Siraki 19 - Vakavakadewa Vou kei na iVola tale eso（FNVDC12）

1Na tamata cakacaka e dau mateni, e na sega ni rawa ni lai vutuniyau; o koya e beca na ka lalai, e na rusa vakamalua.

2Na waini kei na yalewa e vakasesei ira na tamata vuku; o koya e lako vei ira na saqamua, e vakaveitaliataka nona bula.

3E na vuca, curumi ulo na yagona, e na lausugu na yalona.

4O koya e dau totolo nona veivakabauti, e ulu malumalumu; o koya e valavalaca, e beci koya vakataki koya.

5O koya e marautaka na ca, e na lewai; na tamata e valuta rawa na marau, e uasivi nona bula.

Veitalanoa sega na betena

6 Na tamata e lewa vakavuku na yamena, e na bula e na vakacegu; o koya e sevaka na kakase, e lailai na ca e sota kaya.

7Kua ni vakadewataka na ka o rogoca, e na sega ni yacovi iko na leqa.

8Kua ni tukuna vua na nomu itau se na kemu meca, kua sara ni talanoataka, vakavo ke cala na nomu katona,

9ni sa dua e rogoci iko, e na kasa vua, e na qai sevaki iko kina e muri.

10O sa rogoca e dua na vosa? Laiva me mate vata kei iko. Mo yaloqaqa, o na sega ni kacabote e na katona!

11Na tamata lialia, ni via katona na vosa vaqori, e na mosi vua me vaka na yalewa taratara.

12E vaka na vutu ni gasau sa tao tu e sagana na nona tovolea tiko na lialia me taqomaka na vosa.

13Ke a cala na nomu itau, tarogi koya kina de a sega ni cakava; ia ke a cakava dina, tukuna vua me kua ni cakava tale.

14Keo rogoca ni sa kaya na wekamu e dua na ka ca, tarogi koya kina de a sega ni tukuna; ia ke a cakava dina, tukuna vua me kua ni cakava tale.

15Keo rogoca e dua na ka ca me baleta na nomu itau, tarogi koya kina de ka lasutaki; kua gona ni vakabauta na ka kece o rogoca.

16E rawa ni lutu cala nona vosa e dua, e sega ni nakita. O cei e se bera mada ni valavalaca vakadua na yamena?

17Keo rogoca e dua na ka o via cudruva kina na wekamu, tarogi koya mada ni se bera nio vosataki koya; laiva ga me muri na lawa nei koya na Cecere Sara, kua ni cudru.

Vakila se cava na Yalomatua

18 Na doka na Kalou e itekitekivu ni veiciqomi; na yalomatua e rawai kina na nona loloma.

19 Na kila na ivakaro ni Turaga e soli bula; o ira na vakayacora na ka e gadreva, e na kedra na vua ni vunikau ni bula tawamudu.

20Lomana na Turaga, rokova na nona ivakaro; qori sara ga na ibalebale taucoko ni lawa kei na kila na nona sau.

21 Ni kaya na dauveiqaravi vei koya na nona turaga, “Au na sega ni cakava na ka o tukuna,” veitalia ke qai vakayacora e muri, e vakacudruya na tamata e maroroi koya.

22Ia na kila na ca e sega ni yalomatua, e sega tale ga ni lewa matau nodra veivakasalataki na dauvalavalaca.

23E dua na mataqali vuku e vakasisila, ia e tu tale ga na tamata lialia e yali ga vua na yalomatua.

24E vinaka na tamata e doka na Kalou e lailai ga na nona vuku, e ca na tamata e dau lewa maqosa sara e beca ga na lawa.

25E tu na tamata e vuku sara e sega ga ni dodonu; e tu tale ga na tamata e loloma veidabui me yaco ga kina na lomana.

26E tu na tamata lawaki ca e cuva sobu e na lolosi ia e sega sara ga ni dina.

27E vuki tani mo nanuma ni sega ni rogoci iko, ia ke sega ni laurai, e na lawakicataki iko.

28Kevaka e sega ni rawa ni cakava qo na cala, e na qai cakava ga ni sa rawa kina vua.

29E kilai e dua mai na kena irairai; na tamata yalomatua e kilai e matana nida sotavi koya.

30Na nona isulusulu, na nona idredredre kei na nona iyabeyabe, e vakaraitaka se o cei o koya.