1 Tui 17 - Vakavakadewa Vou kei na iVola tale eso（FNVDC12）

O Ilaijia kei na Lauqa ni Vanua

1E dua na parofita ka yacana o Ilaijia, a kai Tisipa mai Kiliati o koya, a sa kaya vei Eapi na tui, “Me vaka sa bula o Jiova na nodra Kalou na Isireli, o koya au sa qarava, au sa tukuna kina vei iko ni na sega ni lutu na tegu se tau na uca ena loma ni rua se tolu na yabaki mai oqo, me yacova na gauna au na kaya tale kina.”Jeme 5.17

2A yaco vua na vosa i Jiova, ka vaka,

3“Mo lako tani e ke ka gole vaka ki na tokalau, ka vunitaki iko mai na uciwai o Kirici, oqori ena tokalau ni Joritani.

4Ia o na gunu mai na uciwai, au sa vakaroti ira talega na reveni me ra vakani iko mai kea.”

5A lako o koya me vaka na vosa i Jiova ka la'ki tiko ena bati ni uciwai o Kirici, ena tokalau ni Joritani.

6Ia era sa dau kauta yani na reveni na kena madrai kei na lewe ni manumanu ena veimataka, kei na veiyakavi: a gunu o koya mai na uciwai.

7Ia ni bogi vica, a qai maca na uciwai, ni a sega ni tau na uca ena vanua o ya.

O Ilaijia kei na Yada mai Sarifaci

8A sa qai vosa vei Ilaijia o Jiova, ka kaya,

9“Mo lako ki na koro o Sarifaci sa koto volekati Saitoni, ka la'ki tiko mai kea. Raica, au sa vakarota e dua na yada mai kea me vakani iko.”Luke 4.25-26

10A sa lako yani o Ilaijia ki Sarifaci; ia ni yaco yani ki na matamata ni koro, a raica sara ni tiko e kea e dua na yada ka vakatomika voli eso na buka. A sa kaya yani vua, “Au kerea mo solia mada mai e dua na wai me'u bau gunu.”

11Ia ni lako yani o koya me kauta mai, a kaci tale vua na yada ka kaya, “Au kerea mo kauta talega mai vei au e dua na tiki ni madrai.”

12A sa kaya na yada, “Me vaka sa bula o Jiova na nomu Kalou, au sa vakadinata ni sa sega tale ni qai vo vei au e dua na madrai. Na ka ga e tu vei au o ya e dua na valawa lailai sara ena kena saqa kei na waiwai lailai sara ena kena tavaya. Au sa lako mai oqo me'u mai kauta e vica na buka me la'ki vakarautaki kina na veika sa vo toka vei keirau kei na luvequ. O ya me i otioti ni neirau kana vata, ka muria yani na leqa ni viakana me yacova na mate.”

13A qai kaya vua o Ilaijia, “Mo kakua ni o lomaleqa; mo la'ki cakava ga na veika o sa kaya mo vakayacora; ia mo vavia mada e liu vei au e dua na i buli lailai ka kauta mai vei au; mo qai vakarautaka e muri na kemudrau kei na luvemu.

14Ni sa kaya vakaoqo o Jiova na nodra Kalou na Isireli, ‘Ena sega ni oti rawa na valawa mai na kena saqa, ka na sega talega ni maca rawa na waiwai mai na kena tavaya me yacova mada na siga ena vakatauca kina o Jiova na uca ki vuravura.’ ”

15A sa lako na yada ka vakayacora na vosa i Ilaijia; ka sa yaco me veirauti tikoga na kedratou kakana me vuqa na siga.

16Me vaka na vosa i Jiova vei Ilaijia, a sa sega ni oti rawa na valawa mai na kena saqa, ka sega ni maca sobu na waiwai mai na kena tavaya.

17Ni sa oti na veika oqo, a sa qai tauvi mate na luvena tagane na yada; ka sa bibi sara na kena mate, ka mani mate sara kina.

18A sa kaya na yada vei Ilaijia, “Kemuni na tamata ni Kalou, a cava na ka o ni sa vakayacora oqo vei au? O ni sa lako beka mai mo ni mai vakatakila vua na Kalou na noqu i valavala ca, ka sa vakavuna oqo na mate nei luvequ?”

19A sa kaya vua o Ilaijia, “Mo solia mai vei au na luvemu.” A sa taura na gone mai na lomaserei tinana, ka kauta ki na rumu e cake e dau tiko kina, ka vakadavora ena nona i davodavo.

20A sa qai masu ena domoilevu, ka kaya, “Kemuni Jiova na noqu Kalou, o ni sa vakayacora tale beka ga na leqa vua na yada au tiko vulagi kina, ni kemuni sa vakamatea na luvena?”

21A sa davoca vakatolu na gone ka masuti Jiova, ka kaya, “Kemuni Jiova na noqu Kalou, mo ni vakalesuya tale mada vua na gone oqo na i cegu ni bula!”2Tui 4.34-35

22A sa rogoca na masu i Ilaijia o Jiova, ka sa tekivu cegu tale na gonetagane ka bula tale mai.

23A sa keveta na gone o Ilaijia ka kauti koya sobu mai na rumu e cake, ka solia vei tinana, ka kaya vua, “Raica, sa bula na luvemu!”

24A sa kaya vei Ilaijia na yada, “Au sa qai kila oqo ni o ni tamata dina ni Kalou, ka sa dina taucoko na vosa i Jiova mai na gusumu.”