Same 49 - Vakavakadewa Vou kei na iVola tale eso（FNVDC12）

1Ni rogoca mada na ka oqo na tamata kecega!

Ni vakarorogo na tamata kecega ena veivanua taucoko,

2Oi kemuni na cecere kei na lolovira,

Kei kemuni talega na vutuniyau kei na dravudravua.

3Sa matata ka makare vinaka na noqu vakanananu;

Ka'u na tauca na vosa eso ni veivakayalomatuataki.

4Au na vagolea na noqu vakanananu ki na vosa vakaibalebale

Ka vakamacalataka na kedra i balebale ni'u qiria tiko na api.

5Au sa sega ni daurere ena veigauna ni leqa

Ni ra sa dau wavoliti au kina na meca,

6Se o ira na tamata era sa vakararavi ga ki na nodra i yau

Ka dokadokataka na levu ni ka era taukena.

7E sega ni dua ena rawa ni voli koya vakaikoya vakadua;

Ka sega ni rawa vua me sauma vua na Kalou na i sau ni nona bula,

8Baleta ni sa rui vakaitamera na i sau ni nona bula.

Na ka ena sauma rawa ena sega sara ni veiganiti

9Me na tarovi koya mai na nona lako ki na i bulubulu,

Me rawa ni bula tikoga ka sega ni mudu.

10 Sr 11.19 Eda sa raica rawa ni sa dau mate talega na tamata yalomatua,

Ka vakakina o ira na lialia kei na lecaika.

Era sa biuta kece tu ga mai na nodra i yau vei ira na nodra kawa.

11Na kedra i bulubulu ena nodra i tikotiko ka tawa mudu,

Era na tiko e kea ena veigauna kecega,

Ka veitalia ga ni ra a taukena tu e liu na veitiki ni qele eso.

12Na nona cecere e dua na tamata

ena sega ni rawa ni tarova na nona mate:

Ena mate yani o koya me vaka na manumanu.

13Raica na ka e yacovi ira era sa vakararavi ga vei ira,

Io, na veika ca era na sotava na dauvakararavi ki na nodra i yau.

14Era na totogi me ra mate me vaka na sipi,

Ka na qai nodra i vakatawa o Mate.

Era na qaqa ga na yalododonu vei ira ena mataka lailai,

Ka vuca yani na yagodra ena vuravura ni mate

sa yawa sara mai na nodra i tikotiko.

15Ia, na Kalou ga ena vakabulai au;

Ena taqomaki au o koya mai na kaukauwa nei mate.

16Kakua ni taqaya ni sa yaco me vutuniyau e dua;

Ni sa yaco me levu sara na nona i yau;

17Ena sega ni kauta vata kaya ni sa mate,

Ka na sega ni lako vata kei koya na nona i yau ki na i bulubulu.

18Kevaka e sa yalovakacegu ga o koya ena vuku ni nona bula

ka sa dokai ena vuku ni nona rawa ka,

19Ena muri ira ga na nona qase ki na mate,

Ena vanua sa butobuto tu ga ka sega ni mudu.

20Na nona cecere ena sega ni tarova rawa na nona mate;

Ena mate ga o koya me vakataki ira na manumanu.

Na i Soro Donu Vua na Kalou

A Same i Esava.