Jeremaia 50 - Vakavakadewa Vou kei na iVola tale eso（FNVDC12）

Vakamalumalumutaki o Papiloni

1Oqo na i tukutuku e a tukuna na Turaga o Jiova vei Jeremaia na parofita me baleti Papiloni kei ira na lewena.

2Tukuna yani na i tukutuku ki na veimatanitu!

Kacivaka yani!

Vakaraitaka na i vakatakilakila

Ka vunautaka na kena I tukutuku!

Kakua ni vunitaka lo tiko!

Sa bale o Papiloni!

Sa vorolaki na kena kalou o Merotaki!

Sa vakamaduataki o Bele na matakau ni Papiloni,

Ka vakavurumemeataki na kena veimatakau.”

3Sa lako mai e dua na matanitu mai na yasana vaka ki na vualiku me valuti Papiloni, ka na vukica me vanua lala. Era na dro tani na tamata kei na manumanu, ka na sega ni dua e tiko e kea.

Lesu mai o Isireli

4A sa kaya na Turaga o Jiova, “Ena yaco mai na gauna era sa na lako mai na Isireli vata kei ira na Juta, era na lako mai ka tagi ka vaqarai au na nodra Kalou.

5Era na taroga na sala ki Saioni, ka lako yani kina. Era na cakava e dua na veiyalayalati tawa mudu vata kei na Turaga ka sega sara ni voroka.

6Era sa vaka na sipi sa sese na noqu tamata ka ra sa laivi ira na kedra i vakatawa me ra sese ena veiulunivanua. Era sa veilakoyaki tu mai na dua na ulunivanua ki na dua tale na ulunivanua ka ra sa guilecava na vanua e tiko kina na nodra i tikotiko.

7O ira kece sara era kunei ira, era valuti ira. Era sa kaya na kedra meca, ‘Era sai valavala ca vua na nodra Turaga, ka sa sega kina ni cala na ka e da cakava, o ira na nodra qase era vakadinata na Turaga, ka dodonu sara ga me ra yalodina tikoga vei koya.’

8Kemuni na Isireli, ni dro tani mai Papiloni! Ni biuta na koro!

9Au na vakayavalati ira e dua na i lawalawa matanitu mai na yasana vaka ki na vualiku ka cakava me ra valuti Papiloni. Era na tuva na i valu me ravuta na koro ka ra vakamalumalumutaka. Era sa vanataka na nodra gasau ni dakaititi me vakataki ira na dauvakasasa era sega ni suka ligalala mai.

10Ena tokitaki na veika e Papiloni, ka ra na kauta na ka kecega era vinakata o ira era tokitaka,” a kaya o Jiova.”

Bale i Papiloni

11Kemuni na kai Papiloni o ni a tokitaki ira na noqu digitaki. E dina ni o ni a reki, marau, ka veilakoyaki me vaka e dua na bulumakau butu raisi, se vaka na tagi ni ose tagane,

12sa na vakalolomataki ka vakamaduataki na nomuni koro. Ena yaco me matanitu muri duadua vei ira na veimatanitu kecega, ena vanua dravuisiga ka sega kina na wai.

13Ena sega tale ni dua me na tiko e Papiloni ena vuku ni noqu cudru; sa na biu me rusa tu. O ira kece era lako sivia era na kurabui ena ka sa yaco kina.

14Kemuni na dautauri dakaititi, ni bukudruadrua ka tuva i valu vakavolivoliti Papiloni. Ni vanataka kece na nomuni gasau ki Papiloni baleta ni sai valavala ca vei au, o Jiova.

15Ni kailavaka na kaila ni valu wavolita na koro! Ia oqo sa soro o Papiloni. Sa kabasu ka bale sobu na kena bai. Oi au o Jiova au sa ia na sausaumi vei ira na kai Papiloni. Ia ni sauma vei ira na ka era dau cakava vei ira na tani.

16Kakua ni laiva na sore ni kau me tei mai Papiloni se laivi ira na tamata me ra cakava e dua na tatamusuki. Na vulagi kece era tiko kina era na rerevaki ira na mataivalu era valuta mai ka lesu tale ki na nodra vanua.”

Lesu mai o Isireli

17O ira na Isireli era sa vaka na sipi era sa cemuri vei ira na laione ka ra veiseyaki. E a valuti ira e liu na tui Asiria, ia e muri a qai musulaka na suidra o Nepukanesa na tui Papiloni.”

18Ena vuku ni ka oqo a kaya kina o Jiova ni lewevuqa, na nodra Kalou na Isireli, “Au na totogitaki Nepukanesa kei na nona vanua me vaka au a totogitaki tui Asiria.

19Au na vakasukai ira lesu na Isireli ki na nodra vanua. Era na kania na kakana era tubu ena ulunivanua o Kameli kei na yasayasa vaka-Pasani, ka ra na kania na ka kece era vinakata mai na veika era bula ena vanua o Ifereimi kei Kiliati.

20Ni na yaco mai na gauna o ya, ena sega ni dua na i valavala ca ena kune e Isireli ka sega na i tovo ca e Juta, baleta ni'u sa na vosoti ira kece na vo-ni-bula ka'u a laivi ira me ra bula tiko. Sa kaya ga oqo o Jiova.”

Lewa ni Kalou Baleti Papiloni

21Valuti ira na kai Mereceimi kei Pekoti. Vakamatea ka vakarusai ira. Cakava na veika kece au sa kaya vei iko,” a kaya na Turaga o Jiova.

22Sa rogo na domo ni valu ena loma ni vanua kei na veivakarusai levu.”

