1 Veigauna 18 - Vakavakadewa Vou kei na iVola tale eso（FNVDC12）

Na Qaqa Vakaivalu i Tevita(2Samu 8.1-18)

1Ena dua na gauna e muri, a valuti ira tale na kai Filisitia o Tevita na tui, ka vakadrukai ira. A sa taura tani mai vei ira na veiliutaki ena koro o Kaca kei na veikoro e wavolita.

2A vakadrukai ira talega na kai Moapi o koya, era sa mani qali kina e rukuna, ka ra sauma vua na i vakacavacava.

3A tarava oqo na nona valuti Etareseri na tui Sopa o Tevita, ka yacova na vanua o Emaci, ka vuna oqo ni a tovolea tiko o Etareseri me lewa na vanua e muria na muana i cake ni uciwai na Uferetisi.

4A sa vesuka o Tevita e 1,000 na nona qiqinivalu, e 7,000 na nona lewe ni mataivalu vodo ose, ka 20,000 na nona lewe ni mataivalu ni vanua. A sa maroroya ga o Tevita eso na ose me rauta e 100 na qiqinivalu, ka vakaleqai ira na kena vo.

5Ni sa lako mai na nodra mataivalu na kai Siria mai Tamasiko me ra la'ki vukei Etareseri na tui, a valuti ira lesu o Tevita ka vakamatea e lewe 22,000 na tamata.

6Sa qai vakatikora o Tevita eso na veiliutaki vakaivalu mai Siria, ka tauri ira na kai Siria me ra qali vua, ka ra sauma vua na i vakacavacava. A sa solia o Jiova na qaqa vei Tevita ena veivanua kecega.

7A sa taura me vaka na i tokinivalu o Tevita na veisasabai koula ka ra a colata na tamata nei Etareseri, ka kauta yani ki Jerusalemi.

8A taura talega mai e dua na i kumukumuni parasa levu mai na koro o Tipaci kei Kuni, e rua na koro sa lewai e ruku i Etareseri. (A sa qai vakayagataka na parasa oqo o Solomoni ena dua na gauna ki muri me bulia kina na taqe levu, na duru parasa, kei na veiyaya parasa me vakayagataki ena Valenisoro.)

9Ia ni rogoca o Tou na Tui Emaci ni sa vakadruka na veimataivalu taucoko i Etareseri o Tevita,

10a sa talai Jorami na luvena tagane vei Tevita na tui me kidavaki koya, ka vakavinavinaka vua na nona rawata na qaqa vei Etareseri, me vaka ni ra a dauvala vata vakavuqa kei Tou. A kauta o Jorami vei Tevita na i loloma eso ka buli ena koula, ena siliva, kei na parasa.

11A sa vakatabuya o Tevita na veika kece oqori ka me vakayagataki ena sokalou, ka okati vata kina na siliva kei na koula sa kauta voli mai na veimatanitu sa vakadruka oti vakaivalu ka okati kina o Itomi, o Moapi, o Amoni, o Filisitia, kei Amaleki.

12O Apisai, ka tinana o Seruwaia, a sa vakadrukai ira na kai Itomi ena Buca ni Masima, ka vakamatea kina e lewe 18,000 na kai Itomi. mai Itomi, ka ra sa qali kece na tamata vei Tevita na tui. A sa solia o Jiova na qaqa vei Tevita ena veivanua kecega.

14A sa liutaka o Tevita na vanua kece o Isireli ka dau qarauna me ra qaravi vinaka ena dodonu kei na savasava o ira na nona tamata.

15O Joape na taci Apisai sa komada ni mataivalu; o Josefati na luve i Eilute tagane sa dauvola na i tukutuku vakamatanitu;

16e rau sa bete o Setoki na luve i Eitupi tagane kei Apimeleki na luve i Epaiaca tagane; sa vunivola ni veilewai o Seruwaia;

17o Penaia na luve i Jioiata tagane sa liutaki ira na sotia matayadra i Tevita; ka sa taura na i tutu lelevu ni veiqaravi ena matanitu o iratou na luvena tagane na tui o Tevita.