Jope 24 - Vakavakadewa Vou kei na iVola tale eso（FNVDC12）

Kudruvaka o Jope na i Vakarau Kaukauwa e Vuravura

1A cava beka e sega ni lokuca kina na Kalou na gauna ni veilewai,

Me dua ga na siga ni lewa me nodra na dauqaravi koya?

2Era sa dau tosoya na tamata na i yalayala ni nodra vanua,

Me levu kina na kedra tiki ni qele;

Era butako sipi ka la'ki biuta vata kei na nodra dui qele ni sipi.

3Era butakoca na nodra asa na gone luveniyali,

Ka ra taura na nona bulumakau na marama yada

Me yacova na gauna sa sauma oti kina na nona dinau.

4Era tarovi ira na dravudravua mai na nodra rawata na nodra dodonu,

Ka ra vakasaurarataki ira na vakaloloma me ra la'ki vunitaki ira.

5Me vakataki ira na asa ni veikau,

Era sa la'ki vakasaqaqara kakana na dravudravua ena vanua talasiga;

Ka ni sa segai tale na vanua me ra kune kakana kina me kedra na luvedra.

6Era na tatamusuki ena tikinivanua ni tamata tani

Ka veti qerepi ena veivaini ni tamata ca.

7Ni sa sega na nodra i sulu, era sa moce luvaiwale ena bogi;

Ka sega na i tutuvi me taqomaki ira mai na batabata.

8Era suasua vakaca sara ena uca ka tau ena veiulunivanua,

Ka ra dui lokini ena veiyasa ni vatu me ra vakaruru kina.

9O ira na tamata ca era sa vakabobulataki ira na gone luveniyali,

Ka tauri ira na luve ni dravudravua me ra i vakadei ni kena saumi lesu na dinau.

10Ia era na lako luvaiwale ga na dravudravua me ra taqomaki kina;

Ka ra na walokai ena viakana ni ra tatamusuki tiko ena veiloga ni witi.

11Era sa loba olive me waiwai,

Ka ra loba qerepi me waini,

Ia o ira vakai ira era sa karamaca ena viagunu.

12Ena voqa mai loma ni koro na nodra tagi na mavoa kei ira era sa vakarau ciba,

Ia na Kalou sa sega ni malele ki na nodra masu.

13Era tu na mataqali tamata era dau besetaka na rarama;

Era sega ni kila na rarama ka ra levea na vanua e cila yani kina.

14Sa duri cake na daulaba ena kida ni mataka,

Ka sou yani me labata na tamata dravudravua,

Ka sa butako ena bogi.

15E waraka koto na lutu ni yakavi na tamata dauveidauci

Ka vunia koto na matana me kakua ni dua e kilai koya.

16Era sa basu vale na daubutako ena bogi,

Ia ena siga, era sa vuni ka levea na rarama.

17Era rerevaka na rarama ena siga,

Ia na butobuto e sega sara ga na ka era rerevaka kina.

18Sa kuitaki laivi na tamata ca ena dobui,

Ka sa lutuka koto na kena tiki ni qele na cudru ni Kalou;

Ka sa mudu na nona la'ki cakacaka ena nona loganivaini.

19Me vaka na yali vakadua ni uca cevata mai na katakata kei na lauqa,

Sa yali vakakina na tamata i valavala ca mai na nodra vanua na bula tiko.

20Sa sega ni qai nanumi ira tale na marama tinadra;

Sa kani ira na bacaniqele; ka mani rusa vakadua kina.

21Sa yaco na veika oqo baleta ni ra caka ca vei ira na yada,

Ka sega ni yalololoma vei ira marama sega ni vakaluveni.

22Ia na Kalou, ena nona kaukauwa sa yarataki ira laivi yani na tamata qaqa;

E cakacaka na Kalou ka ra vakaleqai na tamata ca.

23Na Kalou ena rawa ni vakalaivi koya me tiko vinaka mada ka bula sautu,

Ia sa wanonova matua ga na veika era cakava.

24Sa na dede vakalailai mada na nona rawa-ka tiko na tamata ca,

Ia ena qai malai yani me vaka na co ca,

Me vaka na vu ni sila sa tamusuki oti.

25E dua beka ena cakitaka rawa na dina ni ka oqo?

E dua li e rawa ni vakadinadinataka ni sega ni dina na noqu vosa?