Siraki 11 - Vakavakadewa Vou kei na iVola tale eso（FNVDC12）

1Na yalomatua ni dravudravua, e na yaco kina me dokai, me wili kina kei ira na rogo.

Keda irairai

2Kua ni qoroya e dua ni rairai vinaka se sevaka e dua ni rairai ca.

3Na oni e manumanuvuka lailai duadua, ia na kamikamica ni denioni e kamikamica duadua.

4Kua nio dokadoka nio vakaisulu totoka, se mo vakabekabei iko nio dokai,

Nira qoroi na cakacaka ni Turaga, ia era vunitaki vei keda.

5E levu na tui era tini dabe e na qele, ia e dua e sega ni bau nanumi sa mai gunuva na bilo ni vanua.

6E levu na iliuliu era sa vakamaduataki vakaca, e levu na tamata rogo era sa soli yani mera lewai.

Mo qaqarauni

7Mo vaqaqa rawa qai vakalelewa; vakasama mada qai veivosataki.

8Mo rogoca rawa qai sauma; kua ni takosova e dua ni vosa tiko.

9Kua ni veibataka na ka e sega ni nomu se kauai e na veileti ni dauvalavalaca.

10Na luvequ, kua ni veiogayaki iko e na levu na ka; ke sivia na ka o saga, o na leqa ga kina;

keo vakamuria, o na guce; o via dro, e na sega ga.

11E dua e cakacaka vagumatua, e buno, e sega ni cegu, ia se leqaleqa tiko ga.

12E dua tale e berabera, yaga me vukei, e malumalumu, e dravudravua vakalevu,

ia e raici koya na Turaga e na mataloloma, vueti koya mai na vanua lolovira;

13nona mai dokai koya, e ka ni qoroqoro.

14Na ka vivinaka na ka caca, na bula na mate, na dravudravua na vutuniyau e vu mai vua na Turaga.

15 Na yalomatua, na vuku, na kila na lawa e vu mai vua na Turaga; na veikaroni kei na cakacaka vinaka e vu mai vua.

16 Na cala kei na butobuto erau buli vata mai kei ira na dauvalavalaca; o koya e sakitaka na inaki ca e na qase vata mai.

17E tudei na isolisoli ni Turaga vei ira na yalododonu, e mana tu ga na ka e vakadonuya.

18 Same 49.10; Luke 12.16-21 E vutuniyau e dua e na nona mamakutu kei na vakuai koya, ia qo na nona ivota:

19ni tukuna “Au sa kune vakacegu, au na marautaka mada na noqu iyau!”

e sega ni kila se naica e na mate kina qai laiva tu mai nona iyau.

20Mo dina e nomu yalayala, mo vakayacora; mo cakacaka tiko me yacova nio sa qase.

21Kua ni qoroya na cakacaka ni tamata ca; nuitaka na Turaga, qacoya nomu cakacaka,

ni rawarawa vua na Turaga me vakaiyautaki ira vakatotolo na dravudravua.

22O yalododonu e kena isau na veivakalougatataki ni Turaga, e dau vakatubura vakatotolo na Kalou na nona veivakalougatataki.

23Kua ni kaya, “Na cava au leqa kina, na iyau cava e na noqu mai muri?”

24Kua ni kaya, “Au sa rawati yau, na leqa cava tale e rawa ni yacovi yau mai muri?”

25E na siga ni sautu, e guilecavi na leqa; e na siga ni leqa, sa sega ni nanumi na sautu.

26E rawarawa vua na Turaga me sauma vakadodonu na nona ivalavala e dua e na siga e mate kina.

27Na vakaloloma ni dua na auwa, e guileca kina na tiko vinaka; ni dua sa cava na nona bula, e na vakavotui na nona ivalavala.

28Kua ni tukuna vua e dua ni kalougata ni bera ni mate, ni matata ga na nona bula e na kena itinitini.

Digitaka donu nomu itokani

29Kua ni vakacurumi ira vakaveitalia na tamata i vale, ni levu tu na nodra ilawaki na qaseqase.

30Na tamata viavialevu e vaka na toa veitemaki mai veikau; e irova tiko mai na nomu malumalumu vaka na yamata.

31E wawa lo toka me moica na vinaka me ca, me vakawelana na itovo vinaka.

32Lidi ga na buka, qai caudre levu sara; e wawa lo na tamata ca me vakadave dra.

33Qarauna na tamata lawaki ca, ni dau buki vere de na vakacacani iko vakadua.

34Nio vakacuruma i nomu vale na vulagi tani, e na vakasosa vei iko, dou na veisei kina vakavuvale.