1Sa rogoca o Jutasa na kedra irogorogo na kai Roma nira kaukaua sara, ra dau lomani ira kece na nodra ito, ra dau maroroi ira kece na dau gole yani vei ira.
2E tukuni vua na nodra ivalu, nodra yaloqaqa e na veivala kei ira na kai Qolo, nodra vakadrukai ira, nodra lavaka mera dau cava vei ira,
3vakina na nodra itovo mai Sipeni era rawata kina na qara ni koula kei na siliva,
4kei na nodra sa lewa na yasayasa taucoko ya, veitalia na kena yawa, e na lewa matau kei na vosota. Era vakamalumalumutaki ira tale ga na tui ni veivanua era bolei ira, era vakadrukai ira, qaqiraki ira sara ga; o ira tale e so era cava vei ira e na veiyabaki.
5O Filipe kei Pereseo, nodra tui na kai Masetonia, kei ira tale e so era via bolebole, era vakadrukai ira vakaca e na ivalu.
6Era vakadrukai Adioko Levu tale ga na tui Esia, koya a lai valuti ira yani e na dua na drau ruasagavulu na elefadi, na mataivalu vodo ose kei na qiqi, kei na dua na mataivalu vakaitamera. Era vakadrukai koya;
7era vesuki koya qai lavaka vei koya kei ira kece era na taravi koya e na veiliutaki na isoro vakaivua, mera soli tamata vakavesu, qai solia tale ga e vica na vanua qali vinaka,
8na vanua o Idia, Mitia kei Litia. Era taura mai vua na vanua e tolu qo, ra solia vei Iumenesi na tui.
9Era nakita na kai Kirisi mera mai valuti ira,
10mani cila na kena itukutuku, era qai tala yani e dua na turaganivalu me kabai ira na kai Kirisi. E le levu ra mavoa, ra mate, era vesu na katikati, era butakoci, valuti nodra vanua, talaraki na bainivalu, ra vakabobulataki me yacova mai na siga nikua.
11Na matanitu kei na yanuyanu era saqati ira na kai Roma, era vaqeyavutaki, ra vakabobulataki,
12ia o ira nodra ito kei ira era nuitaki ira, era maroroi tu ga. Era vakamalumalumutaki na tui tu yawa kei ira na tu voleka; o koya e rogoca na kedra irogorogo e domobulataki ira.
13O koya era via tokona me tui, e tui; o koya era via vakasivoya, e sivo; era sa qoroi vakalevu kina.
14Ia e sega tiko ga ni dua vei ira me bau vakaisala vakatui se vakaisulu lokaloka me dokai kina,
15era sa tara na vale ni seneti, mera dau veivosakitaka kina e veisiga e tolu na drau ruasagavulu na lewenibose na veika me baleti ira na lewenivanua kei na nodra liutaki vakavinaka.
16Era nuitaka e dua me liutaki ira e loma ni dua na yabaki, me lewa na nodra vanua taucoko; era vakarorogo kece vakadua vua, e sega na veiqati.
17 2M 4.11 O Jutasa sa mani lesi Iupolemo (luve i Jone, na luve i Akosi), kei Jesoni (luve i Iliesa), talai rau i Roma merau bukia na veiwekani kei na tovata,
18me sa luva na ivua e vakabobulataki Isireli tiko kina o Kirisi.
19Erau lako i Roma, vanua yawa sara, rau curuma na valenibose, erau kaya:
20“O Jutasa, vakatokai o Makabe, o iratou na tacina kei ira na kai Jiu, era talai keirau mai meda sa mai tovata, da veisaututaki, me keimami sa wili me nomuni ito, nomuni itokani.”
21Era marautaka na italai qo,
221M 14.18mani vaqo na itukutuku volai e na varasa a vakau i Jerusalemi me ivakananumi ni veisaututaki kei na tovata.
23“Me lagilagi tawamudu o Roma kei na nodra vanua na Jiu, e wai e vanua, me sauyawa na iselewau kei na meca.
24Ke kabai o Roma se dua ga na kena qali,
25era na tovata kei ira e na yalodina na vanua vakaJiu, me vaka e ganita.
26E tabu na soli kakana, iyaragi, ilavo se waqa vei ira na meca me vaka sa lewa o Roma; era na vakayacora nodra itavi, sega na kena isau.
27E vakina ke kabai na vanua vakaJiu, era na tovata na kai Roma me vaka e ganita.
28E tabu na soli kakana, iyaragi, ilavo se waqa vei ira na meca se nodra ito, me vaka sa lewa o Roma, era na vakayacora na itavi qo, sega na veidabui.
29Sa vakadeitaki gona e na veiyalayalati qo nodra tovata na kai Roma kei ira na kai Jiu.
30Kevaka erau na lewa merau vakuria se me boko e dua na tiki ni veiyalayalati qo, erau na galala kina, sana vakabau na nodrau lewa.
31“Baleta nona vakalolomataki ira o Demetirio na tui, keimami sa volavola vaqo vua, ‘Na cava o sa rui vakasaurarataki ira tiko kina na neimami itokani, neimami ito na Jiu?
32Kevaka era na dugu ivalu mai moni valuti, keimami na valataka na nodra dodonu, valuti kemuni e wai se vanua.’ ”
Who We AreWhat We EelieveWhat We Do
2025 by iamachristian.org,Inc All rights reserved.
