Vakarua 10 - Vakavakadewa Vou kei na iVola tale eso（FNVDC12）

Ciqoma Tale o Mosese na Vunau e Tini(Lako 34.1-10)

1“Ena gauna o ya a qai kaya vei au o Jiova, ‘Mo taya na vatu raraba me vaka na vatu e rua e liu, ka cakava talega e dua na kato kau, ka cabe cake mai vei au ki na ulunivanua.

2Au na qai vola ena vatu e rua oqori na veika au a vola ena vatu e rua o a voroka, ka tawani rau ena kato.’

3“Au a qai cakava e dua na kato ena kau akasia ka taya e rua na vatu raraba me vaka na kena e rua e liu, ka cabetaka cake ki na ulunivanua.

4A qai vola tale o Jiova ena vatu e rua o ya na veika sa vola ena vatu e rua e liu, o ya na Vunau e Tini ka vakaroti kemuni kina ena gauna ka a vosa kina vei kemuni mai na bukawaqa ena siga o ni a soqoni vata kina ena ulunivanua. A qai solia vei au o Jiova na vatu raraba e rua.

5Au a qai vuki ka sirova sobu mai na ulunivanua ka mai tawana sara na vatu raraba e rua ena kato kau au a cakava me vaka a vakarota vei au o Jiova.”

6(Era a qai biuta mai na nodra drano na kai Jeekani o ira na Isireli, ka ra gole yani i Mosera. A mate ka bulu talega e kea o Eroni, ka sa mani sosomitaki koya o Iliesa na luvena, me bete.