1Na noqu bula tiko sa ka ni oca wale ga.
Ena ka oqo au na tukuna kina na noqu kudru ena yalo galala;
Ka'u na vakatusa kina vakadodonu na rarawa ni yaloqu.
2Kemuni na Kalou, mo ni kakua ni tukuna wale tikoga ni'u cala.
Na ka sara ga au cala kina, mo ni vakaraitaka.
3De rairai sa dodonu tiko beka vei kemuni mo ni veivakatotogani,
Mo ni cata na i bulibuli ni ligamuni
Ka totaka na nodra vere vuni na tamata ca?
4Sa vakayago beka li na i tovo ni nomuni rai?
Sa tautauvata li kei na tamata na nomuni vakatulewa?
5Sa vakaiyalayala beka na nomuni bula me vaka na veika bula,
Se na nomuni veiyabaki me vaka ga na dede ni neimami gauna na tamata?
6Ia a cava na vuna o ni dau vakataroga kina na noqu cala kece
Ka vakaqaqa na noqu i valavala ca?
7 Ym 16.15 O ni kila tu na noqu tawa cala,
Ka sega ni dua ena vakabulai au rawa mai na ligamuni na Kalou.
8Sa buli sara vakamaqosa na ligamuni,
Ia oqo, o ni sa vuki tale ka vakarusai au.
9Ni nanuma tiko ni o kemuni o ni a buli au mai na qele.
O ni sa na vakarusai au lesu tale beka me'u kuvu ni qele?
10 Ym 7.1,2 O ni a soli kaukauwa vei tamaqu me buli au;
Ka o ni a vakatuburi au talega ena kete i tinaqu.
11O ni sa vakaisulutaki au ena kuliqu kei na lewequ ka
Viribaiti au ena suiqu kei na ua.
12O ni a solia vei au na i cegu kei na loloma sega ni oti rawa,
Ka sa qai vakabulai au tiko na nomuni veikaroni vinaka.
13Ia sa qai macala sara vei au oqo,
Ni veigauna kece sara o ya
O ni sa nakita lo ga mo ni vakamavoataki au.
14O ni a qai vakararai toka ga,
De lakolako ka'u i valavala ca;
Ka mo ni na qai kainaka: Au bese sara ni guilecava.
15Ena gauna ga e dua kina na noqu i valavala ca,
E daru sa veimecaki sara ga;
Ia ni'u cakava na ka dodonu,
Sa qai sega na vinaka e soli me noqu.
Au sa luvuci ena madua
Ka'u sa vakaloloma sara ga.
16Ke'u sa rawa ka, ka tiko vakavinaka cake,
O ni sa qai vakasasataki au tale
me vaka e dua na laione.
O ni dau cakava talega na caka mana,
Me mai vakamavoataki au.
17O ni sa kauta mai eso na i vakadinadina vou me saqati au,
Ka vakalevutaka na nomuni cudruvi au;
Ka sa nomuni i tuvatuva
me'u valuti wasoma ena sala vou.
18A cava na vuna, kemuni na Kalou,
O ni sa vakatara kina me'u sucu mai?
E a dodonu ga me'u mate yani ni se bera ni dua e raici au.
19Ke'u lako vakadodonu ga mai na kete i tinaqu ki na i bulubulu
Ena ka uasivi sara me tautauvata ni da a sega ga ni basika ki vuravura.
20Sa sega beka li ni vakarau cava na noqu bula? Mo ni laivi au mada!
Ka me'u marautaka mada na vo ni noqu bula.
21Sa voleka me'u lako yani, ka'u sa na sega ni lesu tale mai,
Me'u lako ki na vanua ni rarawa ka lutuka na butobuto loa,
22na vanua ni moce balavu,
Na yaloyalo ni mate ka sa sega ni vakacokotaki vinaka,
Ka sa vaka ga na butobuto na kena rarama.
Who We AreWhat We EelieveWhat We Do
2025 by iamachristian.org,Inc All rights reserved.
