na Kalou na kai Isireli, ra lolo vakalevu mera vakamalumalumu.

10Jona 3.7,8; Esi 4.1-3O ira kei na watidra, na luvedra, nodra bulumakau, o ira kece na tiko vakararavi, na tamata cakacaka kei na bobula - era vakaisulu taqarotu kece.

11O ira kece na tagane kei na yalewa kei na luvedra era tiko e Jerusalemi, era vakatobuicu e mata ni valenisoro, boro dravusa na uludra, qai tevuka nodra isulu taqarotu e mata ni Turaga.

12Era bau kovuta na yaletare e na isulu taqarotu, era kaci vata mera masuta na Kalou ni Isireli me kua ni laiva mera vesu na luvedra, se mera itokinivalu na watidra, se me vaqeyavutaki nodra yavutu, se me veitaliataki na vale tabu mera cibitaka vaqaciqacia na kaitani.

13Esi 4.16Sa rogoca na nodra masu na Turaga, sa raica nodra rarawa, nira lolo siga vica vata na lewe i Jutia taucoko kei Jerusalemi e na mata ni valetabu ni Turaga sau.

14Joeli 2.17O Joakimi na bete levu kei ira na bete era duri e mata ni Turaga mera qaravi koya, era vakamalo e na isulu taqarotu, e sega ni mudu nodra cabo isorokama kei na soli yalataki kei na cau ni lewenivanua.

15E boro dravusa tu na nodra isala, era kaci e na nodra igu taucoko vua na Turaga me raica e na mataloloma na yavusa taucoko i Isireli.