23A tukia sobu na vuravura taucoko o Papiloni, ia oqo sa kavoro vakamatailalai na i tuki o ya! Era sa kurabui na matanitu kecega ena ka sa yacovi Papiloni.

24Papiloni o sa coko ena dai au a viria me baleti iko, dina ga ni o a sega ni kila. O sa kune, ka vesu, baleta ni o vala vata kei au.

25Au sa dolava na vanua e tu kina na noqu i yaragi, ka'u sa tauri ira mai na noqu i yaragi ki tuba ena noqu cudru baleta ni sa tu na cakacaka me cakava o Jiova na Kalou Qaqa ena vanua o Papiloni.

26Valuta mai na veiyasana kece ka basuka na vanua e maroroi tu kina na kakana. Vakarusa na koro ka kakua sara ni vakabula e dua na ka.

27Vakamatei ira kece na nodra sotia! Vakamatei ira kece! Lomani ira na kai Papiloni! Sa yaco mai na gauna me ra totogi kina!”

28(Era sa lako mai ki Saioni na dro bula mai Papiloni ka tukuna na ka sa cakava o Jiova na nodra Kalou me sauma kina vei ira na kai Papiloni na ka era a cakava ki na nona Valenisoro.)

29Tukuna vei ira na dautauri dakaititi me ra valuti Papiloni. Talai ira kece yani era kila na vanataka na dakaititi. Ni wavolita na koro ka kakua ni laiva e dua na tamata me dro bula. Ni sauma lesu vua na ka kece e a cakava ka vakayacora vua na ka a dau vakayacora vei ira na tani baleta ni sa saqati au ena qaciqacia, na Ledua Yalo Savasava ni Isireli.

30Ia era na vakamatei na kena cauravou ena veigaunisala ni koro ka ra vakarusai kece sara na kena sotia ena siga o ya.” Sa kaya ga oqo o Jiova.

31Papiloni! o sa sinai ena qaciqacia, sai koya oqo au sa vorati iko kina oi au na Turaga na Kalou Qaqa, o Jiova ni lewevuqa. Sa yaco mai na gauna me'u totogitaki iko kina.

32Na nomuni matanitu viavialevu ena tarabe ka bale ka na sega ni dua me na vukei kemuni cake. Au na vakama na nomuni veikorokoro ena buka ka vakarusa na veika kece era tu wavokita.”

33A sa kaya na Turaga Qaqa o Jiova ni lewevuqa, “Era sa vakararawataki na Isireli kei ira na Juta. O ira kece era vakadrukai ira era sa yadravi ira toka vakavoleka ka sega ni laivi ira me ra lako.

34Ia o koya ena kauti ira lesu tale sa qaqa na yacana na Turaga Qaqa o Jiova ni lewevuqa. Sa i koya ga ena kauta cake na ka e baleti ira, ka kauta mai na veisaututaki ki vuravura, ia ena kauta mai na leqa vei ira na kai Papiloni.”

35A sa kaya o Jiova,

“Me yaco mai na mate ki Papiloni.

Era na mate na lewena,

O ira na kena i liuliu,

Kei ira na kena tamata vuku.

36Era na mate na kena parofita vakailasu

Era sa tamata lialia.

Era na mate na kena sotia

Ena levu ni nodra domobula.

37Vakarusa na kena ose kei na qiqinivalu!

Era na mate na kena sotia kai matanitu tani,

Era na vaka na yalewa.

Vakarusa na kena i yaya talei.

Tokitaka ka kauta.

38Kauta mai na dausiga ki na nodra vanua,

Ka vakamaca na kena veiuciwai.

O Papiloni e dua na vanua ni matakau ceuceu

Ka sa vakalialiai ira na kena tamata.

39Ia oqo ena vakasasataki o Papiloni mai vei ira na yalo ca kei na yalo velavela vata kei na veimanumanu vuka tawa savasava. Era na sega tale ni tawana na tamata ka tawa mudu.

40Ena yaco ki Papiloni na ka vata ga e a yaco mai Sotoma kei Komora ena gauna au a vakarusai rau kina kei na veikoro era voleka kina. E sa sega tale ni dua ena bula e kea se dua e lako vulagi kina.” Sa kaya ga oqo o Jiova.

41Era a lako mai na tamata

Mai na dua na matanitu

Mai na yasana vaka ki na vualiku,

E dua na matanitu yawa sa vakarau

Me ia na i valu.

42Era sa taura na nodra dakaititi

Kei na i seleiwau;

Era sai tovo kaukauwa ka tawa loloma.

Sa vaka na wasawasa sa vadugu na kena rorogo,

Ni ra sa vodoka na nodra ose.

Era sa vakarau me ra vala kei Papiloni.

43A rogoca na tui Papiloni na kena i tukutuku,

Ka sa damele sara ga na ligana.

Sa bikai koya na rarawa

Ka na mosi me vaka e dua na yalewa sa taratara.

44Raica ena lako cake mai o Jiova me vaka e dua na laione mai na veikau-loa ena bati ni Joritani ki na vanua veico ka vakavuna me ra dro tani vakasauri na kai Papiloni mai na nodra koro. Ia sa na qai yaco me liutaka na matanitu na i liuliu au na digitaka. O cei ena rawa me vakatauvatani kei au? O cei ena via bolei au? O cei na i liuliu ena rawa me vorati au?

45Rogoca mada na ka au sa nanuma me'u cakava vei ira na lewena. O ira sara mada ga na luvedra era na kau tani, ka ra na kurabui kina na tamata kecega.

46Ni sa na bale o Papiloni na kena i rogorogo ena uneune kina na vuravura ka ra na rogoca na domo ni tagi na veimatanitu tani.”