Tiko Voli mai na Lekutu 23 - Vakavakadewa Vou kei na iVola tale eso（FNVDC12）

Na i Matai ni Tukutuku i Balami

1A sa qai kaya vei Pelaki o Balami, Mo cakava mada vei au eke e vitu na i cabocabonisoro, ka vakarautaka eke e vitu na bulumakau, ka vitu na sipi tagane.

2A sa kitaka o Pelaki me vaka na vosa i Balami; ka sa vakacabora o Pelaki kei Balami, ena i cabocabonisoro yadua, e dua na bulumakau, kei na dua na sipi tagane.

3A sa qai kaya vei Pelaki o Balami, Mo duri ena yasa ni nomu i soro kama, ia au na lako mada; de na lako mai o Jiova, me mai tavaki au; ia na ka ga sa vakatakila vei au o koya, au na tukuna vei iko. A sa lako yani o Balami ki na dua na tikina cecere sa samaki vinaka.

4A sa sota kei Balami na Kalou; ka kaya vua o Balami, “Au sa vakarautaka tu e vitu na i cabocabonisoro, ka'u sa vakacabora oti ena i cabocabonisoro yadua e dua na bulumakau kei na dua na sipi tagane.”

5Sa qai solia o Jiova vei Balami na i tukutuku me tukuna lesu vei Pelaki, ka vakatalai koya yani.

6Ia ni sa lesu vei Pelaki o Balami, ka raica, era a duri voleka tu ena nona i soro kama o ira kecega na turaga dauveiliutaki ni Moapi.

7Sa qai tekivu me tukuna na nona i tukutuku o Balami, ka vaka:

“Sa kauti au mai Siria o Pelaki na tui Moapi, mai na veiulunivanua ena tokalau:

‘Lako mai, ka rukaki ira mada na Jekope ena vukuqu;

Lako mai, ka vosavakacacani ira na Isireli!’

8Me'u na rukaka vakacava na veika e sega ni rukaka na Kalou?

Ka me'u vosavakacacana vakacava na veika e sega ni vosavakacacana na Kalou?

9Mai na dela ni veiulunivanua cecere kau sa raici ira kina;

Ka saravi ira rawa mai na veidelana.

Oqo e dua na kawa tamata era bula vakataki ira voli ga;

Ka kila ni ra matanitu kalougata vakalevu cake sara mai vei ira na kena vo.

10Na kawa i Isireli sa vaka na kuvu ni soso:

Sa dredre sara me wiliki ni ra sa rui lewe levu.

Isa me na cava na noqu bula me vaka e dua na tamata ni Kalou;

Ka me'u mate ena vakacegu me vaka na tamata yalododonu.”

11A sa kaya vei Balami o Pelaki, “Na cava o sa kitaka vei au? Au sa kauti iko mai mo rukaki ira na kequ meca, ka raica o sa sega ni cakava, ia o sa qai vosa vakalougatataki ira tale.”

12A sa sauma o Balami ka kaya, “Au na cavuta ga na i tukutuku sa solia vei au o Jiova me'u tukuna.”

Na i Karua ni Tukutuku i Balami

13A sa kaya tale vei Balami o Pelaki, “Me daru lako vata mada ki na dua tale na yasana, na vanua o rawa ni raici ira mai kina; ia o na rawa ni raici ira wale ga na tiko voleka mai, ka na sega ni raici ira taucoko sara; mo na qai rukaki ira mai kea ena vukuqu.”

14A sa qai kauti koya ki na rara o Sofimi, ki na dela i Pisika, ka cakava e vitu na i cabocabonisoro, ka vakacabora ena i cabocabonisoro yadua, e dua na bulumakau, kei na dua na sipi tagane.

15A sa kaya vei Pelaki o Balami, “Mo tu mada eke voleka ki na nomu i soro kama, ka'u na lako mada yani ki liu me veitavaki kei Jiova mai kea.”

16A sa sota kei Balami o Jiova, ka solia vua na i tukutuku me vakadewataka vei Pelaki, ka vakatalai koya yani.

17Ia ni sa lako yani o Balami vei Pelaki, sa raica ni se tucake volekata tu ga na nona i soro kama o Pelaki, vata kei ira na turaga dauveiliutaki ni Moapi. A sa kaya vua o Pelaki, “Na cava sa kaya o Jiova?”

18A sa vakadewataka na nona i tukutuku o Balami, ka vaka:

“Mo tucake, i Pelaki na luve i Sipori,

Ka rogoca matua na ka au sa na tukuna.

19Sa sega ni tamata na Kalou me vosa lasu;

Se na luve ni tamata me rawa ni veisautaka na nona lewa.

A veika ga sa yalayala kina ena vakayacora;

Kei na veika sa tukuna ena yaco.

20Raica, au sa vakaroti me'u cavuta ga na vosa ni veivakalougatataki,

Kei na gauna kece sa veivakalougatataki kina na Kalou, sa sega ni rawa vei au me'u veisautaka tale.

21Sa sega ni raica o koya na nodra dravudravua na Jekope;

se me raica talega na leqa e Isireli.

O Jiova na nodra Kalou sa tiko vata kei ira,

ka kailavaki me tui ena kedra maliwa.

22Na Kalou, o koya ka kauti ira tani mai Ijipita,

sa valu ena vukudra me vaka na bulumakau kila.

23Sa sega na daurairai se cakaisausau,

me sauvi ira rawa na Isireli.

Era na kaya vakaoqo na tamata ena vukui Isireli,

‘Raica na ka sa cakava na Kalou!’

24Na matanitu o Isireli sa vaka e dua na laione qaqa:

Sa sega ni tiko vakamalua ka me basuraka taumada ka kania na kena,

ka me gunuva taumada talega na dra ni kena sa vakamatei.”

25A sa qai kaya vei Balami o Pelaki, “Mo kakua sara ni rukaki ira, ia mo kakua talega ni vosavakalougatataki ira.”

26A sauma lesu vei Pelaki o Balami, ka kaya, “Au sega li ni tukuna vei iko, ka vaka, ‘Na ka kecega sa kaya o Jiova, sai koya o ya na ka e dodonu me'u kitaka’?”

Na i Katolu ni Tukutuku i Balami

27A sa kaya tale vei Balami o Pelaki, “Daru lako mada, au na kauti iko ki na dua tale na yasana; de na qai vakatara na Kalou mo rukaki ira ena vukuqu mai kea.”

28A sa qai kauti Balami o Pelaki ki na dela i Piori, ka rai baleta tu na vanua lala.

29A sa qai kaya vei Pelaki o Balami, “Mo cakava vei au eke e vitu na i cabocabonisoro, ka vakarautaka vei au eke e vitu na bulumakau, ka vitu na sipi tagane.”

30A sa kitaka o Pelaki me vaka na vosa i Balami, ka vakacabora ena i cabocabonisoro yadua e dua na bulumakau, ka dua na sipi tagane.