1O Adioko na luve i Demetirio na tui a vakauta mai yanuyanu e dua na ivola vei Saimoni na bete, nodra iliuliu na Jiu kei na matanitu taucoko vakaJiu.
2E vaqo na lewena: “Tui Adioko vei Saimoni na betelevu, nodra iliuliu na Jiu, kei kemuni na lewenivanua, ni bula vinaka.
3E so na tamata ca era sa kovea na nodra matanitu na tubu i keimami, sa lomaqu me sa noqu tale, meu vakalesuya na kena ituvaki e liu. Au sa vakasoqona e dua na mataivalu saumi vakaitamera, au sa vakarautaka na waqanivalu.
4Sa lomaqu meu soko i tailevu meu lai valuti ira na vakacacana na neimami vanua kei ira na talaraka e levu na koro e na noqu matanitu.
5Au sa vakadeitaka qo vei iko ni se dei tu ga na boko ni ivakacavacava kece era vakadonuya vei iko na tui era liu vei yau, vaka kina na sausaumi tale e so.
6Au sa vakatara mo buli ilavo ni nomu matanitu,
7au sa vagalalataki Jerusalemi kei na vale tabu. E na nomu tiko ga na iyaragi kece o sa bulia kei na koronivalu kece o sa tara.
8E na boko na nomu dinau kece vua na tui, sana boko tale ga vakadua na dinau vaqori mai muri.
9Niu sana taura lesu tale na noqu matanitu, au na vakacerecerea nomu matanitu kei na valenisoro, me kilai kina e vuravura taucoko na nomu lagilagi.”
10E na ika174 ni yabaki, a cavutu kina o Adioko me kabata na nona yavutu. Era muri koya na mataivalu kece, sa mani lailai kina na mataivalu nei Tirifo.
11A cemuri koya o Adioko, qai yaco sara o Tirifo i Dore e bati ni waitui;
12sa kila ni sa veileqayaki, ra sa biuti koya nona mataivalu.
13Sa mani keba donui Dore o Adioko me valuta; era le 120,000 na nona sotia, kei na 8,000 na mataivalu vodo ose.
14A virikovuta na koro, ra bololaka tale ga mai wai na waqanivalu; a vakavaluta na koro e vanua vakina mai wai, a vakatabuya na veicuruyaki.
Tokoni ira na Jiu o Roma15 1M 12.16 Eratou sa qai yaco mai Roma o Numenio kei na nona itokani, eratou kau ivola tiko mai vei ira na tui kei na matanitu, e vaqo na lewena:
16“Lusio, na nodra turaganilewa na kai Roma, vei Tolemi na tui, ni bula vinaka.
17Erau sa yaco mai vei keimami na nodra mata na Jiu, erau lako mai e na veitokani, kei na veitokoni, me buki tale na wa ni veiwekani kei na duavata makawa. A talai rau mai o Saimoni na betelevu kei ira na kai Jiu,
18erau kauta mai e dua na isasabai koula e 1,000 na mina na kena bibi.
19Keimami sa nanuma kina me keimami volavola vei ira na tui kei na matanitu mera kua ni via vakaleqai ira, nodra koro se nodra vanua, se tovata kei ira na kedra meca.
20Keimami sa lewa me keimami ciqoma na nodra isasabai.
21Ke so gona na tamata ca era dro yani vei kemuni mai na nodra vanua, ni vakasukai ira vei Saimoni na betelevu me totogitaki ira me vaka nodra lawa.”
22A vola vata tale ga kina na turaganilewa vei Demetirio na tui, kei Atalo Ariarace kei Arasace,
23kei ira na veimatanitu kece, wili kina o Sabusame, Sipata, Delosi, Midosi, Sisioni, Karia, Samosi, Pamifilia, Lisia, Halikanaso, Rotesi, Fasele, Kosi, Site, Arato, Qoritina, Kinito, Saipurusi kei Sairini.
24Era vakauta tale ga e dua na kena ilavelave vei Saimoni na betelevu.
Beci Saimoni o Adioko na ikaVitu25A virikovuti Doro tale o Adioko na tui, sega ni mudu nona ravuravu tiko kei na buli misini ni ivalu, a sogoti Tirifo vakadua e loma ni koro me kua ni curu mai se curu yani.
26A tala vei Adioko o Saimoni e le 2000 na qaqa digitaki mera nona lewe ni mataivalu, salavata na siliva, koula, kei na levu na iyaragi ni ivalu.
27Ia a bese ni ciqoma, beca kece nodrau veidinadinati kei Saimoni, rau sa veimecaki sara.
28O Adioko a tala nona itokani o Acenovio merau veivosaki kei Saimoni, me kaya, “O sa lewai Jopa kei Qasara kei na koronivalu e Jerusalemi; eratou koro ni noqu matanitu.
29O sa vaqeyavutaka na veivanua qori, sa levu nomu vakacaca e na vanua, o sa kovea e levu na vanua e na noqu matanitu.
30Solia gona mai qo na veikoro o sa kovea, kei na ivakacavacava ni veivanua o sa valuta e taudaku kei Jutia;
31ke sega, solia mai e 500 na taledi siliva me isau ni koro ya, kei na 500 tale me baleta na nomu vakacaca kei na ivakacavacava ni veikoro qori. Kevaka e sega, keimami na lai valuti kemuni.”
32Sa mani lako mai Jerusalemi o Acenovio na itokani ni tui; ni sa raica na lagilagi nei Saimoni, na kovate iyaya siliva kei na koula, kei na kena irairai vakaturaga, sa kurabui vakalevu. A vakasavuya na vosa ni tui
33qai sauma vaqo o Saimoni: “Keimami sega ni bau taura na vanua tani se kovea na iyau tani, keimami taura ga na ka e nodra na neimami qase era se taura vakatawadodonu e liu na keimami meca.
34Ia qo ni keimami sa rawata na ka a nodra na neimami qase, keimami taura matua sara.
35Oni vinakati rau o Jopa kei Qasara erau vakavu leqa vakalevu vei ira na neimami lewenivanua kei na neimami vanua; keimami na solia vei kemuni me kedrau isau e 100 na taledi.” A sega ni sauma e dua nona vosa o Acenovio,
36a lesu ga e na cudru levu vua na tui, tukuna vua na vosa qo kei na lagilagi nei Saimoni kei na veika kece a raica. Sa duatani na cudru ni tui.
Vakadrukai Kedeveo o Saimoni37Sa vodo waqa o Tirifo me dro i Ocosia.
38Sa qai lesi Kedeveo na tui me vunivalu ni veivanua e baravi, solia vua na mataivalu taubale kei na mataivalu vodo ose.
39A vakaroti koya me valuti Jutia, me vakacokotaki Kitironi, vakaukauataka na kena matamata, me valuti ira na lewenivanua; na tui me qai vakamuri Tirifo.
40Sa mani lako mai i Jaminia o Kedeveo qai vakacudrui ira sara na lewenivanua, kabati Jutia me vakabobulataki ira, vakamatei ira.
41A vakacokotaki Kitironi, lesia kina na mataivalu vodo ose kei na mataivalu taubale mera dau lai vala e na veisalatu kei Jutia, me vaka na lewa ni tui.
Who We AreWhat We EelieveWhat We Do
2025 by iamachristian.org,Inc All rights reserved.
