Same 56 - Vakavakadewa Vou kei na iVola tale eso（FNVDC12）

Ravi Vua na Kalou ena Gauna ni VeivakacacaniVua na i liuliu ni sere: me vaka na i lagalaga ni sere “Na Ruve ena Veioki Yawa Sara.” A nei Tevita, ni ra sa tauri koya na kai Filisitia mai Kaca.

1Ni lomani au, na Kalou,

Baleta ni ra sa valuti au na tamata ca;

Era sa vakararawataki au na kequ meca ena veigauna kecega.

2Era sa valuti au ena veisiga taucoko o ira sa dausaqati au.

Sa lewe vuqa sara era sa veivala kei au.

3Oi kemuni o ni sa Cecere Sara, ena gauna au sa rere kina,

Au sa vakararavi ka vakadinati kemuni ga.

4Au sa vakabauta na Kalou ka'u sa sega ni rere;

Au sa vakacaucautaki koya ena vuku ni nona vosa ni yalayala.

Na cava ena cakava rawa vei au e dua na tamata wale ga?

5Era sa vakaleqai au na kequ meca ena veika kecega au cakava;

Era sa dau tuvatuva-ka tikoga ena sala me'u vakamavoataki kina!

6Era sa soqoni vata ena dua na i vunivuni,

Ka vakadikeva toka mai na veika au cakava,

Ka namaka me ra vakamatei au.

7Ni totogitaki ira na Kalou ena vuku ni nodra ca;

Ni vakadrukai ira ena nomuni cudru!

8O ni sa kila na levu ni noqu leqa;

O ni sa kila na levu ni wai ni mataqu sa drodro yani.

Sa sega li ni volai kece tu ena nomuni i vola?

9Era sa vakalesui tale na kequ meca

ena siga au masu yani kina vei kemuni.

Na ka oqo au sa kila: ni sa toka ga e yasaqu na Kalou —

10Na Kalou, o koya ka'u sa rekitaka na nona vosa,

Io, o Jiova ga, ka'u sa vakacaucautaka na nona yalayala.

11Au sa vakadinati koya sara, ka'u na sega tale ni rere.

A cava li ena cakava rawa vei au e dua na tamata wale ga?

12Kemuni na Kalou, au na solia vei kemuni na ka au sa yalataka,

Au na solia vei kemuni na noqu i solisoli ni veivakacaucautaki,

13Ni o ni sa vakabulai au mai na mate,

Ka taqomaki au me'u kakua ni druka.

Ia, au na qai lako ena mata ni Kalou

Ena rarama sa serauni ira na bula.