Siraki 27 - Vakavakadewa Vou kei na iVola tale eso（FNVDC12）

1E lewe levu era valavalaca e na qara tubu; o koya e saga tiko me vutuniyau, e na sega ni via raica na ca.

2Me vaka na kena tuki sobu na kau e na kaca ni vatu, e vakina na kena ciqi matua na ivalavalaca e na kedrau maliwa na volivolitaki kei na volivoli.

3Ke dua e sega ni tudei ka yalodina e na nona lomana na Turaga, nona vale e na rusa totolo.

Na vosa e tauci e ivakaraitaki dina ni lomamu

4Ni sa kuretaki na ivakadewa, sa vo na duka; na duka ni tamata e tu ga vakina e nona vakasama.

5E tovolei e na ivavi na kuro ni dautulituli; na tamata e tovolei e na nona vakatulewa matau.

6 Maciu 7.17; 12.33; Luke 6.44 Na vuanikau e na vakaraitaka na qaravi vinaka ni vunikau; na vakamacalataki ni vakasama e vakaraitaka vakina na tuberi vinaka ni ulu ni tamata.

7Kua ni vakacaucautaka e dua ni se bera ni vakamacala, ni qo na ka e tovolei kina na tamata.

Na dina

8Keo qara na lewa dodonu, e na qai nomu, o na daramaka me vaka na isulu lagilagi.

9Na manumanuvuka era dau kumukumuni ga vakamataqali vata; na dina e dau lesuvi ira na dau dina.

10Na laione e dau davo no me waraka na kena, e vakina na ivalavalaca e na kena dau waraki ira tu na qara na ca.

Vosa vakalialia

11Na vosa ni tamata daulotu e duadua tu ga na kena vuku, ia na lialia e veiveisau me vaka na vula.

12Nio tiko vata kei ira na lialia, vaqara na gauna mo dro kina, ia nio tiko vata kei ira na vuku, tiko ga.

13Na nodra vosa na lialia e rogorogo ca, na nodra veidredrevaki e vakasisila, e ivalavalaca.

14Na nodra vosa na dau vosavosa ca e se kina na vutida, na nodra veiba da sogota ga kina na daligada.

15Na nodra veidre na viavialevu e dave kina na dra, na nodra veivosacataki e vakaloloma nida rogoca.

Gusulevutaka na veika vakamareqeti

16 Vbale 20.19; 25.9 O koya e vakacila na ka vuni, e vakamatea na veinuitaki; e na sega na nona itau dredre.

17Lomana nomu itokani, mo dina vua; ia keo sa vakacila na nona ka vuni, tawayaga nomu cici muri koya;

18o sa vakamatea na nomudrau veitokani me vaka nona vakamatea na kena meca e dua;

19me vaka nomu laiva na manumanuvuka me dro mai ligamu, o sa laiva vakina me lako na wekamu, o na sega ni toboki koya tale.

20Kua ni muri koya, ni sa rui yawa, sa dro vaka na dia mai na dai.

21E rawa ni vadretitaki na mavoa, e rawa na veisorosorovi ni yaco na veilecalecavi,

ia o koya e vakacila na ka vuni, sa sega nona inuinui.

Vu ni nomu leqa

22O koya e dau vakamatadua, e nakita tiko na ca, e sega ni dua e rawa ni tarovi koya.

23Nio tiko, e na kamikamica na gusuna, e na qoroya nomu vosa;

ia e muri, e na veisau, e na moica nomu vosa mo na coko kina.

24Au sa sevaka e levu na ka, e sega ga ni dua me tautauvata kei koya; na Turaga sara mada ga e na cati koya.

25O koya e viritaka cake vakadodonu na vatu e viritaka ga e uluna; e dua na ivacu kaukaua o na mavoa tale ga kina.

26O koya e kelia na qara, e na lutu kina; o koya e biri dai, e na coko kina.

27Ke dua e caka ca, e na suka lesu vua, e na sega ni kila se lako mai vei.

28Na veivakalialiai kei na veivakacacani e basika mai vua na tamata viavialevu, ia na sauma lesu na ca e waraki koya tu vaka na laione.

29O ira era marautaka na nodra lutu na tamata daulotu, era na coko e na dai, e na kani ira na mosi ni bera nodra mate.

Veisevaki

30Na cudru kei na yalokatakata, qo tale ga e ivakarau torosobu, na tamata valavalaca e na tu vua.