Isikeli 44 - Vakavakadewa Vou kei na iVola tale eso（FNVDC12）

Vakailesilesi ena Valenisoro

1Sa qai kauti au tale o koya ki na matamata ni koro e taudaku ni Tikina Tabu, ka qara donu vaka ki na tokalau, ka sa sogo tu.

2A qai kaya vei au o koya a Turaga, “Na matamata ni koro oqo, me sogo tu ga; ia me kakua ni dolavi, me kakua ni dua na tamata me curu kina; ni sa curu oti kina o Jiova, na Kalou ni Isireli, o koya oqo ena sogo tu ga kina.

3Sa tara wale ga vua na turaga me dabe kina, me kana madrai e matana na Turaga; ena curu o koya ena i curucuru ni matamata ni koro o ya, ka na muria talega ena nona curu yani ki tautuba.”

4A qai kauti au o koya, ka keirau muria na sala ki na matamata ni koro vaka ki na vualiku ena mata ni Valenisoro; ia ka'u sa vakaraica, ka raica, sa curu oso na Valenisoro ena i serau i Jiova; ka'u sa cuva vakatoboicu kina.

5A kaya vei au o Jiova, “Luve ni tamata, mo rai matua, ka vakatakilakilataka vinaka, ka rogoca vinaka na daligamu o ira ka'u na tukuna vei iko me baleta na i lesilesi ni Valenisoro i Jiova kei na kena i vunau, ka vakatakilakilataki ira vinaka era vakatarai me ra curu ki na Valenisoro kei ira era vakatabui me ra curuma na Valenisoro.”

6“Ia mo kaya vei ira na kawatamata dautalaidredre, io o ira na mataqali i Isireli, Sa kaya vakaoqo na Kalou o Jiova, Oi kemuni na mataqali i Isireli, me sa mudu sara na nomuni valavala vakasisila kecega,

7ena nomuni vakacurumi ira mai na vulagi, ka sa sega tu ni cilivi na yalodra kei na yagodra, me ra mai tiko ena noqu Tikina Tabu, ka vakacacana, ni o ni sa vakacabora vei au na kequ kakana, na uro, kei na dra. Ia o ni sa vakacacana na noqu veiyalayalati, me kena i kuri na nomuni valavala vakasisila kecega.

8O ni sa sega ni maroroya na noqu veika tabu; ia o ni qai lesi ira na kai tani me ra mai vakaitavi ena noqu Tikina Tabu.”

Ira na Livai

9“O koya oqo, sa kaya kina vakaoqo na Kalou o Jiova: “Me kakua ni dua na kai tani sa tiko kei ira na Isireli, ka sega tu ni cilivi na yalona se na yagona, me curuma na noqu Tikina Tabu.

10“Ia o ira na Livai ka ra sa lako vakayawa tani mai vei au ena nodra muria na nodra matakau, ni sa lako sese o Isireli, ena baleti ira vakaidina na nodra caka cala.

11Ia era sa na noqu dauveiqaravi ena noqu Tikina Tabu, me ra i vakatawa ni matamata ni koro ni Valenisoro, ka veiqaravi ena noqu Valenisoro. Era na vakamatea na i soro kama, kei na nodra i soro na tamata, ka ra na tu e matadra me ra qaravi ira.

12Ni ra sa qaravi ira na mata ni nodra matakau, ka ra veivakacalai se veivakatarabetaki ni cala ki na mataqali i Isireli: o koya oqo, ka'u sa bubului kina me baleti ira, sa kaya na Kalou o Jiova, ka ra na colata ga na i sau ni nodra caka cala.

13Era na sega sara ni toro voleka mai vei au me qaravi au ena i tavi vakabete, se me toro volekata e dua ga na noqu ka tabu, kei na veika e sa tabu dredre sara; ia era na colata ga na nodra madua, ena vuku ni valavala vakasisila era kitaka.

14Au na lesi ira me ia na cakacaka ni Valenisoro, me ra cakava na kena veiqaravi kecega kei na ka kece sa dau caka kina.”

O Ira na Bete

15“O ira na bete mai vei ira na Livai, era kawa i Setoki, o ira ka ra vakaitavi tikoga ena cakacaka ni noqu Tikina Tabu, ena gauna era lako sese tani kina mai vei au o ira na Isireli; sai ira ga na kawa i Setoki era na toro mai vei au me ra qaravi au; ka ra na tu e mataqu me ra vakacabora vei au na uro kei na dra, sa kaya na Kalou o Jiova;

16io, sai ira ga era na curuma na noqu Tikina Tabu, ka torova na noqu teveli, me ra qaravi au kina, era na vakaitavi ena noqu cakacaka.

17Ia ni ra sa curuma na matamata ki na lomanibai e loma, me ra vakaisulu ga ena i sulu lineni; me ra kakua ni tokara na i sulu e caka ena vutika ni sipi, ni ra sa ia na cakacaka ena lomanibai e loma, e loma ni Valenisoro talega.

20“Ia me ra kakua ni tasia na uludra se me ra vakalaiva me tubu babalavu sara na drau ni uludra; me vakavuruvuru ga ka me koti vakavinaka.

23“Ia me ra vakavulici ira na noqu tamata me ra kila na duidui ni ka tabu kei na ka sa vakatarai, ka vakaraitaka talega vei ira me ra kila tani ga na ka sa savasava mai na kena sa sega ni savasava.