2 Makabe 3 - Vakavakadewa Vou kei na iVola tale eso（FNVDC12）

Nodrau veileti o Oniasi kei Saimoni

1Ni sa tawa tale na koro tabu, dede toka na bula sautu, muri vakavinaka na lawa e na vuku ni yalododonu nei Oniasi na betelevu kei na nona cata na ca,

2era sa bau lai rokova sara na koro na tui, ra vakalagilagia na valenisoro e na iloloma uasivi;

3o Seleuko mada ga na Tui Esia e solia na ilavo kece me qaravi kina na isoro.

4Rau mani veidretaka na cicivaki ni makete ni koro o Saimoni mai na mataqali i Pezamini, koya se qai lesi me iliuliu ni valenisoro, kei na betelevu;

5ni sa sega ni rawati Oniasi o Saimoni, sa mani gole vei Apolonio mai Tarisu, koya a kovana tiko mai Koelesiria kei Fonisia e na gauna ya.

6A tukutuku vua ni katoniyau ni valenisoro e Jerusalemi sa sinai vutuvutu tu e na ilavo e sega ni wiliki rawa. Na ilavo qo, e sega ni ilavo ni isoro, e rawa gona ni soli vua na tui me lewa.

Talai i Jerusalemi o Eliotoro

7Ni qai sotava na tui o Apolonio, sa vakaraitaka sara vua na ka sa tukuni vua. Sa talai Eliotoro, nona vakailesilesi liu na tui, me lai kauta mai na ilavo.

8Sa biubiu sara, kena irairai me lai sikovi ira na veikoro e Koelesiria kei Fonisia, ia nona inaki dina me lai vakayacora na lewa ni tui.

9Ni sa yaco i Jerusalemi, sa kidavaki koya e na yalovinaka na betelevu ni koro, sa qai tukuna na ka sa vakaraitaki yani kei na inaki ni nona sa yaco mai, taroga sara se dina na ka qo.

10A vakamacalataka na betelevu ni so na ilavo e maroroi tu e valenisoro e nodra na yada kei na luveniyali,

11e dua tale na ilavo e nei Irikano na luve i Tobia, turaga dokai, kena levu taucoko e 400 na taledi siliva kei na 200 na koula. Na ilavo qo a vakadewataka cala na kena itukutuku o Saimoni na tamata ca.

12A kaya na betelevu ni tabu dredre mera vakaisini o ira era nuitaka tu na valenisoro ni vanua vakatabui, rokovi, maroroi qai dokai e vuravura taucoko.

Via curu i valenisoro o Eliotoro

13A mani tukuna o Eliotoro, baleta na ivakaro ni tui, ni ilavo qo sana tauri ga me baleta na katoniyau ni tui.

14Mani lokuca e dua na siga, qai curu i loma me liutaka na dikevi ni ilavo. Era sa rarawa dina na lewenikoro taucoko.

15Era davo e mata ni yaletare na bete e na nodra isulu vakabete, ra kaci i lomalagi vei koya a tauca na lawa ni vakacuru ilavo, me taqomaka na ilavo e na vukudra na vakacuruma.

16E mosi na yaloda nida sarava na betelevu, ni laurai tu e matana kei na nona vulaci mai na rarawa ni yalona.

17Na levu ni domobula kei na ninini, sa laurai votu kina na mosi ni yalona.

18E le levu era dui biuta nodra vale mera lai vakamamasu vata, ni sa vakarau beci na vanua tabu.

19Era osota na veitolonisala na yalewa e vesu tu e tolodra na taqarotu. E so vei ira na goneyalewa tabusiga, era veicicivi i na matamata, e so i na bainikoro, e so tale era iro tu mai katubaleka.

20Era lave liga kece i lomalagi e na vakamamasu.

21Sa bau vakaciriloloma na nodra davo vakatobuicu na lewenivanua taucoko kei na nona nuiqawaqawa na betelevu e na nona yaluma vakaitamera.

Taqomaka na Turaga nona valenisoro

22Nodra se kaciva tiko na Turaga Sau me taqomaka na ka era nuitaka tu o ira na sa tataunaka ni na maroroi e na vukudra,

23sa vakayacora ga o Eliotoro na ka sa lewai.

24Ia ni sa yacova na valeniyau kei na nona matayadra, sa vakavuna sara na Turaga ni yalo kece kei na ulu ni lewa, e dua na raivotu era domobulataka sara ga kina na sau ni Kalou o ira na bau doudou mera muri koya, era koloiciba e na rere.

25Sa tu gona e matadra e dua na ose sa matalau dina na kena iukuuku, rairai vakadomobula o koya e vodoka. A cicivi Eliotoro sara mai na ose, debelaki koya e na yavana i liu; o koya e vodoka, e koula vakadua nona isulu kei nona iyaragi.

26Erau votu tale ga vua e rua na cauravou, momoqaqa, totoka vakaoti, vakaisulu uasivi, rau yadua na yasana, rau rubirubilaki koya tiko.

27Vakasauri sa caroba, solegi koya na buto, eratou laveti koya nona tamata qai vakadavori koya e na ilavelave,

28ratou kauti koya na tamata ase qai curuma wale ga yani e na valeniyau kei na nona ilala levu kei na matayadra, ia qo, sa oti sara ga vua; sa qai matata kina vei ira na sau ni Kalou.

29Ni sa davo vakatobuicu, galu tu e na cakacaka ni Kalou, sega tale na nuinui ni na bula,

30era sa vakacaucautaka na Turaga sa cakacaka mana e na vuku ni nona itikotiko. Na valenisoro a robota tu na rere kei na tiko yavavala, vakalailai ga sa sinai e na reki kei na marau, ni sa votu mai na Kalou Sau.

Masu o Oniasi me bula o Eliotoro

31Eratou sa kerei Oniasi sara e so na itokani nei Eliotoro me masuta na Cecere Sara me solia na bula vua e dua sa tu e bati ni ibulubulu.

32Sa leqataka na betelevu de na nanuma na tui nira nakicataki Eliotoro na Jiu, mani vakacabo isoro me bula.

33Se vakacabo isoro tiko na bete, erau votu tale vei Eliotoro na cauravou, rau vakaisulu vata ga,

34rau mai tu, rau kaya, “Mo vakavinavinaka vakalevu vei Oniasi na betelevu, ni vukuna ga sa solia tale kina na Kalou na nomu bula. Ni sa rubilaki iko o lomalagi, mo vakaraitaka raraba vei ira kece na tamata na sau lagilagi ni Kalou.” Rau tukuna oti ga, rau sa yali tale.

Vakacaucautaka na Kalou o Eliotoro

35Sa qai vakacabo isoro o Eliotoro vua na Turaga, qai vosa bibi ni yalayala vei nona iVakabula. Sa vakamoce oti vei Oniasi, sa tayabe tale yani kei nona mataivalu vua na tui.

36Sa qai vakadinadinataka vei ira kece na tamata na cakacaka ni Kalou cecere sa raica e matana.

37Ni tarogi Eliotoro na tui se mataqali tamata vakacava e ganita me talai tale i Jerusalemi, a kaya,

38“Ke dua na kemu meca se dua e veretaka tiko na matanitu, talai koya kina, ni na lai rubirubilaki vinaka qai lesu tale mai vei iko, ya kevaka e rawa ni dro mai, ni tiko dina e kea na sau ni Kalou.

39O koya e vakaitikotiko mai lomalagi, e yadrava tiko na vanua ya, e dau vukea, e dau mokuti ira mate na mai via vakacacana.”

40Qo na macala ni italanoa kei Eliotoro kei na taqomaki ni valeniyau.