Tiko Voli mai na Lekutu 18 - Vakavakadewa Vou kei na iVola tale eso（FNVDC12）

Nodra i Tavi na Bete kei na Livai

1Sa qai kaya vei Eroni o Jiova, “Dou sa beitaki, o iko kei ira na luvemu kei ira na mataqali ni nomu qase, ena vuku ni cala sa caka me baleta na vale tabu; ia dou sa beitaki vata kei ira na luvemu ena vuku ni cala sa caka ena nomudou cakacaka vakabete.

2Mo kauti ira talega mai na wekamu mai na mataqali Livai, na mataqali ni nomu qase, me ra mai tiko kei iko, ka me ra mai qaravi iko ni o sa tiko ena mata ni vale tabu vata kei iratou na luvemu.

3Me ra qaravi iko ka ra qarava na veicakacaka kecega ni vale tabu; ia me ra kakua ga ni torova yani na i yaya ni Tikina Tabu, se ki na i cabocabonisoro de ra na mate, o ira kei iko talega.

4Me ra na veiqaravi vata kei iko ni ra sa vakayacora na nodra i tavi me baleta na Vale ni Veitavaki; ia me kakua tale ni dua na tamata tani me toro volekati kemudou yani.

5O iko kei iratou na luvemu mo dou na qarava na cakacaka ni Tikina Tabu kei na i cabocabonisoro, me ra kakua tale kina ni cudruvi o ira na Isireli.

6Raica, sai au ga ka sa digitaki ira na wekamu na Livai mai vei ira na Isireli me ra i solisoli loloma vei kemudou. Era sa cabori me nei Jiova, me ra kitaka na veicakacaka ni Vale ni Veitavaki.

7Dou kitaka na nomudou cakacaka vakabete o iko, kei ira na luvemu, ena veicakacaka kecega e baleta na i cabocabonisoro, kei na ka sa tiko mai na loma ni lati. Au sa solia na nomudou cakacaka vakabete me i solisoli, ia na tamata tani sa torova ena vakamatei.”

Na Nodra i Votavota na Bete

8A sa tukuna talega vei Eroni o Jiova, “Raica, au sa solia vei iko mo lewa na veika ga sa maroroi mai na i soro me baleti au, kei na veika kecega era sa vakatabuya na Isireli; au sa solia vei iko me nomu i votavota, vei ira talega na luvemu, me kemudou ka tawa mudu.

9Mai na veika sa vakatabui me cabori ka sa sega ni vakamai ena i cabocabonisoro, na veika oqo sa kemudou: na i madrali laukana, na i soro ni valavala ca, kei na nodra i soro ni caka cala. Na veika kece sa cabori vei au me ka tabu sara sa okati me nomu vata kei ira na luvemu.

10Mo kania ga na veika oqo ena vanua vakatabui, ia me ra vakayagataka ga na tagane; ni sa ka tabu sara oqo vei kemudou.

11Me kena i kuri, sa nomudou talega na nodra i soro sa cabori vakaisolisoli kei na nodra i soro yalovaki kecega na Isireli. Au sa solia oqo vei iko kei iratou na luvemu tagane kei na luvemu yalewa, me kemudou ka tawa mudu. O ira kece sara na lewe ni nomu vuvale ka sa savasava era rawa ni kania.

12Au sa solia me nomu na waiwai kecega e vinaka sara, kei na waini uasivi duadua, kei na witi vinaka sara kei na kedra i sevu kecega na vuata era sa vakacabora vei Jiova.

13Ena nomu na vuata kecega sa dreu taumada ena nodra vanua, era sa kauta vei Jiova; me ra kania o ira kecega sa savasava ka ra tiko ena nomu vale.

14Ena nomu na veika kecega era vakatabuya e Isireli.

15Ena nomu talega na ulumatua ni ka kecega, se tamata, se manumanu yava i va, era sa vakacabora vei Jiova; ia mo volia talega na ulumatua ni tamata kei na ulumatua ni manumanu yava i va sa sega ni savasava.

16Ia mo lewa na i sau ni ka sa voli me tau yalima na tiki ni siliva, (ni sa vula dua mo qai volia), me vaka na kena i vakarau sa vakadonui vakalawa.

