1A sa rogoca o Etoni-seteki na tui Jerusalemi ni sa vakadrukai Ai o Josua, ka vakarusa vakaca, ka vakamatea talega na kena tui me vaka ga na veika a vakayacora taumada vei Jeriko kei na nodra tui. A sa rogoca talega o koya ni ra sa veisaututaki na kai Kipioni kei ira na Isireli ka ra sa vakaitikotiko voleka vei ira.
2Ena ka oqo era sa rere vakalevu sara kina na kai Jerusalemi me vaka ni koro levu sara o Kipioni me vaka na veikoro lelevu eso era vakatui. A levu cake talega mai vei Ai o koya, ka ra tamata vinaka ni vala na lewena.
3Sa qai vakau i tukutuku o Etoni-seteki na tui Jerusalemi vei Oami na tui Epironi, vei Pirami na tui Jarimoci, vei Jafia na tui Lakisi kei Tepiri na tui Ekiloni ka tukuna:
4“Mo ni lako mai vei au me da mai valuti Kipioni vata, baleta ni ra sa cakava e dua na veiyalayalati ni veisaututaki o ira na kena tamata vata kei Josua kei ira na Isireli.”
5Era sa qai soqoni vata o ira na tui ni Amoraiti e lima oqo: o tui Jerusalemi, tui Epironi, tui Jarimoci, tui Lakisi kei tui Ekiloni, ka lako vata mai kei ira na nodra dui mataivalu ka vakavolivoliti Kipioni ka valuta.
6Era sa qai vakauta na kai Kipioni e dua na i tukutuku vei Josua ki na nona keba mai Kilikali, ka tukuna, “Mo ni kakua ni laivi keimami na nomuni tamata, ni lako vakatotolo mai ka mai vukei keimami, ni vakabulai keimami! O ira kece na nodra tui na Amoraiti ka tiko ena veidelana era sa soqoni vata me valuti keimami.
7Sa qai lako cake mai Kilikali o Josua kei na nona mataivalu taucoko; ka vakakina o ira kece sara na nona sotia nuitaki.
8Sa qai tukuna vei Josua o Jiova, “Mo kakua ni rerevaki ira. Au sa solia oti vei iko me nomu na qaqa. Ena sega sara ni dua vei ira me vorati iko rawa.”
9Era sa lako vakaivalu ena bogi taucoko o ya o Josua kei na nona mataivalu mai Kilikali, ka yaco vakidacala vei ira na meca ni ra wele vinaka tu.
10Sa qai cakava o Jiova me ra veilecayaki na Amoraiti, ni ra sa raica na mataivalu ni Isireli. Era sa qai samuti ira e Kipioni, ka vakasevi ira sobu ena qakilo ni veiulunivanua o Peci Oroni, ka vala tiko me yaco sara ki na ceva, o ya e Aseka kei Maketa.
11Ia ni ra sa dro tiko mai vei ira na mataivalu ni Isireli ki na qakilo ni ulunivanua e Peci Oroni, sa qai vakatauca o Jiova me lutuki ira na vatu lelevu mai lagi, me yaco sara ki Aseka. Era lewe levu cake na meca era sa mate ena uca vatu lelevu, ka lailai e mate ena ligadra na Isireli.
12Ena siga sa solia kina o Jiova na qaqa vei ira na Isireli mai vei ira na Amoraiti, a vosa vei Jiova o Josua, ni ra sa vakarorogo tiko na Isireli, ka tukuna,
“I matanisiga, mo tu vakadua e delai Kipioni,
Kei iko na vula, mai na buca o Eijaloni.”
13A sa tu vakadua na matanisiga, ka sega talega ni toso na vula me yacova ni ra sa ravuti kece na kedra meca na Isireli. Sa volai na ka oqo ena i vola i Jasari. A sa tu vakadua na matanisiga ena lomadonu ni lomalagi, ka sega mada ni dromu me dua taucoko na siga.2Samu 1.18; Sr 46.4-6
14E sega mada ni bau yaco vakadua e liu, se ena dua tale na gauna mai ki muri me dua na siga me tautauvata tukuna na siga talei o ya, ni sa vakarorogo kina o Jiova ki na nona vosa e dua na tamata. Sa totaki ira na Isireli o Jiova ena i valu!
15Ni sa oti oqo, sa suka lesu tale ki na keba e Kilikali o Josua kei na nona mataivalu.
Vesuka e Lima na Tui o Josua16E ratou sa dro na tui limalima o ya ka vunitaki iratou ena dua na qaravatu mai Maketa.
17Ni sa tukuni vei Josua ni ratou a vunitaki na tui ena qara mai Maketa,
18Sa tukuna o Josua, “Vaqiqica eso na vatu lelevu me latia na gusu ni qaravatu, ka lesia eso na sotia me ra yadrava.
19Mo ni kakua ni la'ki tao e kea! Vakacemuri ira sara na meca ka ravuravu yani e dakudra. Kakua ni laivi ira me ra yaco ki na nodra veikoro, ni sa soli ira oti ki na ligamuni o Jiova na nomuni Kalou.”
20Sa qai vakamatei ira na meca o Josua kei ira na Isireli, ia eso na meca era sa curu rawa ki na nodra koro, ka bula kina.
