Vosavakaibalebale 11 - Vakavakadewa Vou kei na iVola tale eso（FNVDC12）

1Sa cata o Jiova na tamata e vakayagataka na i vakarau ni ka e sega ni dodonu. Sa vinakata ga o koya na i vakarau ni ka sa dodonu vinaka.

2E dau sega ni dede era sa vakamaduataki na tamata dokadoka; ia sa laurai na yalomatua vei ira na yalomalumalumu.

3Sa tuberi ira na tamata vinaka na nodra yalodina. O ira sa sega ni dinati sa vakarusai mai na nodra daucakacaka vakatawadodonu.

4Sa sega ni yaga na i yau ena siga o na mate kina, ia na i valavala dodonu sa rawa ni vakabulai iko.

5Na nona i valavala dodonu na tamata vinaka ena vakarawarawataka na nona i lakolako, ia na tamata ca ena vakavuna ga na nona bale.

6Na yalosavasava sa vueta na nona bula na tamata dodonu, ia na tamata e sega ni vakadinati ena tacori ga ena nona kocokoco.

7Ni sa mate e dua na tamata ca, sa mate vata kaya na nona i nuinui. Na i yau era sa nuitaka na tamata tawa vakabauta ena seavu ka yali ga yani.

8Sa taqomaki na tamata yalododonu mai na leqa; ia sa yacovi ira ga na tamata ca na leqa.

9O na rawa ni vakarusai o iko mai na nodra vosa na tamata era sega ni kila na Kalou, ia ena rawa ni o vakabulai ga ena nodra yalomatua na tamata yalododonu.

10Sa marau na koro ena nodra toro cake na yalododonu, ka sa rogo na kaila ni marau ni sa mate na tamata ca.

11Sa toro cake na veikoro ni ra sa ia na veivakalougatataki na yalododonu, ia sa vakarusai ga na koro ena nodra vosa na tamata ca.

12Sa ka lialia na vosa beci ira na tani, ia na tamata yalomatua ena tiko lo ga.

13E sega ni dua na daukakase sa nuitaki vua me maroroya na i tukutuku vuni, ia sa rawa ga ni o vakararavi vua na tamata nuitaki.

14 Ym 6.24 Ena bale e dua na matanitu kevaka sa sega na veivakasalataki. Ena yaco ga na tiko vinaka ni sa levu na daunivakasala.

15Ke o sa yalataka mo sauma na nona dinau e dua na tamata vulagi, o na qai veivutunitaka e muri. E vinaka cake mo kakua ga ni vakaitavi kina.

16Sa dau dokai na yalewa yalovinaka, ia na yalewa sa sega na nona i tovo sa kauta mai na veivakamadualaki.

Na tamata vucesa ena sega na nona i lavo, ia na tamata gugumatua ena yaco me vutuniyau.

17O na caka vinaka vei iko kevaka o sa dauloloma. Kevaka o sai tovo kaukauwa, o sa vakacacani iko ga vakai iko.

18Era na sega ni rawata na kedra i sau dina na tamata ca; ia kevaka o sa teivaka na ka dodonu, o na tamusuka dina ga na kena i sau dina.

19Na tamata e nakita me cakava na ka dodonu ena bula, ia na tamata ena cakava tikoga na ka ca ena mate.

20Sa cati ira na tamata vakasama ca o Jiova, ia sa taleitaki ira ga sai valavala dodonu.

21Sa rawa mo vakadinata ni ra na totogitaki na tamata ca, ia o ira na yalododonu era na vakabulai.

22Na totoka ni kena i rairai na yalewa sa sega ni dauvakatulewa vinaka sa vaka na mama koula ena ucu ni vuaka.

23Na ka era gadreva na tamata yalododonu sa dau basika ga kina na vinaka; ia ena gauna era rawata kina na tamata ca na ka era gadreva, sa basika ga na cudru.

24Eso na tamata era sa daulomasoli ena vakayagataki ni nodra i yau ka sa tubu cake ga kina na nodra vutuniyau. Eso tale era sa dauqaqarauni ena kena maninitaki na ka, ia sa tubu cake ga kina na nodra dravudravua.

25Mo dausolisoli, ni o na qai vakavutuniyautaki. Mo dauvukei ira na tani, era na qai vukei iko.

26O ira na tamata sa cudruvi koya sa maninitaka na sila, me qai volitaki ni sa toso cake na kena i sau; ia era sa vakacaucautaki koya ga ka sa volitaka yani.

27Kevaka sa vinaka na nomu i tuvatuva, o na dokai kina; ia kevaka o sa vakasaqara ga na ca, sai koya ga na ka oqori o na rawata.

28O ira era vakararavi ki na nodra i yau era na lutu me vaka na lutu ni draunikau ena vula i botabota, ia era na tubu vinaka ga na yalododonu me vaka na draunikau ena vula i katakata.

29Na tamata e dauvakavuna na leqa ki na nona vuvale ena sega na ka e taukena e muri.

O ira na tamata lecaika era na dauqaravi ira tikoga na tamata yalomatua.

30Na yalododonu sa vakavuna na bula, ia na i tovo kaukauwa sa kauta tani tale.

31 1Pita 4.18 O ira sa vinaka era sa taura na kedra i sau ena vuravura oqo, ia o ira na tamata ca kei ira na i valavala ca era na totogitaki.