17Mo kakua ni volia na ulumatua ni bulumakau, se ulumatua ni sipi, se na ulumatua ni me; era sa tabu. Mo kureitaka na kedra dra ena i cabocabonisoro, ka vakama na kedra uro me vakacabori ena bukawaqa, me ka boi vinaka vei Jiova;

18ia me kemu ga na lewedra, me vaka na seredra sa yalovaki, ena kemu talega na sagadra i matau.

19Au sa solia vei iko, kei ira na luvemu tagane, kei ira na luvemu yalewa, me i solisoli tawamudu na i madrali tabu kecega era vakacabora vei Jiova o ira na Isireli. Oqo na veiyalayalati sa dregati vakadua me tawa mudu ena mata i Jiova ki vei iko vata kei ira na nomu kawa.

20Sa qai kaya tale vei Eroni o Jiova, Ena sega na nomu i votavota ni qele ena vanua o Isireli se na i yau me nomuni vakadua. Sai au ga na nomuni i votavota kei na nomu i yau ena nodra vanua na Isireli.

Na Nodra i Votavota na Livai

21Au sa solia vei ira na mataqali Livai na i katini ni nodra veika kecega na Isireli me nodra i votavota, me i sau ni cakacaka era kitaka, io na nodra cakacaka ena Vale ni Veitavaki.Vsoro 27.30-33; Vrua 14.22-29

22Me vakatekivu mai na gauna oqo, me ra kakua ni toro volekata tale na Vale ni Veitavaki o ira na Isireli, de ra cudruvi ena i valavala ca, ka mate kina.

23Ia o ira na Livai era na kitaka na cakacaka ni Vale ni Veitavaki, ka ra na tarogi ni ra caka cala; sa na kena i lesilesi ka sega ni mudu ena nomuni veitabatamata; me kakua na kedra i votavota ena nodra vanua na Isireli.

24Au sa solia vei ira na Livai me nodra i votavota na i katini ni nodra i yau kecega na Isireli era vakacabora me i soro vei Jiova; o koya ka'u sa kaya kina vei ira me sa kakua na nodra i votavota ena nodra vanua na Isireli.

Na i Katini e Nodra na Livai

25A sa qai kaya vei Mosese o Jiova,

26me tukuna vei ira na Livai, “Ni o ni sa taura na i katini ni nodra i yau na Isireli ka'u sa solia vei kemuni mai vei ira me nomuni i votavota, mo ni qai vakacabora lesu mai kina e dua na i soro vei Jiova, e dua na i katini ni katini.

27Na nomuni i soro oqo ena ciqomi me vaka na nona vakacabora na dauteitei na sila vou mai na rara ni samu sila, kei na waini vou mai na kena i qaqi.

28Mo ni vakacabora talega vakakina vei Jiova na i soro ni nomuni katini ni yau kecega dou sa rawata mai vei ira na Isireli; ia mo solia vei Eroni na bete na i soro vei Jiova.

29Mai na i solisoli loloma kecega o ni taura, mo ni cabora lesu tale vei Jiova na i soro kece e dodonu me nona; ia me cabori lesu vei Jiova na tikina vinaka duadua o ni sa ciqoma.

30Ni sa oti na nomuni cabora na tikina vinaka duadua vei Jiova, mo ni qai vakayagataka na kena vo, me vaka na nona dau maroroya na dauteitei na veika sa vo ni oti na nona vakacacabo.

31Na kena vo oqo sa rawa mo kania kei ira na lewe ni nomu vuvale ena tiki ni vanua cava ga o ni digitaka, baleta ni oqo sa kemuni i sau ni nomuni veiqaravi ena Vale ni Veitavaki.

32O ni na sega ni cudruvi ena vuku ni nomuni kania oqo kevaka wale ga o ni sa cabora oti na tikina vinaka duadua vei Jiova. Ia mo ni kakua ni vakadukadukalitaka na nodra i solisoli tabu na Isireli mai na nomuni sa kania na veika oqo ni se bera ni cabori taumada na tikina vinaka duadua vei Jiova; de o ni na mate kina.