Siraki 7 - Vakavakadewa Vou kei na iVola tale eso（FNVDC12）

iVakasala tale e so

1Kua ni cakava na ca, e sega na ca e na yacovi iko.

2Vakanadakuya na ca, e na qai vakanadakui iko.

3Na luvequ, kua ni teya na lewa tawadodonu, o na qai sega ni tauca vakavitu na vuana.

4Kua ni kere itutu cecere vua na Turaga, se idabedabe vakaturaga vua na tui.

5Kua ni suguraka nomu vinaka e mata ni Turaga, se vakaraitaka nomu yalomatua e mata ni tui.

6Kua ni via turaganilewa, deo qai sega ni rawa ni kauta tani na lewa tawadodonu, seo totaka e dua e vakaicaqe, qai vakaseva kina na nomu dokai.

7Kua ni cala vei ira na lewenivanua, kua ni vakamaduataki iko e matadra.

8Kua ni vakaruataka na cala; o na totogitaki keo mani cala mada ga vakadua.

9Kua ni kaya, “E na raica na levu ni noqu soli; niu vakacabo isoro vua na Kalou Cecere, e na ciqoma.”

10Kua ni yalolailai na masu, se weletaka mo dodoliga.

11Kua ni vakalialia e dua sa gaga na lomana, ni Dua ga e nona na veivakasivoi kei na veivakacerecerei.

12Kua ni bukiveretaki tacimu se nomu itokani.

13Mo bese ni lasu, ni lasulasu e sega na betena.

14Kua ni tali magimagi nira bose na qase, se taleva vakavica nomu masu.

15Kua ni cata na cakacaka dredre se na teitei, ni a bulia na Cecere Sara.

16Kua ni lala vata kei ira na dau valavalaca; nanuma ni sega ni bera na cudru ni Kalou.

17Mo dau maloku vakalevu; na kedra itotogi na sega ni kila na Kalou na buka kei na bacaniqele.

Noda veimaliwai

18Kua ni volitaka nomu itau e na ilavo, se na tacimu e na koula ni Ofia.

19Kua ni besetaka me watimu na yalewa yalomatua qai vinaka, ni nona rakorako e sau lailai na koula.

20Kua ni vakacacana na dauveiqaravi gugumatua, se na daucakacaka saumi e yalodina vei iko.

21 Lako 21.2; Vrua 15.12-15 Mo lomana na dauveiqaravi vuku me vaka nomu lomani iko, kua ni bureitaka nona galala.

22O vakabulumakau? Qarava vinaka. Keo vakailavo kina, maroroya.

23O vakaluveni? Tuberi iratou vinaka; meratou vakarorogo, tekivu niratou se gone.

24O vakaluveni yalewa? Mo kauaitaka nodratou tiko savasava, kua ni vakamenemenei iratou vakasivia.

25Mo solia na luvemu yalewa me vakawati, o sa vakacavara kina e dua na itavi levu. Ia mo solia vua e dua e yalomatua.

26Kevaka e donu vei iko na watimu, kua ni cemuria; keo sevaka, kua ni soli iko vua.

27 Lako 20.12 Rokovi tamamu e yalomu taucoko, nanuma dei na mosi ni taratara nei tinamu.

28Nanuma tiko nirau solia nomu bula na nomu itubutubu; o na dolea vakacava?

29Doka na Turaga e yalomu taucoko, rokovi ira na nona bete.

30Lomana na Dauveibuli e na nomu igu taucoko, kua ni vakanadakui ira nona dauveiqaravi.

31Doka na Kalou, rokova na bete, solia vua na kena ivotavota e lavaki vei iko:

na isevu ni qele, na isoro ni kere veivosoti, na isoro taba ni manumanu, na isoro ni veivakasavasavataki, kei na isevu tabu tale e so.

32Dodo liga vei ira na dravudravua mo kalougata kina vakaoti.

33Mo lomasavu vei ira kece na bula, lomani ira na sa mate.

34Mo lolosi vata kei ira na tagi, rarawa vata kei ira na vakaloloku.

35Kua ni levea na sikova na tauvimate, ni itovo qori o na lomani kina.

36E na veika kece o cakava, nanuma tiko na itinitini ni nomu bula, o na qai sega kina ni valavalaca.