21Era sa qai suka bula kece tale vei Josua o ira na nona tamata ki na keba e Maketa. A sega sara ni dua ena vanua o ya a doudou me vosa vakacacataki ira na Isireli.
22Sa qai tukuna o Josua, “Ni vagalalataka na gusu ni qara vatu ka kauti iratou kece mai na tui vei au.”
23A dola na qara vatu, ka ratou tuberi mai ki tautuba na tui taucoko: na tui Jerusalemi, na tui Epironi, na tui Jarimoci, na tui Lakisi, kei na tui Ekiloni,
24ka kau yani vei Josua. Sa qai kacivi ira kece na Isireli o Josua me ra lako yani vua, ka vakaroti ira na turaganivalu era sa lako vata ka kaya, “Ni lako mai ki ke, ka butuka na domodratou na tui oqo.” Era sa qai vakayacora vakakina.
25Sa qai vosa vei ira o Josua, “Ni kakua ni rere se yalolailai. Mo ni kaukauwa ka qaqa me vaka ni sa samuti ira tiko vakaoqo na kemuni meca kece o Jiova.”
26Sa qai vakamatei iratou na tui limalima o Josua ka vakaliligi iratou ena lima na vunikau me yacova sara na yakavi.
27Ia ni sa dromu na siga, sa vakarota o Josua me kau sobu mai na yagodratou ka viritaki ki na loma ni qaravatu ka ratou a vunitaki iratou mada kina e liu. Sa qai bini yadua na vatu lelevu e gusu ni qara, ka ra sa tu ga kina me yacova na siga oqo.
28E a valuti Maketa ka rawa ena siga o ya o Josua, ka vesuka talega na kena tui. Sa qai vakamatei ira kece na lewena ka sega tale ni laiva e dua me bula. Sa vakayacora vua na tui Maketa na ka ga sa cakava vua na tui Jeriko.
29Ni sa oti o ya a biuti Maketa o Josua kei na nona mataivalu ka lako yani ki Lipina me valuta.
30E a solia talega o Jiova, na koro o ya kei na kena tui, ki na ligadra na Isireli. Era sa vakamatea kece na lewena ka sega ni vakavoca e dua, ka cakava vua na kena tui, na ka ga era sa vakayacora vua na tui Jeriko.
31Ni oti o ya, sa biuti Lipina o Josua kei na nona mataivalu ka lako yani ki Lakisi me valuta.
32Ena i karua ni siga ni vala, sa solia vei ira na Isireli o Jiova na qaqa. Era sa vakamatei ira kece sara na lewe i Lakisi sega ni vakabula e dua, me vaka ga era a cakava vei ira na kai Lipina.
33Sa qai lako mai me vukei Lakisi o Orami na tui Keseri, ia e sa vakarusai koya kei ira na nona sotia o Josua ka sega ni laiva e dua me bula.
34Ni oti o ya, sa biuti Lakisi o Josua kei na nona mataivalu ka lako yani ki Ekiloni, wavokita na koro ka valuta.
35Era sa vakamalumalumutaka ena siga vata ga o ya, ka vakamatei ira kece sara na lewena, me vaka ga era sa cakava mai Lakisi.
36A sa biuti Ekiloni tale o Josua kei na nona mataivalu ka cabeta na veidelana me lako ki Epironi, ka valuta,
37ka vakamalumalumutaka. Era sa vakamatea na kena tui kei ira kecega na lewena, ka vaka talega kina ki na veikoro e volekata. A sa lewa o Josua me vakarusai vakadua na koro o ya me vaka ga era sa vakayacora mai Ekiloni ka sega ni dua me vo bula.
38Sa qai lesu tale ki Tepiri o Josua kei na nona mataivalu ka valuta.
39A sa vakamalumalumutaka sara, ka vakakina na kena tui, kei na veikoro kece ka volekata. Era a vakamatea na tamata kecega ena koro o ya. A sa cakava o Josua ki na koro o Tepiri kei na kena tui na veika e sa cakava vei Epironi, Lipina vata kei ira na kedra tui.
40A sa vakamalumalumutaka na vanua kece o ya o Josua. A sa rawai ira kece sara na tui ena vanua veidelana, na kena veibaba ena tokalau kei na veibuca ena i dromudromu ni siga, ka vakakina na veivanua talasiga ena ceva. A sa sega ni vakabula e dua, era sa vakamatei kecega, me vaka e sa vakarota o Jiova na Kalou ni Isireli.
41Sa vakamalumalumutaka o Josua na veivanua me vakatekivu mai na ceva kei Katesi Banea me yaco ki Qasa kei na vanua taucoko o Qoseni ka gole cake vaka ki na vualiku ki Kipioni.
42E a vakamalumalumutaki ira na tui kece oqo kei na nodra matanitu o Josua ena dua ga na i lakolako vakaivalu, baleta duadua ga ni sa totaki ira na Isireli ena i valu oqo o Jiova na nodra Kalou.
43Ni sa oti o ya, a lesu tale ki na nona keba mai Kilikali o Josua kei na nona mataivalu.
Who We AreWhat We EelieveWhat We Do
2025 by iamachristian.org,Inc All rights reserved.
