1“Oqo na kedra i cavacava na kalou ni Papiloni!
E rau a dau qaravi taumada tu o Bele kei Nipo,
Ia oqo e rau sa vakavodoki ena asa,
Sa i colacola bibi ena daku ni manumanu sa oca.
2Erau sa kala sobu, erau sa cuva sobu vata;
E rau sa sega ni ia rawa na veivakabulai,
Ia erau sa vesu ga ka kau yani vakabobula.
3“Ni vakarorogo mada vei au, na kawa i Jekope,
Oi kemuni na vo-ni-bula ni yavusa o Isireli.
Au a qaravi kemuni voli mai
Ena gauna o ni se qai sucu mai kina.
4Oi au na nomuni Kalou ka'u na taqomaki kemuni,
Vukei kemuni ka vakabulai kemuni.
5“O cei o ni na vakatautauvatataka kei au?
E bau dua tale tiko li e keirau tautauvata kaya?
6Era sa dolava na nodra baosi na tamata
Ka ra sa sova mai na koula.
Era sa sauma e dua na matai ni koula
Me cakava e dua na kalou,
Era sa qai cuva sobu ka qarava.
7Era a laveta cake ki domodra ka colata
Era a biuta ena dua na vanua ka sa tu ga e kea
Ka sega ni toso rawa mai na vanua sa biu tu kina.
Kevaka e dua e masu kina,
Ena sega ni sauma rawa mai
Se vakabulai koya mai na leqa.
8“Ni nanuma mada na ka oqo na tamata i valavala ca,
Ka vakasamataka na ka au a cakava.
9Ni nanuma mada na veika e a yaco ena gauna e liu;
Ni kila ni sai au taudua ga na Kalou,
Ka sa sega tale ni dua me tautauvata kei au.
10Mai na i vakatekivu au a tukuna na i vakataotioti,
Ka'u sa cakava na veika kece au nakita me'u cakava.
11Au a kaciva e dua na tamata me lako mai ena tokalau
Ka na co sobu me vaka na manulevu,
Me vakayacora na veika au sa nakita.
Au a tukuna ka na vakayacori.
12“Ni rogoci au mada na tamata vakadrecike,
O ni nanuma tiko ni yawa sara na qaqa.
13Au sa kauta vakavoleka mai na siga ni qaqa,
Io, sa sega sara ni yawa.
Ena sega ni vakaberaberataki na noqu qaqa.
Au na vakabulai Jerusalemi,
Ka kauta mai na noqu lagilagi e kea vei Isireli.”
Who We AreWhat We EelieveWhat We Do
2025 by iamachristian.org,Inc All rights reserved.
