2 Makabe 2 - Vakavakadewa Vou kei na iVola tale eso（FNVDC12）

Vunitaka o Jeremaia na valelaca ni Turaga

1E kune e na ivola tukutuku ni a vakaroti ira na kau vakavesu o Jeremaia na parofita mera lavi buka, me vaka sa tukuni oti.

2Ni sa solia vei ira na lawa, a tataunaka mera kua ni vakanadakuya na lawa ni Turaga se me vakasesei nodra vakasama nira na raica na matakau koula, siliva, kei na kedra iukuuku.

3A vakauqeti ira tale ga vakina mera dau tugana na lawa.

4E volai tale tu ga ni a vakadewataki vua na parofita na lewa ni Kalou me kauta na vale vakacevaceva kei na yareka, qai cabeta na ulunivanua a cabeta o Mosese me lai raica na vanua a solia na Kalou.

5A lai raica o Jeremaia e dua na qaravatu, mani vakacuruma kina na vale vakacevaceva, na yareka kei na yaletare ni mira, qai latia.

6E so vei ira na tomani koya era lai via sauva na sala, era sega ga ni kunea.

7Ni sa rogoca o Jeremaia, a vosataki ira, a kaya: “E na sega ni kune na vanua qori me yacova ni na vakasoqoni ira tale nona tamata na Kalou, vakaraitaka na nona loloma.

8Lako 16.10; 24.16; 1Tui 8.10,11E na qai vakaraitaka na Turaga na veika qo; na lagilagi ni Turaga kei na o e na rairai mai, me vaka erau a laurai e na gauna i Mosese, me vaka tale ga nona kerea o Solomoni me vakatabui dredre na vanua ya.”

Nona marautaka o Solomoni na solevu

9E vakaraitaki tale ga ni yalomatua i Solomoni a cabora kina na isoro ni vakatabui kei na vakacavari ni valenisoro.

10Me vaka nona masu o Mosese vua na Turaga qai lutu mai lomalagi na bukawaqa a kama kina na isoro, a masu tale ga vakina o Solomoni, qai lutu mai na bukawaqa a vakama yavu kina na isoro kama taucoko.

11A kaya o Mosese, “E kama yavu baleta ni se bera ni laukana na isoro ni ivalavalaca.”

12A solevu vakina o Solomoni me siga walu.

Na valenivola i Niemaia

13Na ka vata ga, e volai e na itukutuku nei Niemaia, vakina nona tauyavutaka tale ga e dua na valenivola a kumuna na kedra ivola na tui kei na parofita, na volavola nei Tevita, kei na nodra ivola na tui me baleta na isoro.

14A kumuna vakina o Jutasa na ivola kece a yali e na ivalu eda a donuya, era sa tu vei keda qo.

15Kevaka gona oni vinakata, ni talai ira mai e so mera kauta yani.

Veisureti i na solevu

16 1M 4.59 Me vaka gona nida sa vakarau solevutaka na vakasavasavataki ni valenisoro, keimami volavola yani kina vei kemuni, moni yalovinaka moni vakananuma tiko na vica na siga qo.

17Na Kalou ga sa vakabula na nona tamata kece, sa vakasuka vei keda kece na ivotavota, kei na itutu vakatui, vakabete kei na veivakatabui,

18me vaka a yalataka e na lawa. Eda nuitaka gona na Kalou ni sa vakarau lomani keda e na nona vakasoqoni keda mai na veivanua e ruku i lomalagi i na nona vanua tabu, ni sa vakabulai keda mai na leqa lelevu, sa vakasavasavataka na vanua.

iKau ni iVola

19Na italanoa kei Jutasa Makabe kei iratou na tacina, na vakasavasavataki ni valenisoro levu, na vakatabui ni kena yaletare,

20na ivalu kei Adioko Epifane kei na luvena o Iupatore,

21kei na raivotu mai lomalagi vei ira era valataka dina tiko na lotu vakaJiu, e dina nira lewe lailai era valuta kece na vanua, ra cemuri ira na yavusa kaitani,

22taura lesu tale na valenisoro rogo e vuravura, sereka na koro, vakadeitaka tale na lawa a vakarau boko ni tubu tiko nona lomani ira na Turaga,

23na ka kece qo sa vola tu o Jesoni mai Sairini e na lima na ivola, keitou sana tovolea me volai e na dua ga na ivola.

24Ni keitou vakasamataka na levu ni matanifika, nodra leqa na via vulica na itukutuku ni gauna e na vakaitamera ni itukutuku,

25sa neitou inaki me keitou vakamarautaki ira era via wili vola, me rawarawa vei ira era via vulica vagusu, me yaga vei ira kece na dauwilivola.

26Vei keitou na qarava na itavi ni kena vakalekalekataki, e sega ni ka rawarawa; e bunotaki, sega na moce,

27me vaka ga na kena dredre vua e dua e vakarautaka na kanavata me baleti ira e duidui na ka era taleitaka. Ia nodra vakavinavinaka na lewe levu, keitou na makutu kina na vosota na cakacaka dredre qo.

28Keitou na laiva na kena matailalai vei koya na kumuna taumada na kena itukutuku; neitou sasaga me vakarautaki na kena matailelevu.

29Me vaka e kauaitaka na matai ni vale na ibulibuli taucoko ni vale, ia o koya e boroya qai ukutaka e nona itavi ga me rairai vinaka, e noqu rai ni vaka kina na neitou itavi.

30E itavi ni daunitukutuku ni gauna me kila na ka sa yaco, me vakaraitaka na veitikina, me dikeva na veigacagaca lalai,

31ia o koya e talanoataka na itukutuku, e dodonu me saga me tukuna vakalekaleka, me kua so na tali magimagi.

32Me sa tekivu gona qo na neitou italanoa, kua ni kuri tale na ivakamacala, ni na veicalati me balavu na ikau qai lekaleka na lewe ni itukutuku.