Siraki 45 - Vakavakadewa Vou kei na iVola tale eso（FNVDC12）

Mosese

1 Lako 6.28–11.10; 20.1-21 Vei ira na nona kawa, a vakatubura dina na Turaga e dua na tamata yalododonu, taleitaki raraba,

lomani koya na Kalou kei ira na tamata; qo o Mosese, na kena irogorogo mada ga e veivakalougataki.

2A laveti koya me lagilagi vakataki ira na yagilosi, mera rerevaki koya na kena meca.

3Na nona vosa ga a mudu kina na ivakatakilakila; a vakalagilagi koya na Kalou e matadra na tui.

A solia na Kalou me liutaki ira na nona tamata, vakaraitaka toka vua na nona lagilagi.

4A vakatabui koya e na vuku ni nona yalodina kei na yalovakarokoroko; a digitaki koya vei ira kece na tamata.

5A laiva me rogoca na domona, liutaki koya e na o vavaku,

solia vua e matana votu na ivunau, na lawa ni bula kei na kilaka,

me vakavulici Jekope e na veiyalayalati, kei Isireli e na nona lewa.

Eroni

6 Lako 4.14 A vakacerecerei Eroni na tuakai i Mosese, e tamata yalododonu vakataki koya, lewe ni yavusa i Livai.

7 Lako 28.1-43 A veiyalayalati tawamudu vata kei koya, lesi koya me nodra bete na lewenivanua.

A vakaiyautaki koya e na isulu sau levu kei na isulu balavu vakaiukuuku.

8A vakaisulutaki koya vakavinaka sara, solia vua na ivakatakilakila ni vakatulewa: na tarausese lineni, na sote kei na kote balavu.

9E vakaiukuuku wavoki na bele ni kote e na pomekaraneti kei na lali koula e vuqa

me tataqiriqiri ni lako, me rogo sara i valenisoro, me ivakananumi vei ira na nona tamata;

10a vakaisulu e na isulu tabu wainikoula karakarawa lokaloka a cula na kenadau;

tu kina na iyaragi e dau kilai kina na loma ni Kalou, na Urimi kei na Tumimi;

11e vakawa damudamu maqosa, nona cakacaka na kenadau;

e ukutaki e na vatu talei e ceuti kina na matanivola ni yavusa e tinikarua ni Isireli me kedratou ivakananumi;

era kabi na vatu talei e na koula, na cakacaka ni kenadau.

12nona isala e toka e dela ni nona iubi ni ulu, e vakaiukuuku koula, volai kina “Tabu”,

e dua na cakacaka talei vakamareqeti a cakava na kenadau, rairai totoka, ukutaki vakamaqosa.

13A sega tu ni dua na ka talei vaqo ni se bera na gauna nei Eroni;

e sega tale ni dua e dara, o ira duadua na luvena kei ira na nona kawa me tawamudu.

14Nona isoro taucoko me dau vakamai vakarua tu ga e veisiga.

15 Vsoro 8.1-36 A buli koya o Mosese, lumuti koya e na waiwai tabu.

Qo e dua na veiyalayalati tudei vata kei koya kei ira kece na nona kawa me tawamudu,

me qarava na Turaga e na itutu vakabete, me vakalougatataki ira na nona tamata e na yacana.

16A digitaki koya mai vei ira kece na bula me vakacabo isoro vua na Turaga,

me vakama mira boi vinaka me vakananumi ira na nona tamata vua na Turaga, me sorovaki ira.

17A tataunaka vei Eroni na nona ivunau kei na lawa

me vakavulici Jekope e na nona lewa, me vakararamataki Isireli e na nona ivakaro.

18 Tiko 16.1-35 Era bukia na kena vere, vuvutaki koya na kaitani e na vanualala,

era saqati koya e na cudru o Dacani, Apirami, Kora kei ira na nodratou ito.

19A raica na Turaga, sega ni taleitaka, a mani vakamatei ira e na nona cudru,

a caka mana, vakamai ira e na buka waqa.

20A vakuria na lagilagi nei Eroni, solia vua na iyau;

a wasea vua na isevu ni vuaniqele, vakadeitaka ni na levu na kena madrai,

21nira dau kania na isoro e cabo vua na Turaga o Eroni kei ira nona kawa.

22 Tiko 18.20; Vrua 12.12 Ia e sega ni soli vua e dua na qele, sega kina nona ivotavota me vakataki ira na vo ni tamata, ni sa nona iyau ga na Turaga.

Peniasi

23 Tiko 25.7-13 O Peniasi na luve i Iliasa e ikatolu e na lagilagi taravi Mosese kei Eroni, ni a gugumatua e na doka na Turaga,

tudei e na gauna era vuki tani kina na tamata; e na nona yalovinaka a sorovaki Isireli kina.

24A mani vakayacori na veiyalayalati ni veisaututaki vata kei koya me iliuliu ni vale tabu, nodra iliuliu nona tamata,

me na nona tawamudu kei ira na nona kawa na itutu dokai vakabete.

25E na veiyalayalati a vakayacori vata kei Tevita na luve i Jese e na yavusa i Juta,

na itutu ni tui yadua e dewa sobu ga vua na luvena, ia na itavi nei Eroni e dewavi ira kece na nona kawa.

26Me solia na Kalou vei kemudou na kawa i Eroni na yalomatua modou lewai ira vakadodonu na nona tamata,

me kua ni yali na nodra sautu, me tudei na nodra lagilagi e na veitabagauna.