1Ni nanuma, Jiova, na veika sa yacovi keimami;
Ni rai mai, ka raica na neimami vakaloloma.
2Na ka e neimami sa soli vei ira na kai tani;
Era sa tiko ena neimami veivale na vulagi.
3Keimami sa luveniyali, sa sega ni vakatamani;
Sa vaka na yada o ira na tina i keimami.
4Me keimami na sauma na wai keimami gunuva;
Keimami na volia na neimami buka ni vakasaqa.
5Keimami sa vakasaurarataki vaka na kameli,
Keimami sa oca, ia sa sega ni soli na vakacegu.
6Keimami sa kerea vei Ijipita kei Asiria,
Na kakana me veirauti kei keimami.
7Era sai valavala ca na neimami qase,
Ia oqo era sa yali yani,
Ka keimami sa colata na nodra ca.
8Era sa lewai keimami na bobula;
Sa sega e dua me veivueti mai na ligadra.
9Keimami sa bole mate ga
Me rawa mai kina na keimami kakana;
Ena vuku ni seleiwau mai na vanua lala.
10Sa tubu na katakata ni yago mai na viakana,
Me yacova ni sa katakata vaka na ovani
Na kuli ni yago i keimami.
11Era sa kucuvi na yalewa mai Saioni,
Kei na goneyalewa ena veikoro e Juta.
12Era sa vakaliligi na i liuliu ena ligadra;
Sa sega ni ra dokai na neimami qase.
13O ira na cauravou
Era sa vakasaurarataki me ra qaqi sila.
Era sa taceba ga na gone lalai
Ena vuku ni nodra i colacola buka bibi.
14Era sa biuta na matamata ni koro na qase,
Era sa mudu ni qiri vakatagi na cauravou.
15Sa mudu na reki ni lomada;
Sa vuki na noda meke me tagi ni lolosi.
16Sa lutu tani mai na uluda na i sala vakaturaga,
Eda sa kalouca, ni da sai valavala ca!
17Ena ka oqo sa bibi kina na loma i keimami,
Ena ka oqo sa buwawa kina na matada.
18Ena vuku ni kena sa lala tu
Na ulunivanua o Saioni,
Era sa daulako voli kina na jekeli.
19Ia oi kemuni ga, Jiova, na Tui tawamudu,
Ka na veiliutaki tikoga me yacova na i vakataotioti.
20A cava o ni sa guilecavi keimami vakadua kina?
A cava o ni sa biuti keimami kina vakadede?
21I Jiova, mo ni vakalesui keimami tale yani;
Ni vakavouia na neimami siga me vaka eliu.
22Se o ni sa biuti keimami li vakadua?
Sa sega li ni vakaiyalayala na nomuni cudru?
Who We AreWhat We EelieveWhat We Do
2025 by iamachristian.org,Inc All rights reserved.
