Joeli 3 - Vakavakadewa Vou kei na iVola tale eso（FNVDC12）

1“Ia ena gauna o ya, ni'u sa vakalesuya oti tale kina vei Juta kei Jerusalemi na nona i yau,

2ka'u na qai vakasoqoni ira vata na lewe ni veimatanitu ka kauti ira sobu ki na buca i Josefati, ka'u na qai veilewaitaki ira mai kea, ena vukudra na noqu tamata kei Isireli na noqu i votavota, baleta ni ra a dui biubiuti ira ena kedra veimama na veimatanitu, ka ra a veivotayaka na noqu vanua.

3Era a vakawirimadigitaki ira na noqu tamata, era a soli ira na gonetagane me i voli ni yalewa dautagane, ka volitaka na goneyalewa me i sau ni waini me ra gunuva.

4 Aisea 23.1-18; Isi 26.1–28.26; Emo 1.9,10; Saka 9.1-4; Maciu 11.21,22; Luke 10.13,14 Aisea 14.29-31; Jere 47.1-7; Isi 25.15-17; Emo 1.6-8; Sefa 2.4-7; Saka 9.5-7Kemudou o Taia kei Saitoni kei na yasayasa vaka-Filisitia, a cava vei au oi kemudou? Dou sa via veisausaumitaka vei au e dua na ka? Kevaka e vakakina, au na sauma vakatotolo ka vakasauri sara vei kemudou na i sau ni nomudou i valavala.

5Ka ni dou a kauta na noqu siliva kei na noqu koula ka yauta na noqu i yau talei ki na nomudou veivalenisoro.

6Dou volitaki ira na tamata i Juta kei Jerusalemi vei ira na kai Kirisi, ka kauti ira me ra yawa tani mai na i nodra i yalayala.

7Ia oqo au na vakayavalati ira mai na vanua dou a volitaki ira kina, kau na qai sauma lesu e ulumudou na nomudou i valavala.

8Au na volitaki ira na luvemudou tagane kei na luvemudou yalewa ki na ligadra na luve i Juta, era na qai volitaki ira vei ira na kai Sipa, ki na matanitu yawa sara, sa kaya vakaoqo na Kalou.”

9“Dou kacivaka oqo ki na veimatanitu:

‘Ni vakarau ki na i valu;

Ni kacivi ira mai na nomuni tamata qaqa;

Soqoni ira kece mai na nomuni sotia ka tayabe yani!

10 Aisea 2.4; Maika 4.3 Tukitukia na bati ni siviyara me i seleiwau,

Kei na nomudou i sele ni sasamaki me moto;

Ka me kaya o koya sa gogo, “Au sa dauvala.”

11Dou vakatotolo ka lako mai

Na veimatanitu kece sa volita,

Dou soqoni vata yani ki kea.

I Jiova, ni kauti ira sobu mai

Na nomuni qaqa.

12Me ra yadra na veimatanitu,

Ka lako sobu mai ena buca o Josefati;

Mai kea, au na veilewaitaki ira

Na veimatanitu kei na vanua sa volita.

13 Vtaki 14.14-16; Vtaki 14.19,20; 19.15 Dou vakarautaka na i sele ni tatamusuki,

Ka tamusuki ira me vaka na sila

Ena gauna ni tatamusuki.

Lako yani, ka butuqaqia

Me vaka na qerepi.

Sa sinai ka vuabale na i keli waini,

Ni sa ka levu na nodra caka cala.

14Sa udolu vakaudolu

Era sa tiko ena buca ni veicudruvi.

Sa voleka ga na siga i Jiova

Ena buca ni veicudruvi.

15Ena vakabutobutotaki

Na rarama ni matanisiga kei na vula;

Ka ra sa tabonaka na kedra rarama

Na veikalokalo.

16 Emo 1.2 Ia o Jiova sa kurukuru mai Saioni,

Ka sa tabalaka na domona mai Jerusalemi;

Ka sa yavavala na lomalagi kei vuravura.

Ia sai drodro ga o Jiova

Vei ira na nona tamata;

Sa nodra koro kaukauwa na Isireli o koya.

17“Dou na qai kila

Ni sai au o Jiova na nomudou Kalou,

Au sa tiko mai Saioni,

Na noqu ulunivanua tabu.

Ena yaco o Jerusalemi me koro tabu

Era na sega ni taukena tale na vulagi.

18Ia, ena siga o ya

Ena tiri na waini vou mai na veiulunivanua,

Ena drodro na sucu ena veidelana,

Na veidreke ni wai kece sara e Juta,

Ena drodro mai kina na wai;

Ena dave na wai mai na vale i Jiova

Me vakasuasuataka na Buca o Sitimi.

19Ena vaka na vanua dravuisiga o Ijipita

Ka yaco o Itomo me vanua lala,

Baleta ni ra a valuta na vanua o Juta,

Ka vakamatei ira sa sega nodra cala.

20Ia o Juta ena tawani tikoga ka sega ni mudu.

Kei Jerusalemi mai na i tabatamata e dua

Ka yacova na veitabatamata e muri.

21Au na cudruvaka na kedra dra,

Au na sauma vei ira sa caka cala,

Ni sai au o na Jiova,

Ka'u sa tiko ena Ulunivanua o Saioni.